وسكەمەن. 18 قاڭتار. ا.پۋشكين اتىنداعى شىعىس قازاقستان وبلىستىق كىتاپحاناسىندا «ەركىن ەلدىڭ كەمەل تۇلعالارى» اتتى بىرەگەي كورمە اشىلدى.بۇل تۋرالى egemen.kz ءتىلشىسى حابارلادى.
قازاقستان تاۋەلسىزدىگىنىڭ 25 جىلدىق مەرەيتويىنا ارنالعان اۋقىمدى شاراعا جاس مەملەكەتتىك قىزمەتشىلەر, ق.نۇرعاليەۆ اتىنداعى كوللەدج ستۋدەنتتەرى مەن №4 ورتا مەكتەپتىڭ جوعارى سىنىپ وقۋشىلارى قاتىستى.
كورمە تۇساۋكەسەرىندە ەلىمىزدىڭ ۇلت بولىپ قالىپتاسۋ, مەملەكەت رەتىندە دامۋ سىندى تاريحي ۇدەرىستەرىندە وراسان ورنى بار تۇلعالاردىڭ تۇتاس گالارەياسى تانىستىرىلدى. ولاردىڭ عيبراتتى عۇمىرى مەن مەملەكەتتىك ماڭىزى بار ەڭبەكتەرىنەن سىر شەرتەتىن كىتاپتار مەن عىلىمي جيناقتار, سونداي-اق جەرگىلىكتى قىلقالام شەبەرلەرىنىڭ قولىنان شىققان پورترەتتەرى جۇرتشىلىق نازارىنا ۇسىنىلدى. اتاپ ايتقاندا, كورمەدەن ابىلاي حاننان نۇرسۇلتان نازارباەۆقا دەيىنگى ساياسي تۇلعالار, قاراكەرەي قابانبايدان گەنەرال پانفيلوۆ پەن باۋىرجان مومىش ۇلىنا دەيىنگى باتىرلار, شوقان ءۋاليحانوۆتان قانىش ساتپاەۆقا دەيىنگى عالىمدار, ابايدان ولجاس سۇلەيمەنوۆكە دەيىنگى اقىندار, دينا نۇرپەيىسوۆادان بيبىگۇل تولەگەنوۆاعا دەيىنگى قازاقتىڭ ايگىلى ايەلدەرى, كۇش اتاسى قاجىمۇقاننان وليمپيادا چەمپيوندارىنا دەيىنگى داڭقتى سپورتشىلار سياقتى تۇلعالار تۋرالى تولىق مالىمەت الۋعا بولادى.كىتاپحانا قىزمەتكەرلەرى تاۋەلسىزدىك تاريحىنداعى تۇلعالار تۋرالى تولعامدىق دارىستەرىمەن بىرگە قاتىسۋشىلار اراسىندا ءتۇرلى ۆيكتورينالىق ويىندار مەن ساۋالدار ۇيىمداستىردى. اتالعان كورمە جىل بويى قىزمەت كورسەتىپ قانا قويماي, ءوڭىر مەكتەپتەرى مەن مەكەمەلەرىندە كوشپەلى كورمەلەر وتكىزبەك.
«تاريح – الەۋمەتتىك-ەكونوميكالىق فورماتسيا, اتاۋلى كۇندەر مەن وقيعالار عانا ەمەس, ۇلى ىستەردى كەشەگى جانە بۇگىنگى تاڭدا ىسكە اسىرىپ وتىرعان ناقتىلى ادامداردىڭ, بيلەۋشىلەر مەن قولباسشىلاردىڭ ءومىرى. كورمەگە قويىلعان كىتاپتاردىڭ كوپشىلىگى قازاقستان تاۋەلسىزدىگىنىڭ العاشقى جىلدارى ەلباسىنىڭ باستاماسىمەن «مادەني مۇرا» مەملەكەتتىك باعدارلاماسىن جۇزەگە اسىرۋ ناتيجەسىندە شىعارىلعان. «تاريحتى ۇلى ادامدار جاسايدى» دەسەك, عاسىرلار كۋاسىنە اينالعان ەلىمىزدىڭ تاريحى ايتۋلى تۇلعالار عۇمىرناماسىمەن تىعىز بايلانىستى. وسى كىتاپ كورمەسى جاستارعا ەل تاريحى تۋرالى بىلىمدەرىن جۇيەلەپ, كەلەشەك ۇرپاقتىڭ مەملەكەت تاريحىنا قوسار ۇلەسىن بايىپتاپ ويلانۋىنا جانە ءوزىنىڭ ومىرلىك جولىن تاڭداۋىنا كومەك بەرەدى دەپ سەنەمىز, دەدى كىتاپحانا ديرەكتورى حابيبا اقجىگىتوۆا.
دۋمان اناش.
دەرەك, سۋرەت: egemen.kz
