باسكەتبول. «استانا» ءوز الاڭىندا «نيجني نوۆگورودتان» باسىم ءتۇستى

استانا. 17 قاڭتار. بۇگىن «استانا» باسكەتبول كومانداسى ۆتب بىرىڭعاي ليگاسى شەڭبەرىندە ءوز الاڭىندا رەسەيدىڭ «نيجني نوۆگورودىن» قابىلداپ, 101:79 ەسەبىمەن جەڭىسكە جەتتى. بۇل تۋرالى egemen.kz ءتىلشىسى حابارلادى. ءبىرىنشى كەزەڭدە «استانانىڭ» باسىمدىعى انىق بايقالدى. ناتيجەسىندە بۇل بولىكتە ءبىزدىڭ كوماندا 34:25 ەسەبىمەن باسىم ءتۇستى. ەسەسىنە, ەكىنشى كەزەڭ قوناقتاردىڭ بەلسەندىلىگىمەن ءوتتى. جۇيەلى ويىن ورنەگىن كورسەتە بىلگەن رەسەيلىكتەر ۇلكەن ۇزىلىسكە دەيىن ەسەپ ايىرماسىن 4 ۇپايعا دەيىن قىسقارتتى (55:51). الايدا, جەڭىسكە دەگەن جىگەرلىگىمەن كوزگە تۇسكەن استانالىقتار قالعان ەكى كەزەڭدە ءوز پايدالارىنا تيىسىنشە 25:17 جانە 21:11 ەسەپتەرىن تىركەدى. وسىلايشا, جالپى ەسەپتە 22 ۇپاي باسىمدىعىمەن (101:79) جەڭىسكە جەتكەن رامۋناس بۋتاۋتاستىڭ شاكىرتتەرى جانكۇيەرلەرىنە قۋانىش سىيلادى. ويىن بارىسىندا «استانا» ساپىنان دجەرري دجونسون مەن پاتريك كالاتەس شەبەرلىكتەرىمەن كوزگە تۇسكەنىن اتاپ وتكەن ءجون. وسى ماۋسىمدا ليگا اياسىندا 15 ويىن ويناعان كوماندامىز بۇگىندە تۋرنير كەستەسىندە 13-ورىندا كەلەدى. ەلوردالىقتار ليگا اياسىنداعى كەلەسى كەزدەسۋىن 24 قاڭتار كۇنى قوناقتا ەستونيانىڭ «كالەۆ» كومانداسىمەن وتكىزەدى. ەلامان قوڭىر. دەرەك: egemen.kz. سۋرەت: bcastana.kz.