شىرايلى شاڭىراق شاتتىعى

وڭىردە جالپىۇلتتىق «ۇلكەن ەل – ۇلكەن جوباسى» شەڭبەرىندە «تاۋەلسىزدىككە – 25 جىل» اكتسياسىنىڭ باستالۋىنا وراي پەتروپاۆل قالاسىنداعى تەاتر الاڭىنا 2,5 مىڭنان استام جاس جينالىپ, فلەش-موب ۇيىمداستىردى. ولارعا كوتەرىڭكى مەرەكەلىك كوڭىل-كۇيدەگى شاھار تۇرعىندارى قوسىلىپ, شارانى ءتىپتى نۇرلاندىرىپ جىبەردى. قىتىمىر قىستىڭ قىسپاعىنا قاراماستان, اق نيەتكە تولى جىلى لەبىزدەرمەن كەلگەن جۇرتشىلىق الدىندا وبلىس اكىمى ەرىك سۇلتانوۆ ءسوز سويلەپ, تاۋەلسىزدىك جىلىنا ارنالعان شارانىڭ ايماقتا باستالعانىن جاريالادى. – ەلباسى ن.نازارباەۆ قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋدىڭ ساياسي ماڭىزىن اتاپ ءوتىپ, بۇكىلحالىقتىق مەرەكە رەتىندە تويلاۋعا ايرىقشا نازار اۋداردى. ەلىمىزدىڭ بارلىق وڭىرلەرىندە باستاۋ العان شارا اتا-بابالارىمىز عاسىرلار بويى العان تاۋەلسىزدىك قۇندىلىقتارىن قادىرلەپ-قاستەرلەپ, كوزدىڭ قاراشىعىنداي قورعاۋعا, وسكەلەڭ ۇرپاقتى قازاقستاندىق پاتريوتيزم رۋحىندا تاربيەلەپ, ەلدى, جەردى سۇيۋگە جەتەلەيدى. پرەزيدەنتىمىزدىڭ سىندارلى ساياساتى ارقاسىندا شيرەك عاسىر ىشىندە الەم تانىعان قۋاتتى مەملەكەتكە اينالدىق. الداعى ۇلى ماقساتىمىز–وركەنيەتتى ەلدەر قاتارىنا قوسىلۋ, «ماڭگىلىك ەل» يدەياسىن ورنىقتىرۋ. وعان جەتۋ جولدارى بەس ينستيتۋتتىق رەفورمادا ناقتى ايقىندالعان,–دەدى جينالعاندارعا قاراتا ايتقان سوزىندە ەرىك حامزا ۇلى. اكتسياعا ەتنومادەني بىرلەستىكتەردىڭ, ۇكىمەتتىك ەمەس ۇيىمداردىڭ وكىلدەرى, جوعارى جانە ارناۋلى وقۋ ورىندارىنىڭ ستۋدەنتتەرى بەلسەنە ارالاسىپ, دۋمانعا اينالدىردى. ەڭبەك ارداگەرى الەكسەي كروتەنكو حالقى ىنتىماقتى, تاتۋ-ءتاتتى قازاقستان سياقتى ەلدە تۇرۋدى وزىنە باقىت سانايتىنىن, ەرتەڭىنە الاڭدامايتىنىن, ورتاق وتانىمىزدىڭ كوركەيۋىنە, گۇلدەنۋىنە تىلەكتەس ەكەنىن جەتكىزسە, پەتروپاۆل قۇرىلىس-ەكونوميكالىق كوللەدجىنىڭ ستۋدەنتى روزا وماروۆا بويىنداعى جاستىق قۋاتىن, العان ءبىلىمىن ەل ەكونوميكاسىنىڭ سەرپىندى دامۋىنا ارنايتىنىن ايتا كەلىپ, وزگەلەردى وسىنداي باستاماشىل ىستەرگە بەلسەنە قاتىسۋعا, وتانىمىزدىڭ پاتريوتى, جاناشىرى بولۋعا شاقىردى. – ەلباسى قازاقستاندىق ارمانعا باستايتىن ۇلت جوسپارىن بەلگىلەپ بەردى. بەس ينستيتۋتتىق رەفورمانى جۇزەگە اسىرۋدىڭ 100 ناقتى قادامىنىڭ پراكتيكالىق كەزەڭى باستالعانىن مالىمدەدى. ءبىز تۋعان جەرگە دەگەن ىڭكار ماحابباتىمىزدى, ىستىق ساعىنىشىمىزدى حالقىمىز بەن وتانىمىزدى باي دا باقۋاتتى ەتۋگە ارناۋىمىز كەرەك. ول ءۇشىن كوپەتنوستى قوعامىمىزدىڭ ارتىقشىلىقتارىن ءتيىمدى پايدالانا ءبىلۋ قاجەت,–دەدى تىلدەسكەنىمىزدە «دۋسلىك» تاتار-باشقۇرت ەتنومادەني بىرلەستىگىنىڭ مۇشەسى زۇلەيحا بيكمەتوۆا. ونىڭ ويىن ازەربايجان ەتنومادەني ۇيىمى توراعاسىنىڭ ورىنباسارى شىڭعىس كۋربانوۆ تا قولداپ, ءبىر شاڭىراق استىندا تاتۋ-ءتاتتى ءومىر ءسۇرىپ كەلە جاتقان قازاقستاندىقتاردىڭ داعدارىستان قينالماي شىعۋىنا تىلەكتەستىگىن ءبىلدىردى. سالتاناتتى شارادان كەيىن اسپانعا قىزىلدى-جاسىلدى شارلار ۇشىرىلىپ, «العا, قازاقستان!» ءانى شىرقالدى. ونىڭ سوڭى مەرەكەلىك كونتسەرتكە ۇلاستى. وبلىستا تاۋەلسىزدىگىمىزدىڭ 25 جىلدىعى مەرەكەسىنە وراي ءىس-شارالار جوسپارى جاسالىپ, ءار اي ەلىمىزدىڭ جەتكەن جەتىستىكتەرى مەن «ماڭگىلىك ەل» قۇندىلىقتارىنا ارنالادى. جىل اياعىنا دەيىن 3,5 مىڭعا جۋىق ءتۇرلى دەڭگەيدەگى ساياسي, مادەني شارالار اتقارىلادى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.