سەررا-لەونەدە ەبولا ىندەتى قايتا بەلەڭ الدى

استانا. 17 قاڭتار. افريكانىڭ باتىسىندا ورنالاسقان سەررا-لەونە مەملەكەتىندە ەبولا ىندەتى قايتا جاندانا باستادى. سوعان وراي بۇگىندە وسى ەلدە 100-گە جۋىق ادام وقشاۋلاندى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ەلدە ەبولا ىندەتىنەن تاعى دا ادامداردىڭ قازا تابۋى تىركەلىپ, 16 قاڭتار كۇنى 100-دەن استام ادام كارانتينگە الىندى. «فرانس پرەسس» اقپارات اگەنتتىگىنىڭ حابارلاۋىنشا, ىندەت سالدارىنان كوز جۇمعان قىزبەن قارىم-قاتىناستا بولۋى مۇمكىن دەگەن بارلىعى 109 ادام وقشاۋلانعان. دۇنيەجۇزىلىك دەنساۋلىق ساقتاۋ ۇيىمى 15 قاڭتار كۇنى سەررا-لەونەدە وتە قاۋىپتى ەبولا ىندەتىن قايتا جۇقتىرۋ دەرەگىن راستادى. بۇدان بۇرىن ىندەتتىڭ باتىس افريكادا تولىعىمەن توقتاتىلعانى تۋرالى مالىمدەلگەن ەدى. دەرتتىڭ قۇربانى بولعان 22 جاستاعى تۇرعىن قاۋىپتى ىندەتپەن جىل باسىندا اۋىرىپ, 12 قاڭتار كۇنى كوز جۇمعان. دارىگەرلەر بويجەتكەنمەن قارىم-قاتىناستا بولعان 27 ادامدى انىقتاعان. وسىنىڭ ءوزى ىندەتتىڭ قايتادان تاراپ كەتۋ قاۋپىن تۋدىرىپ وتىر. ايتا كەتەيىك, ەبولا ىندەتى 2014 جىلى اقپاندا گۆينەيادا انىقتالعان ەدى. كەيىننەن ىندەت كورشىلەس سەررا-لەونە مەن ليبەرياعا تارادى. قاۋىپتى دەرتتىڭسالدارىنان وسى ءۇش ەلدە 11 مىڭ ادام قايتىس بولىپ, 28 مىڭنان استامى جۇقتىرعان. ەلامان قوڭىر. دەرەك: ريا «نوۆوستي». سۋرەت: tonkosti.ru.