اتىراۋدا سۇلۋلىق سالونىندا شاتاسقاندار سوتقا جۇگىندى

اتىراۋ. 18 قاڭتار. اتىراۋ وبلىسىنىڭ جىلىوي اۋداندىق سوتىندا سۇلۋلىق سالونىندا شاتاسقان نازىك جاندىلاردىڭ ءىسى قارالدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. وقيعانىڭ وربۋىنە تومەندەگى سەبەپتەر نەگىز بولعان. وتكەن جىلدىڭ 30 قازانىندا جىلىوي اۋدانىنىڭ ورتالىعى – قۇلسارى قالاسىنداعى «سانتا ماريا» سۇلۋلىق سالونىنا كەلۋشىلەر تەپسە تەمىر ۇزەتىن زىڭگىتتەي جىگىتتەردىڭ ەمەس, ءۇيدىڭ بەرەكەسىن كەلتىرەر ەكى نازىك جاندىنىڭ اراسىنداعى داۋ-دامايدىڭ ۇستىنەن تۇسەدى. ناقتىراق ايتقاندا, كەيىننەن جابىرلەنۋشى رەتىندە سوتقا تالاپ ارىز تۇسىرگەن ايەلدىڭ جاۋاپ بەرۋشىمەن ارازداسۋىنا سوڭعىسىنىڭ تەرىس ارەكەتى تۇرتكى بولىپتى. جابىرلەنۋشى جاۋاپ بەرۋشىگە قىزى مەن كۇيەۋ بالاسىنىڭ اراسىنا ءتۇسىپ, ايرانداي ۇيىعان وتباسىنىڭ بۇزىلۋىنا سەبەپكەر بولدى دەپ كىنا تاعىپتى. وسى ماسەلەنى ءوزارا شەشۋ ماقساتىمەن سۇلۋلىق سالونىنا كەلىپ, اشۋمەن اۋىر سوزدەر ايتقان. ال جاۋاپ بەرۋشى اۋىر سوزدەرمەن جاۋاپ قايتارۋمەن شەكتەلمەي, ءوزىن ۇرىپ, كوزىنە جەڭىل جاراقات سالدى دەپ سوتقا جۇگىنگەن. الايدا, سوت بارىسىندا جاۋاپ بەرۋشى سۇلۋلىق سالونى ىشىندە جابىرلەنۋشىگە قول جۇمساماعانىن, كەرىسىنشە, جابىرلەنۋشى ءوزىنىڭ ار-نامىسىنا تيەتىن اۋىر سوزدەر ايتقانىن مالىمدەيدى. ءتىپتى سول جەرگە پوليتسيانىڭ دا بولعانىن العا تارتىپ, جابىرلەنۋشى سۇلۋلىق سالونىنا كەلگەندە كوزىن ۋقالاپ وتىرعانىن, ۇرىس-كەرىس باستالماس بۇرىن ونىڭ كوزى اۋىرعانىن بايقاعانىنا دالەل رەتىندە ءتۇسىرىپ العان فوتونى ءىس ماتەريالدارىنا تىركەۋدى سۇراعان. جىلىوي اۋداندىق سوتى تاراپتاردىڭ ۋاجدەرىن تىڭداپ, جاۋاپ بەرۋشىنى قىلمىستىق كودەكستىڭ 108-بابىمەن كىنالى دەپ تانۋعا ۇكىم شىعاردى. ءسويتىپ, وعان 35 ايلىق ەسەپتىك كورسەتكىش, ياعني, 69 370 تەڭگە كولەمىندە ايىپپۇل سالىنىپ, بۇعان قوسا ساراپتاماعا جۇمسالعان شىعىن – 8 755 تەڭگە 33 تيىن مەملەكەت پايداسىنا ءوندىرىلدى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: egemen.kz.