ارقادا اك زاۋىتى تۇرعىزىلماق

قاراعاندى وبلىسىندا ءوندىرىس سالاسىنا ينۆەستور تارتۋ ءىسى ساتىمەن جۇرگىزىلىپ كەلەدى. مۇنىڭ جارقىن مىسالى ءوڭىر باسشىسى نۇرمۇحامبەت ابدىبەكوۆتىڭ بەلگيالىق اسا ءىرى «Carmeuse» كومپانياسىنىڭ باسشىسى رۋدولف كوللينەتپەن كەزدەسۋى بارىسىندا كورىنىس تاپتى. كەزدەسۋ بارىسىندا وبلىستىڭ وساكاروۆ اۋدانىندا جوعارى ساپالى اك وندىرەتىن زاۋىت سالۋ جوباسى جان-جاقتى تالقىلاندى. جوبا مەتاللۋرگيالىق, حيميا­لىق جانە تاعام ونەركاسىبى كاسىپ­ورىندارىنىڭ قاجەتتىلىگىن قامتاماسىز ەتەتىن ءبىرىنشى سۇرىپتى اك ءوندىرۋ بويىنشا وندىرىستىك كەشەن قۇرىلىسىن سالۋدى كوزدەيدى. كەشەن قۇرىلىسىنا 8 ملرد. تەڭگە كولەمىندەگى ينۆەستيتسيانى Carmeuse Group كومپانياسى سالماقشى. وڭىرلىك يندۋستريالاندىرۋ كارتاسىنا ەنەتىن بۇل جوبا ىسكە اسقاندا 105 ادام جاڭا جۇمىس ورنىمەن قامتاماسىز ەتىلەتىن بولادى. جوبانىڭ يننوۆاتسيالىق ءمانى مىنادا: قولدانىلاتىن تەحنولوگيا رەاكتسيالىق قابىلەتى جوعارى جانە تۇتىنۋشىنىڭ تەحنيكالىق تالاپتارىنا بەيىمدەلە الاتىن ءبىرىنشى سۇرىپتى جەڭىل جانە قاتتى كۇيدىرىلگەن اك وندىرۋگە مۇمكىندىك بەرەدى. جالپى, Carmeuse Group توبى دۇنيەجۇزى بويىنشا ونداعان زاۋىتتارى بار, اك ءوندىرۋ سالاسىندا الەمدەگى كوشباسشىلاردىڭ بىرىنەن سانالاتىن ترانسۇلتتىق كورپوراتسيا. ءدال قازىرگى جاعداي تۇرعىسىنان الىپ قاراعاندا, شەتەلدىك مۇنداي ىرگەلى كاسىپورىننىڭ وبلىسقا ينۆەس­تيتسيا قۇيماق نيەتى بەك قۋان­تارلىق جايت. مۇنىڭ ءوزى وبلىس باس­شىلىعىنىڭ وڭىرگە ينۆەس­تورلار تارتۋ ساياساتىن ءتيىمدى ءجۇر­گىزىپ وتىرعانىن كورسەتسە كەرەك.  قايرات ءابىلدينوۆ, «ەگەمەن قازاقستان». قاراعاندى.