تۇڭعىش رەت تايۆان باسشىلىعىنا ايەل ادام سايلاندى

استانا. 16 قاڭتار. تاريحتا تۇڭعىش رەت تايۆان اكىمشىلىگىنىڭ باسشىسى بولىپ ايەل ادام سايلاندى. سايلاۋدا وپپوزيتسيالىق دەموكراتيالىق ورلەۋ پارتياسىنىڭ جەتەكشىسى, 59 جاستاعى تساي ينۆەندى سايلاۋشىلاردىڭ 58,1 پايىزى قولداپ, داۋىس بەردى. بۇل تۋرالى Interfax.ru سايتىنا سىلتەمە جاساعان egemen.kz ءتىلشىسى حابارلادى. سايلاۋدىڭ سوڭعى قورىتىندىسى ءالى جاريالانعان جوق. سوعان قاراماستان, تساي ينۆەننىڭ باستى قارسىلاسى, سايلاۋعا قازىرگى بيلەۋشى پارتيا «گومينداننىڭ» اتىنان قاتىسقان ەريك چۋ جەڭىلگەنىن مويىندادى. ول الدىن الا ناتيجە بويىنشا 32,5 پايىز داۋىس جيناپ, ەكىنشى ورىنعا تابان تىرەگەن. ەريك چۋ جاقتاستارىنا جاساعان مالىمدەمەسىندە: «ءبىز جەڭىلدىك. وتە وكىنىشتى. «گوميندان» سايلاۋدا جەڭىلىس تاپتى. ءبىز لايىقتى دەڭگەيدە جۇمىس جاساي المادىق. سونداي-اق, سايلاۋشىلاردىڭ سەنىمىن دە اقتامادىق», – دەدى. ايتا كەتەيىك, تايۆاندا اكىمشىلىك باسشىسىمەن قاتار, جەرگىلىكتى پارلامەنتتىڭ 113 مۇشەسىن سايلاۋ ناۋقانى دا ءوتتى. ەلامان قوڭىر. دەرەك: Interfax.ru. سۋرەت: reuters.com.