وسكەمەن. 18 قاڭتار. شىعىس وڭىرىندە تاۋەلسىزدىكتىڭ 25 جىلدىق مەرەيتويىنا ارنالعان «تۋعان ەل – التىن بەسىگىم!» اكتسياسى اياسىندا گالا-كونتسەرت ءوتتى. بۇل تۋرالى egemen.kz ءتىلشىسى حابارلادى. اتالعان اكتسياعا جەتى جىل بويى ءوڭىردىڭ قالالارى مەن اۋداندارى بەلسەندى تۇردە قاتىسىپ, وزدەرىنىڭ ەكونوميكالىق ءھام مادەني الەۋەتىن تانىتقان بولاتىن. ونەر كەشىندە جارما اۋدانىنىڭ «عاسىرلار ءۇنى» ەتنوگرافيالىق ءانسامبلى, ءۇرجار اۋدانىنىڭ «اققۋلار سازى» فولكلورلىق ءانسامبلى, تارباعاتاي اۋدانىنىڭ «بابالار ءسوزى» ەتنوگرافيالىق-فولكلورلىق ءانسامبلى, زىريان اۋدانىنىڭ «زىريانوچكا» حالىقتىق بي ءانسامبلى, ريددەر قالاسىنىڭ كامەرالىق ءانسامبلى جانە باسقا دا ونەر ۇجىمدارى مەن ونەرپازداردى كورەرمەندەر ىستىق ىقىلاسپەن قابىلدادى.
«تۋعان ەل – التىن بەسىگىم» اكتسياسى 2009 جىلدان بەرى ءوڭىرىمىزدىڭ قالالارى مەن اۋداندارىنىڭ دامۋىنا ەرەكشە سەرپىن بەردى. اكتسيانىڭ ارقاسىندا اۋىل شارۋاشىلىعى ونىمدەرىنىڭ نارقى كەڭەيىپ, اۋدانداعى مادەنيەت ۇيلەرى كۇردەلى جوندەۋدەن ءوتتى, وزگە اۋداندارعا قوسىلىپ كەتكەن بۇرىنعى اۋدان ورتالىقتارىنداعى مادەنيەت ۇيلەرى دە كەز-كەلگەن رەسپۋبليكالىق دارەجەدەگى ۇجىمداردى قابىلداي الاتىنداي جاعدايعا يە بولدى. ودان بولەك, تۋعان جەر مەن ەلگە ارنالعان قانشاما جاڭا شىعارمالار دۇنيەگە كەلدى, الىس اۋىلدارداعى ونەر ۇجىمدارىنىڭ ماتەريالدىق-تەحنيكالىق بازاسى جاڭارتىلدى. شەت ەلدەردە, استانا مەن الماتى قالالارىندا, وزگە وڭىرلەردە جۇرگەن ايگىلى جەرلەستەرىمىز تۋعان ولكەسىنە كەلىپ, اكتسيانىڭ اجارىن اشتى. سوندىقتان, بەرەرى مول اكتسيا ءالى دە جالعاسىن تابا بەرمەك. بيىل بۇل شارا تاۋەلسىزدىكتىڭ 25 جىلدىق مەرەيتويى شەڭبەرىندە جاڭا دەڭگەيگە كوتەرىلەدى, دەدى وبلىس اكىمىنىڭ ورىنباسارى جاقسىلىق ومار.
كەش بارىسىندا شىعىس قازاقستان وبلىستىق ءماسليحاتىنىڭ حاتشىسى ۆلاديمير گولوۆاتيۋك «تۋعان ەل – التىن بەسىگىم» اتتى اكتسيانىڭ بىلتىر قازاق حاندىعىنىڭ 550 جىلدىعى, ۇلى جەڭىستىڭ 70 جىلدىعى, اتا زاڭ مەن قازاقستان حالقى اسسامبلەياسىنىڭ 20 جىلدىعىنا ارنالعانىن, اتالعان اكتسيانىڭ حالىقتى بىرىكتىرۋدىڭ, ۇلت پەن ۇلىستىڭ مادەنيەتى مەن ونەرىن ناسيحاتتاۋدىڭ ءتيىمدى قۇرالىنا اينالعانىن ەرەكشە اتاپ ءوتتى.
وبلىس اكىمىنىڭ ورىنباسارى ج.ومار اتالعان اكتسياعا اتسالىسقان قالا, اۋدان باسشىلارى مەن ونەر وكىلدەرىنە, شىعارماشىلىق ۇجىمدارعا العىس ايتىپ, اكتسيا جەڭىمپازدارىن ماراپاتتادى. ولاردىڭ اراسىندا زىريان اۋدانى – 3 ورىنعا, كۋرچاتوۆ قالاسى – 2 ورىنعا, تارباعاتاي اۋدانى – 1 ورىنعا يە بولسا, اياگوز اۋدانى وبلىس اكىمىنىڭ ارنايى جۇلدەسىمەن ماراپاتتالدى. ال «تۋعان جەر – التىن بەسىگىم!» اكتسياسىنىڭ 2015 جىلعى جەڭىمپازى, گران-پري يەگەرى بولىپ جارما اۋدانىنىڭ شىعارماشىلىق ۇجىمدارى تانىلدى. بارلىق جەڭىمپازدار مەن جۇلدەگەرلەر قارجىلاي سىيلىقتارعا يە بولدى.
دۋمان اناش.
دەرەك, سۋرەت: egemen.kz
