الماتىدا جوباداعى 26 بالالار الاڭىنىڭ 5-ءشىسى پايدالانۋعا بەرىلدى

الماتى. 18 قاڭتار. ناۋرىزباي اۋدانىندا بيزنەستىڭ الەۋمەتتىك جاۋاپكەرشىلىگى جوباسىنا سايكەس سالىناتىن 26 بالالار الاڭىنىڭ بەسىنشىسى پايدالانۋعا بەرىلدى. بۇل تۋرالى egemen.kz حابارلادى. «الماتى قالاسىن دامىتۋ-2020» باعدارلاماسىنىڭ «الەۋمەتتىك بەيىمدەلگەن قالا» دەپ اتالاتىن باعىتىنا وراي اۋلالاردى تۇرلەندىرۋ جۇمىستارى قارقىندى تۇردە جۇرگىزىلىپ جاتىر. بۇل قادام قالادا 2020 جىلعا دەيىن سپورتپەن تۇراقتى تۇردە اينالىساتىن تۇرعىنداردىڭ سانىن 30 پايىزعا جەتكىزۋگە مۇمكىندىك بەرەدى – دەگەن ناۋرىزباي اۋدانى اكىمىنىڭ ورىنباسارى باعلان داندىباەۆ الماتىلىق كاسىپكەرلەرگە العىسىن ءبىلدىردى. قالادا سالاۋاتتى ءومىر سالتىن ناسيحاتتاۋعا جانە بالالار مەن جاسوسپىرىمدەردىڭ سپورتپەن اينالىسۋىنا قولداۋ كورسەتۋ ءداستۇرلى تۇردە جالعاسىن تابۋدا. ميني-فۋتبولعا ارنالعان الاڭقاي, كوشە ترەناجەرى, اتكەنشەك, اينالماق, باسقا دا ءتۇرلى ويىن-جاتتىعۋلارعا ارنالعان كەشەننىڭ اۋدانى 1250 شارشى مەتردى قۇرايدى. ونى سالۋعا «زەدان» جاۋاپكەرشىلىگى شەكتەۋلى سەرىكتەستىگى 16 ميلليون تەڭگەدەي قارجى جۇمسادى. تالعات ءسۇيىنباي. دەرەك, سۋرەت: egemen.kz.