اتىراۋدا قۇجاتسىز, باسپاناسىز وتباسى مۇشەلەرى انىقتالدى

اتىراۋ. 14 قاڭتار. اتىراۋدا بەس مۇشەسى بار قۇجاتسىز, باسپاناسىز وتباسى تۇراتىندىعى انىقتالدى. ولاردىڭ احۋالى اتىراۋ قالاسى اكىمدىگىنىڭ باقىلاۋىنا الىندى. بۇل تۋرالى egemen.kz ءتىلشىسى حابارلادى. بۇعان دەيىن nur.kz سايتىندا اتىراۋدا ءبىر وتباسىنىڭ قۇجاتسىز, باسپاناسىز قالعانى, قازىرگى ۋاقىتتا جىلۋسىز ۋاقىتشا سارايدا تۇرىپ جاتقانى حابارلانعان ەدى. وسىعان بايلانىستى اتىراۋ قالاسىنىڭ اكىمدىگى تومەندە انىقتالعان جايتتارعا بايلانىستى رەسمي مالىمدەمە تاراتتى. شىندىعىندا, 1962 جىلى تۋعان ن.ورلوۆ پەن 1974 جىلعى ە.پريدانوۆانىڭ ازاماتتىق نەكەدەن ءۇش بالاسى بار ەكەن. بالالارى 2011, 2013 جانە 2015 جىلى تۋعان. وتباسى مۇشەلەرىنىڭ بارلىعىنىڭ دا جەكە باسىن كۋالاندىراتىن قۇجاتتارى جوق ەكەنى انىقتالىپ وتىر. قالا ىرگەسىندەگى شارۋا قوجالىعىندا تۇرعان باسپاناسى ورتەنىپ كەتىپتى. بۇگىن وسى جايتتاردى انىقتاعان اكىمدىك جانىنان قۇرىلعان ارنايى كوميسسيا شەشىمىمەن ن.ورلوۆ تۇرعىلىقتى مەكەنجايى انىقتالماعان تۇلعالاردى بەيىمدەۋ ورتالىعىنا, ال ە.پريدانوۆا ءۇش بالاسىمەن بىرگە ايەلدەرگە ارنالعان داعدارىس ورتالىعىنا ورنالاستىرىلدى. ەندى قالالىق اكىمدىكتىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ ماماندارى احاج قىزمەتكەرلەرىمەن بىرگە جەكە باسىن كۋالاندىراتىن قۇجاتتارىن قالپىنا كەلتىرۋگە جانە ن.ورلوۆتى جۇمىسقا ورنالاستىرۋعا كومەگىن بەرمەك. سونىمەن بىرگە, 1 جاسقا دەيىنگى بالا كۇتىمىنە بايلانىستى جانە بالالار جاردەماقىسىن راسىمدەۋگە دە كومەك بەرىلەدى. كوميسسيا مۇشەلەرى ن.ورلوۆ پەن ە.پريدانوۆانىڭ جەكە يەلىگىندە تۇرعىن ءۇيىنىڭ بار-جوعىن انىقتاۋعا دا كىرىستى. ولاردىڭ اتتارىندا تۇرعىن ءۇي تىركەلمەگەن بولسا, ولاردى باسپانا الۋ كەزەگىنە قويۋ ءۇشىن قۇجاتتارى جيناقتالماق. بۇل وتباسىنىڭ قازىرگى احۋالى وسىلايشا اتىراۋ قالالىق اكىمدىگىنىڭ باقىلاۋىنا الىندى. جولداسبەك شوپەعۇل. دەرەك: egemen.kz. سۋرەت: nur.kz.