ءتورت جىلدا – 61 نىسان

جامبىل وبلىسىندا 2012-2015 جىلدار ارالىعىندا «100 اۋرۋحانا» جوباسى شەڭبەرىندە 4 دەنساۋلىق ساقتاۋ نىسانى پايدالانۋعا بەرىلدى. ال وسى جىلدار ارالىعىندا «350 دارىگەرلىك امبۋلاتوريا, فەلدشەرلىك-اكۋشەرلىك پۋنكت جانە ەمحانا سالۋ» جوباسى اياسىندا 24 دەنساۋلىق ساقتاۋ نىساندارىنىڭ قۇرىلىسى اياقتالىپ, سالتاناتتى تۇردە اشىلدى. جالپى العاندا, رەسپۋبليكالىق جانە جەرگىلىكتى بيۋدجەت ەسەبىنەن 2012-2015 جىلدارى 61 دەنساۋلىق ساقتاۋ نىسانى سالىندى. ەلباسىنىڭ تاپسىرماسىنا سايكەس, ەلىمىزدىڭ ازاماتتارى, اسىرەسە, اۋىل تۇرعىندارى ستا­­تسيوناردى ەركىن تاڭداۋ قۇقى­عىن پايدالانادى. بۇگىندە ولار ءوز ەركىمەن وبلىستىق, رەسپۋب­ليكالىق دەڭگەيلەردەگى ەمدەۋ مەكەمەلەرىن تاڭداپ, ءتيىستى كومەك الۋدا. ەمدەۋگە جاتقىزۋ بيۋروسى پورتالى ناۋقاسقا مەديتسينا ۇيىمىن ەركىن تاڭداۋعا مۇمكىندىك ۇسىنادى. قازىرگى تاڭدا ناۋقاستاردىڭ سۇرانىستارىن نەعۇرلىم تو­لىق قاناعاتتاندىرۋعا, رەسۋرس ۇنەم­دەيتىن تەحنولوگيالاردى بەلسەندى تۇردە دامىتۋعا مۇمكىندىك بەرىلىپ وتىر. اۋرۋحانالار ستاتسيونارلىق كومەك كورسەتكەنى ءۇشىن اقىنى بۇ­­رىنعىداي توسەك-ورىن سانىنا قا­راي ەمەس, كورسەتىلگەن مەدي­تسي­نا­­لىق قىزمەتتەر كولەمىنە جانە ناق­تى شىعىندارىنا سايكەس الىپ وتىر. وسىنىڭ ناتيجەسىندە سارا­لانعان ەڭبەكاقى تولەۋ جۇيەسى ەنگى­زىلىپ, ەركىن تاڭداۋ قۇقىعى ارقىلى نارىقتىق قاتىناس قالىپ­تاستىرىلىپ, رەسۋرستاردى ءتيىمدى قولدانۋ قامتاماسىز ەتىلدى. بۇل دارىگەرلەردىڭ بىلىكتىلىكتەرىن كوتەرۋگە ىنتاسىن ارتتىردى جانە مەديتسينا قىزمەتكەرلەرىنىڭ باسەكەگە قابىلەتتىلىگىن دامىتۋعا ىقپال ەتەدى. بۇل جۇيەدە قاراجات تولەۋگە وبلىس بويىنشا 2015 جىلدىڭ 10 ايىندا 1426111,0 مىڭ تەڭگە ءبولىندى. تەگىن مەديتسينالىق كومەكتىڭ كەپىلدىك بەرىلگەن كولەمى شەڭبە­رىندە حالىقتى دارىلىك زاتتارمەن قامتاماسىز ەتۋگە بولىنگەن قارا­جات مولشەرى 2012 جىلى – 20,6 ملرد. تەڭگە, 2013 جىلى – 26,5 ملرد. تەڭگە, 2014 جىلى – 28,9 ملرد. تەڭگە, ال 2015 جىلى 30,5 ملرد. تەڭگەنى قۇراپ وتىر. انا مەن بالا ءولىمىن تومەندەتۋ «سالاماتتى قازاقاستان» مەم­لەكەتتىك باعدارلاماسىنىڭ باس­تى مىندەتى جانە ماقساتى بولىپ تابىلادى. وسى باعىتتا اتقارىلىپ جاتقان جۇمىستاردىڭ ۇلەس سالماعى وتە زور. بالالار مە­كەمەلەرى مەن بوسانۋعا كومەك­تەسەتىن ۇيىمداردى جابدىقتاۋ 2014 جىلى 82 پايىزدى قۇرادى. قازاقستانداعى ەكونوميكالىق ءوسۋدىڭ ارقاسىندا وتاندىق مەديتسينا قارقىندى دامىپ, جاڭا بيىكتەردى باعىندىرا باستادى. تاياۋدا جامبىل وبلىسى, بايزاق اۋدانى مىرزاتاي اۋىلدىق وكرۋ­گىندە 60 ورىندىق تۋبەركۋلەزگە قار­سى ديسپانسەر پايدالانۋعا بەرىل­دى. اۋرۋحانا قۇرىلىسىنا 1 168,4 ملن. تەڭگە, ال مەديتسينالىق قۇ­رال-جابدىقتار ءۇشىن 149,6 ملن. تەڭگە جۇمسالدى. الەۋمەتتىك ماڭى­زى بار نىساندى جوبالاۋ جانە ونىڭ قۇرىلىسىن جۇرگىزۋ جۇمىستارىمەن «ناتسيونالنىي تسەنتر قۇرىلىسكونسالتينگ» جشس مەن «تەمير-ستروي سەرۆيس ي كو» جشس اينالىستى. ءۇش قاباتتان تۇراتىن بۇل اۋرۋحانادا 9 ءبولىم بار. بۇل ديسپانسەر بايزاق اۋدانى تۇرعىندارىنا جوعارى كاسىبي ستاتسيونارلى مەديتسينالىق قىزمەت كورسەتۋ جانە الدىن الۋ شارالارىن وتكىزۋمەن قاتار, تۋبەركۋ­لەز­گە شالدىققان ناۋقاستارعا كە­شەندى ەم-دوم جۇرگىزەتىن بولادى. دەنساۋلىق ساقتاۋ سالاسىنداعى قارقىندى قۇرىلىستار مۇنىمەن توقتامايدى. ەندى بيىلعى جىلى تاراز قالاسىنداعى 300 ورىندىق كوپسالالى اۋرۋحانا مەن مەركى جانە تالاس اۋداندارىندا 2 ەمحانا پايدالانۋعا بەرىلەدى دەپ جوسپارلانۋدا. ورالحان ءداۋىت, «ەگەمەن قازاقستان». جامبىل وبلىسى. سۋرەتتى تۇسىرگەن التىنبەك قارتاباي.