ۇلتتىق مۇراعاتتاعى ۇلاعاتتى جيىن

كەشە استاناداعى ۇلتتىق مۇراعات عيماراتىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان پرەزيدەنت ن.ءا.نازارباەۆتىڭ «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسى اياسىندا مەملەكەت تاريحى ينس­تيتۋتى ۇلتتىق مۇراعات جانە «جاس تاريحشىلاردىڭ رەسپۋبليكالىق قاۋىمداستىعى» قوعامدىق بىرلەستىگىنىڭ ۇيىمداستىرۋىمەن «مەملەكەتتىلىكتىڭ قالىپتاسۋى مەن دامۋىنىڭ قازاقستاندىق جولى: ناتيجەلەر, جەتىستىكتەر, بولاشاعى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. مۇنداعى نەگىزگى اڭگىمە قازاق­ستاندىقتاردىڭ تاريحي ساناسىن قالىپتاستىرۋداعى پرە­زيدەنت – ۇلت كوشباسشىسى ن.ءا.نازارباەۆتىڭ ءرولى, مەملەكەتتىلىكتىڭ قالىپتاسۋ جولى, ەكونوميكا مەن قوعام دامۋىنىڭ كەلەشەگى, «ۇلت جوسپارىنا» قاتىستى ماسەلەلەر بولدى. ودان ارى تاۋەلسىز قازاق­ستانداعى كوپەتنوستى قوعامنىڭ ومىرلىك قۇندىلىعى, ەگەمەن ەلدىڭ كونستيتۋتسياسى مەن زاڭدارى جانە بۇكىلحالىقتىق سەنىم, مەم­لەكەتتى كاسىبيلەندىرۋگە قاتىستى عىلىمي تۇجىرىمدار تىلگە تيەك ەتىلدى. سونىمەن قوسا, زاماناۋي كەزەڭدەگى توزىمدىلىك جانە حا­لىقارالىق ىنتىماقتاستىقتاعى ادامي قاتىناستاردىڭ وزەكتى تۇس­تارىن, ەۋرازيالىق كەڭىستىكتەگى ىقپالداستىق باعىتتارى مەن قازاقستاندىق بىرەگەيلىكتى دامى­­­­تۋداعى عىلىمي زەردەلەۋ تاجىريبەلەرى العا تارتىلدى. شارا اياسىندا «قازاقستان رەسپۋبليكاسىنىڭ تاۋەلسىزدىگىنە – 25 جىل» اتتى قۇجاتتى كورمە كوپشىلىك كوڭىلىنەن شىقتى. كورمەدە ۇلتتىق مۇراعات قورىنان الىنعان, ەل تاۋەلسىزدىگىنىڭ العاشقى كەزەڭىنەن باستاپ دامۋى مەن قالىپتاسۋ تاريحىن ايشىقتايتىن قۇجاتتار قويىلعان ەكەن. ماسەلەن, تۇڭعىش زاڭ جوبالارى, قازاقستان استاناسىن كوشىرۋ مەن اتاۋىن وزگەرتۋ تۋرالى قۇجاتتار مەن ەلباسىنىڭ ءومىرى, ەڭبەك جولى تۋرالى تىڭ دەرەكتەر ۆيدەو-فوتوقۇجاتتار تۇرىندە ۇسىنىلدى. ايتا كەتەيىك, تاقىرىپ شەڭ­­­­بە­رىندە ءبىراز ماسەلە قاۋزال­دى. قازاقستان رەسپۋبليكاسىنىڭ تۇڭ­عىش پرەزيدەنتىنىڭ قازاقستان مەملەكەتتىلىگىن قالىپتاستىرۋ جانە نىعايتۋداعى ءرولى; ۇلت كوشباسشىسى جانە تاۋەلسىز قازاقستاننىڭ سىرت­قى ساياساتى (1991-2015 جج); قازاق­ستاننىڭ تۇڭعىش پرەزيدەنتى جانە ەلدىڭ ينتەللەكتۋالدىق الە­ۋەتىن قالىپتاستىرۋ: يدەيادان ىسكە اسىرۋ باعىتتارى; قازاقستان رەسپۋبليكاسى پرەزيدەنتىنىڭ قازاقستاندىقتاردىڭ تاريحي وزىندىك ساناسىن قالىپتاستىرۋداعى ءرولى; پرەزيدەنت ن.ءا.نازارباەۆ جانە قازاقستان رەسپۋبليكاسى­نىڭ مەملەكەتتىك رامىزدەرى; ن.ءا.نازارباەۆتىڭ ەۋرازيالىق يدەياسىنىڭ ساياسي فيلوسوفياسى: قازاقستاندىق دامۋ جولدارىنىڭ نەگىزى سىندى ماسەلەلەر قىزۋ تالقىعا ءتۇستى. القالى جيىندا مەملەكەت تاريحى ينستيتۋتىنىڭ ديرەكتورى بۇركىتباي اياعان, پارلامەنت ءماجىلىسىنىڭ دەپۋتاتى كامال بۇرحانوۆ, ۇلتتىق مۇراعاتتىڭ باس ديرەكتورى مارات ابسەمەتوۆ, تاۋەلسىز قازاقستاننىڭ العاشقى سىرتقى ىستەر ءمينيسترى, مەملەكەت قايراتكەرى, ديپلومات تولەۋتاي سۇلەي­مەنوۆ تەرەڭ تولعامدى ءاڭ­گىمەلەر ايتتى. سودان سوڭ قازاق گۋمانيتارلىق زاڭ ۋنيۆەرسيتەتىنىڭ وقىتۋشىسى, ساياساتتانۋ عىلىم­دارىنىڭ دوكتورى, پروفەسسور ابدىجالەل باكىردىڭ «ماڭگىلىك ەل» يدەياسى – ۇلتتى ۇيىستىرۋدىڭ ۇلى كۇشى», مەملەكەت تاريحى ينستيتۋتىنىڭ ءبولىم باستىعى, تاريح عىلىمدارىنىڭ دوكتورى عاني قاراساەۆتىڭ «ۇلت كوشباسشىسى ن.ءا.نازارباەۆ جانە تاۋەلسىز قا­زاقستاننىڭ سىرتقى ساياساتى», مەملەكەت تاريحى ينستيتۋتىنىڭ باس عىلىمي قىزمەتكەرى, تاريح عىلىم­دارىنىڭ دوكتورى, پروفەسسور ءاليما اۋاناسوۆانىڭ «قازاقستاندى جاھاندىق جاڭعىرتۋداعى تۇڭعىش پرەزيدەنت ن.ءا.نازارباەۆتىڭ ءرو­لى» اتتى جانە باسقا باياندامالار مازمۇندىلىعىمەن ەرەكشەلەندى. شارا سوڭىندا ۇلتتىق مۇراعات پەن «الجير» مەموريالدى-مۇرا­جاي كەشەنىنىڭ ۇجىمدارىنا ينس­تي­تۋتتىڭ كىتاپتارى سىيعا تار­تىلىپ, تاريح جانە قوعامدىق عىلىم­دار اكادەميا­سىنا مۇشەلىككە قابىل­دانعاندار قۇتتىقتالدى. راۋشان تاۋىرحانقىزى, جۋرناليست.