اقتوبەدە ەت ەكسپورتىن ارتتىرۋ بويىنشا كەڭەس ءوتتى

اقتوبە. 18 قاڭتار. اقتوبەدە ەت ەكسپورتىن ارتتىرۋ بويىنشا كەڭەس ءوتتى. بۇل تۋرالى egemen.kz ءتىلشىسى حابارلادى. وبلىسقا ەكى كۇندىك جۇمىس ساپارىمەن اۋىل شارۋاشىلىعى ءمينيسترى اسىلجان مامىتبەكوۆ كەلدى. مينيستر الدىمەن العا اۋدانىنداعى «اكتەپ» جشس-نە ات باسىن بۇرىپ, سەرىكتەستىكتىڭ جاڭا جىلدىڭ الدىندا عانا پايدالانۋعا بەرىلگەن زاماناۋي ەت كومبيناتىنىڭ جۇمىسىمەن تانىستى. سودان كەيىن العا يندۋستريالىق-تەحنيكالىق كوللەدجىندە ۇيىمداستىرىلعان اۋىل شارۋاشىلىعى تاۋار وندىرۋشىلەرىنىڭ ونىمدەرى كورمەسىندە بولىپ, وڭىردە قولعا الىنعان يەۆەستيتسيالىق جوبالارمەن تانىستى. سونىمەن قاتار, ءمينيستردىڭ قاتىسۋىمەن وبلىستا مال شارۋاشىلىعى ايماقارالىق ەت كووپەراتسياسىن قۇرۋ جانە ونى دامىتۋعا ارنالعان كوشپەلى كەڭەس ءوتتى. وعان كورشىلەس قوستاناي جانە باتىس قازاقستان وبلىستارىنىڭ اكىمدەرى ارحيمەد مۇحامبەتوۆ پەن نۇرلان نوعاەۆ, Inalca Eurasia كومپانياسىنىڭ ۆيتسە-پرەزيدەنتى اندرەي ۆاكۋلين, ينۆەستورلار, سونداي-اق, وبلىستاعى اۋىل شارۋاشىلىعى تاۋارلارىن وندىرۋشىلەر قاتىستى. كەڭەستى كىرىسپە ءسوز سويلەپ اشقان وبلىس اكىمى بەردىبەك ساپارباەۆ اۋىلدىق جەرلەردە شاعىن كاسىپكەرلىكتى دامىتۋ, «نۇر وتان» پارتياسىنىڭ باستاماسىمەن ەلىمىزدىڭ بەس وڭىرىندە باستاۋ العان شاعىن ەت-ءسۇت ءوندىرۋ جانە وڭدەۋ فەرمالارىن اشۋ بويىنشا قاناتقاقتى جوبالاردى جۇزەگە اسىرۋدىڭ وبلىستاعى قادامىنا توقتالدى. وسى باعدارلامالار بويىنشا اۋىلدا كاسىپكەرلىك نىساندارىن قۇرۋعا قازىردىڭ وزىندە 40-قا جۋىق ءوتىنىش تۇسكەنىن تىلگە تيەك ەتە كەلىپ, بۇل جوبالاردى جۇزەگە اسىرۋ ءۇشىن وبلىسقا 3,9 ميلليارد تەڭگە قارجى قاجەت ەكەنىن اتاپ ءوتتى. 2015 جىلى ايماقتا «سىباعا باعدارلاماسى بويىنشا 4,5 مىڭ ءىرى قارا ساتىپ الىنعان. رەسەيگە 2,8 مىڭ توننا ەت, سونىڭ ىشىندە 895,5 مىڭ توننا ءىرى قارا ەتى ەكسپورتقا شىعارىلعان. ءوڭىردىڭ اۋىل شارۋاشىلىعىنا 5,3 ميلليارد تەڭگە ينۆەستيتسيا تارتىلعان. القالى جيىندا اۋىل شارۋاشىلىعى ءمينيسترى اسىلجان مامىتبەكوۆ ءسوز الىپ, «100 ناقتى قادام» ۇلت جوسپارىنىڭ 61-قادامىن جۇزەگە اسىرۋ ءۇشىن ۇكىمەت تاراپىنان ەت ءوندىرىسىن دامىتۋ مەن وڭدەۋگە ستراتەگيالىق ينۆەستورلاردى تارتۋ بويىنشا جاسالىپ جاتقان جۇمىستارعا توقتالىپ ءوتتى. بيىل ەكسپورتقا 12 مىڭ توننا ءىرى قارا ەتى شىعارىلاتىنىن, ودان كەيىنگى جىلدارى بۇل كورسەتكىشتى 30 مىڭ تونناعا جەتكىزۋ كوزدەلىپ وتىرعانىن ءمالىم ەتتى. سول ءۇشىن «اكتەپ»» جشس-ءنىڭ وسى الەمدىك ستاندارتتارعا ساي ەت كومبيناتىنىڭ مۇمكىندىگىن پايدالانۋ باعىتىندا جۇمىستار جۇرگىزىلىپ جاتقانىنان حاباردار ەتتى. بۇگىنگى تاڭدا بۇل جوباعا Inalca Eurasia كومپانياسىنىڭ قارجى قۇيۋعا جانە مال بورداقىلاۋ الاڭدارىن كەڭەيتۋگە ىقىلاس تانىتىپ وتىرعانىن جەتكىزدى. ءوز كەزەگىندە ءسوز العان كورشىلەس ءوڭىر باسشىلارى بۇل باعىتتا اتقارىلىپ جاتقان جۇمىستاردى بايانداپ, ورتاق ىسكە وزىندىك ۇلەستەرىن قوساتىندىقتارىن جەتكىزدى. Inalca Eurasia ەلىمىزدىڭ ەت ءونىمى سالاسىنا 100 ملن. ەۋرودان اسا قاراجاتتى ينۆەستيتسيالاۋ جونىندە شەشىم قابىلدادى. قاراجات رەسپۋبليكانىڭ 3 وبلىسىندا ءبىر مەزگىلدە بورداقىلايتىن 44 مىڭ باس قۋاتتىلىعىمەن بورداقىلاۋ الاڭدارىنىڭ قۇرىلىسى ءۇشىن ۆەرتيكالدى-ينتەگراتسيالانعان كومپانيالاردىڭ قۇرىلۋىنا باعىتتالماق. بۇعان قوسا, اقتوبە وبلىسىندا ەت كومبيناتىنىنىڭ قۋاتتىلىعىن 20 مىڭ توننا ەت جانە ەت ونىمدەرىن ۇلعايتۋمەن مودەرنيزاتسيالاۋ جوسپارلانۋدا. Inalca Eurasia كومپانياسى قازاقستاندىق ەت برەندىن جاساپ, ەۋروپا ەلدەرى مەن رەسەي فەدەراتسياسىنا ەت ەكسپورتىن قامتاماسىز ەتۋگە نيەتتەنۋدە. ءۇش وبلىس اكىمدىكتەرىمەن, مينيسترلىكپەن جانە Inalca Eurasia كومپانياسى اراسىندا ايماقتا ەتتىڭ ەكسپورتتىق الەۋەتىن جوعارىلاتۋ ءۇشىن ينديكاتيۆتىك كورسەتكىشتەر مەن ماقساتتاردى ايقىندايتىن ەتتى مال شارۋاشىلىعىندا ايماقارالىق كووپەراتسيا قۇرۋ بويىنشا مەموراندۋمعا قول قويىلدى. قازاقستاندىق «اكتەپ» كومپانياسىمەن Inalca Eurasia ترانسۇلتتىق كورپوراتسياسى اراسىندا «100 ناقتى قادام» ۇلتتىق جوسپارىنىڭ 61-قادامىن جۇزەگە اسىرۋ اياسىندا ءوزارا كەلىسىم جاسالدى. جۇمىس ساپارىنىڭ ەكىنشى كۇنى اسىلجان مامىتبەكوۆ حرومتاۋ اۋدانىنداعى «موروچنىە يستوري» جشس رەپرودۋكتور شارۋاشىلىعىندا بولىپ, جۇمىسىمەن تانىستى. ءمينيستردىڭ قاتىسۋىمەن وبلىستىق اكىمدىكتە وتكەن القالى جيىندا اۋىل شارۋاشىلىعى سالاسىنىڭ وزەكتى پروبلەمالارى اڭگىمە ارقاۋىنا اينالدى. سونداي-اق, الداعى كوكتەمگى ەگىستىككە دايىندىق ماسەلەلەرى دە ءسوز بولدى. ساتىبالدى ءساۋىرباي. دەرەك, سۋرەت: egemen.kz.