ءسىم بۋركينا-فاسوداعى لاڭكەستىككە قاتىستى مالىمدەمە جاسادى

استانا. 17 قاڭتار. قازاقستان رەسپۋبليكاسىنىڭ سىرتقى ىستەر مينيسترلىگى بۋركينا-فاسونىڭ استاناسى – ۋاگادۋگۋ قالاسىندا بولعان لاڭكەستىك وقيعاعا قاتىستى مالىمدەمە جاسادى. بۇل تۋرالى اتالعان ۆەدومستۆونىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. مالىمدەمەدە: «قازاقستان رەسپۋبليكاسى 2016 جىلعى 16 قاڭتاردا بۋركينا-فاسو استاناسى – ۋاگادۋگۋ قالاسىندا بولعان, سونىڭ سالدارىنان ونداعان جازىقسىز ازاماتتىڭ ءومىرىن قيعان لاڭكەستىك ارەكەتتى قاتاڭ جانە ءسوزسىز تۇردە سىنايدى», – دەلىنگەن. سونىمەن قاتار, وندا قازاقستاننىڭ بۋركينا فاسو بيلىگىن تولىعىمەن قولداي وتىرىپ, مەملەكەت پەن ءوڭىردىڭ لاڭكەستىككە قارسى كۇرەس ارەكەتتەرىنە نيەتتەستىگى بىلدىرىلگەن. ودان بولەك: «لاڭكەستىك سالدارىنان قازا بولعانداردىڭ تۋىستارى مەن جاقىندارىنا كوڭىل ايتامىز جانە زارداپ شەككەن ازاماتتارعا تەز ارادا ساۋىعىپ كەتۋلەرىن تىلەيمىز. الەم بويىنشا لاڭكەستەردىڭ قىلمىستىق ارەكەتتەرىنىڭ بەلسەندى بولا تۇسۋىنە وراي اتالعان قۇبىلىسپەن تاباندى كۇرەستە حالىقارالىق قاۋىمداستىق كۇشتەرىنىڭ بىرىگۋىنە جانە بۇۇ قاراماعىندا جاھاندىق لاڭكەستتىككە قارسى جەلى قۇرۋعا شاقىرامىز», – دەلىنگەن مالىمدەمەدە. ەلامان قوڭىر. دەرەك, سۋرەت: سىرتقى ىستەر مينيسترلىگىنىڭ ءباسپاسوز قىزمەتى.