جامبىل وبلىسىندا ءسابيدىڭ ولىمىنە قاتىستى 4 قىلمىستىق ءىس قوزعالدى

تاراز. 19 قاڭتار. جامبىل وبلىسى, تالاس اۋدانىندا كولىكتە بوسانعان قىز جۇكتىلىگىن كورسەتپەن جاسىرعانى انىقتالدى. بۇل تۋرالى جامبىل وبلىستىق پروكۋرورىنىڭ كومەكشىسى ەرمەك قۋانىشەۆ حابارلادى. تەرگەۋ قورىتىندىسىنا سايكەس, مۇعالىمدەر بوسانۋعا شاق قالعانشا مەكتەپكە كەلىپ جۇرگەن ءوز وقۋشىسىنىڭ جۇكتىلىگىن بىلمەگەن. قىز جاڭاجىلدىق ءىس-شارالارعا قاتىسىپ, حوردا ءان سالعان. قىسقى كانيكۋلداردان كەيىن, بوسانۋىنا ءبىر كۇن قالعاندا, 12 قاڭتاردا ساباققا بارعان. كەيىن ونىڭ ءوز جۇكتىلىگىن جاسىرۋ ءۇشىن كورسەتپەن كەلىپ جۇرگەنى انىقتالدى. ونى اسىراپ العان اتا-اناسى مالدى اۋىلدا بولىپ, ونىنشى سىنىپتا وقيتىن قىزىنىڭ جۇكتى ەكەنىن بىلمەپتى. جامبىل وبلىستىق دەنساۋلىق ساقتاۋ باسقارماسىنىڭ باسشىسى ەرلان ماساليموۆ قىزدىڭ 2015 جىلدىڭ ءساۋىر ايىندا سكرينينگتىك تەكسەرۋدەن وتكەنىن ايتادى. بىراق جۇكتىلىكتىڭ بەلگىسى بايقالماعان. كامەلەتكە تولماعان قىزدىڭ وقيعاسىنان كەيىن تالاس اۋداندىق ءۇشارال ورتا مەكتەبىنىڭ ديرەكتورى ءوز قالاۋىمەن قىزمەتىنەن كەتكەن. «مەكتەپ ديرەكتورىمەن بىرگە جۇمىستان كەتۋ تۋرالى ارىزدى تالاس اۋداندىق ءبىلىم ءبولىمىنىڭ جەتەكشىسى سانات اشىربەكوۆ تە جازدى. سونىمەن قاتار, ديرەكتوردىڭ وقۋ ءىسى جونىندەگى ورىنباسارى جانە سىنىپ جەتەكشىسى جۇمىستان بوساتىلادى», دەيدى ەرمەك قۋانىشەۆ. ال, وبلىس باسشىسى كارىم كوكىرەكباەۆ اپپارات جيىنىندا بۇل ىسكە قاتىسى بارلاردىڭ ەشقايسىسىنىڭ جازادان قۇتىلمايتىنىن ايتتى. وبلىستىق ءبىلىم باسقارماسى تالاس اۋدانىنىڭ اكىمىنە جاۋاپتى تۇلعالارعا قاتىستى قاتاڭ شارالار قابىلداۋى ءۇشىن ارنايى حات جولداعان. «بىراق ءالى كۇنگە دەيىن ەشقانداي جاۋاپ جوق. ءبىزدىڭ ءبىلىم باسقارماسى اۋداندىق ءبىلىم بولىمدەرىنىڭ باسشىلارىن جازاعا تارتالمايدى. ونداي قۇقى جوق. سوندىقتان تەك ۇسىنىس بەرە الادى», دەيدى بۇل جونىندە جامبىل وبلىستىق ءبىلىم باسقارماسىنىڭ باسشىسى سۇلۋشاش قۇرمانبەكوۆا. ەستەرىڭىزدە بولسا, بۇل وقيعا 13 قاڭتاردا تاڭعى ۋاقىتتا بولعان. ايەل ءوزىنىڭ اسىراپ العان جۇكتى قىزىن الىپ, كورشىسىنىڭ كولىگىمەن تارازعا جولعا شىعىپتى. جولدا قىز تولعاتىپ, ۇل بالانى تۋىپ العان. وسىدان كەيىن اقكول اۋىلىنا كىرەبەرىستە وقۋشىنىڭ وگەي شەشەسى جاڭا تۋعان ءسابيدى لاقتىرىپ جىبەرگەن. العان جاراقاتىنان ءسابي وقيعا ورنىندا شەتىنەپ كەتتى. كولىك جۇرگىزۋشىسى بۇل وقيعانى كورىپ, تاڭعالعانىن جانە بۇل قىلمىسقا قاتىسىنىڭ جوقتىعىن ايتىپ وتىر. كەيىن ءسابيدىڭ اكەسى دەلىنگەن ەر ادام ۇستالدى. ول قاراتاۋ قالاسىنداعى كوللەدجدە وقيدى ەكەن. ول دا تالاس اۋداندىق ءۇشارال اۋىلىنىڭ تۇرعىنى. ەلدوسوۆ باستاپقىدا ۇيلەنەمىن دەپ, كەيىن جۇكتى قىزدان باس تارتقان. جالپى اسىراپ العان اناعا, جۇرگىزۋشىگە جانە ءسابيدىڭ اكەسىنە قاتىستى ءتورت قىلمىستىق ءىس تەرگەلىپ جاتىر. ورالحان ءداۋىت. دەرەك, سۋرەت: egemen.kz