يۋنەسكو-نىڭ باس حاتشىسى يرينا بوكوۆا بولگارلىق «نوۆا تەلەۆيزيا» تەلەارناسىنا بەرگەن سۇحباتىندا ءوزىنىڭ بۇۇ باس حاتشىسى لاۋازىمىنا كانديدات رەتىندە قاتىسۋعا نيەتتى ەكەنىن مالىمدەدى.
«الداعى بۇۇ باس حاتشىسىنىڭ سايلاۋ ۇدەرىسىنە ءوز كانديداتۋرامدى ۇسىنۋعا بەكىندىم. جاۋاپكەرشىلىكتى جەتە سەزىنەمىن جانە سايلاۋدا جەڭىپ شىعاتىنىما سەنىمدىمىن», – دەدى ول سۇحبات بارىسىندا. بوكوۆانىڭ اتاپ وتۋىنشە, بولگاريادان كانديدات بولىپ ءتۇسۋ ءوزى ءۇشىن اسا ماڭىزدى. ويتكەنى, بۇل لاۋازىمدا ادام بارلىق مۇددەلى تاراپتاردىڭ قولداۋىنا يە بولۋى ءتيىس. ونىڭ ىشىندە, ەڭ الدىمەن, بۇۇ قاۋىپسىزدىك كەڭەسى تۇراقتى مۇشەلەرىنىڭ قولداۋى قاجەت. سونداي-اق, ول ءوزىنىڭ كانديداتۋراسىن حالىقارالىق كوشباسشىلار كوبىرەك قولداپ وتىرعانىنا دا توقتالعان. بۇعان قوسا, يرينا بوكوۆا باق-تاردا ءوزىن قارالايتىن جاريالانىمدار كوبەيە باستاعانىنا وكىنىش بىلدىرگەن. «بارىنە بىردەي ۇناۋ مۇمكىن ەمەس. بىراق مەن ءوزىمدى قولدايتىن كۇشتەردى بىرىكتىرە الامىن دەپ ويلايمىن», – دەدى ول وسى جونىندە.
كەشىرىم سۇراۋدى تالاپ ەتتى
امەريكان-يسلام قاتىناستارى جونىندەگى كەڭەس اقش پرەزيدەنتتىگىنە ۇمىتكەر دونالد ترامپتان ونىڭ سايلاۋالدى ميتينگىسى كەزىندە قۋىلعان نارازىلىق ءبىلدىرۋشى مۇسىلمان ايەلدەن كەشىرىم سۇراۋدى تالاپ ەتتى.
اتالعان كەڭەستىڭ مالىمدەمەسىندە سولتۇستىك كارولينادا وتكەن ميتينگتە مۇسىلمان روۋز حاميدكە قاتىستى ارەكەتتەر «امەريكالىق مۇسىلمانداردى قورقىتۋ حابارلاماسى» ەكەندىگى ايتىلعان. دونالد ترامپتىڭ شتاتتاعى روك حيلل قالاسىندا ءسوز سويلەۋ كەزىندە 56 جاستاعى جولسەرىك روۋز حاميد «سالەم. مەن بەيبىتشىلىكپەن كەلدىم» دەپ جازىلعان جەڭىل جەيدەمەن تۇرعان ەكەن. ول ورنىنان كوتەرىلگەندە, اينالاسىنداعى ادامدار توبى «ترامپ! ترامپ!» دەپ ايقايلاي باستاپتى. وسى كەزدە ايەلگە كۇزەتشىنىڭ ءبىرى ونىڭ بۇل ارادان كەتۋى كەرەكتىگىن بىلدىرگەن. مۇنى د.ترامپتى قولپاشتاعاندار دا قولداي جونەلىپتى.
اۋعان بەيبىت كەلىسسوزى باستالدى
كەشە يسلامابادتا اۋعانستان, پاكىستان, اقش جانە قىتاي بيلىگى وكىلدەرىنىڭ قاتىسۋىمەن اۋعان بەيبىت ۇدەرىسىن جانداندىرۋ جونىندەگى كەلىسسوز باستالدى. بۇل جونىندە بىرقاتار اقپارات اگەنتتىكتەرى حابارلادى.
وسى ءتورت مەملەكەتتىڭ دەلەگاتسياسى كابۋل مەن «تاليبان» قوزعالىسى اراسىندا تىكەلەي كەلىسسوزدەر جۇرگىزۋدىڭ جولدارى مەن ونىڭ شارتتارىن تالقىلاۋدا. تاراپتاردىڭ بۇل جولعى كەزدەسۋىنە «تاليبان» وكىلدەرى قاتىسپايدى. اۋعانستان پرەمەر-ءمينيسترى ا.ابدۋللانىڭ ءباسپاسوز حاتشىسى جاۆەد فەيسالدىڭ حاباردار ەتۋىنشە, كەلىسسوز بارىسىندا بەيبىت ۇدەرىستى باستاۋ جانە ونى جۇرگىزۋدىڭ تەتىكتەرى تالقىلانادى. سونداي-اق, كەزدەسۋدە پاكىستان تاراپى كابۋلمەن كەلىسسوز جۇرگىزۋگە ىقىلاس تانىتىپ وتىرعان «تاليبان» وكىلدەرىنىڭ ءتىزىمىن ۇسىناتىن بولادى. جاۆەد فەيسالدىڭ سوزىنە قاراعاندا, يسلاماباد پاكىستانداعى «تاليبان» جاساقتارىنا قارجىلاي قولداۋ كورسەتۋدى دوعارۋعا جانە ونداعى سودىرلاردىڭ اۋعانستان اۋماعىنا قاراي ويىسۋىنا مۇمكىندىك بەرمەۋگە كەلىسىپ وتىر.
قىسقا قايىرىپ ايتقاندا:
- جەكسەنبى كۇنى مىسىردىڭ جاڭا پارلامەنتى العاشقى وتىرىسىن وتكىزدى. تاياۋداعى ەكى اپتادا زاڭ شىعارۋشىلار وسىدان ءۇش جىل بۇرىن سوت شەشىمىمەن تاراتىلعان پارلامەنتتەن كەيىن ۇكىمەت ەنگىزگەن جۇزدەگەن زاڭ جوبالارىن قاراۋلارى ءتيىس.
- فرانتسيا پرەزيدەنتى فرانسۋا وللاند پاريجدەگى مەشىتتە بولدى. ول مەشىت يمامى داليل بۋباەرمەن جانە ەلدەگى مۇسىلمان ءدىنى كەڭەسىنىڭ باسشىسى انۆار كبيبەشپەن اڭگىمەلەستى.
- تۇركيانىڭ قۇقىق قورعاۋ ورگاندارى ەلدىڭ وڭتۇستىگىندە سيريالىق ءجۋرناليستىڭ ولىمىنە كۇدىكتى رەتىندە ءۇش ادامدى تۇتقىندادى. قازىرگە ولاردىڭ اتى-جوندەرى اتالعان جوق.
- مەكسيكادا اۋەسقوي فۋتبولشىلار مەن جانكۇيەرلەر مىنگەن اۆتوبۋس وزەنگە قۇلاپ, سالدارىنان 10-عا جۋىق ادام مەرت بولدى جانە 30 ادام جاراقات الدى.
كحدر اقش-قا تاعى دوق كورسەتتى
سولتۇستىك كورەيا وڭتۇستىك كورەيانىڭ ۇستىمەن ۇشىپ وتكەن امەريكالىق ستراتەگيالىق بومبالاۋشى ۆ-52 ۇشاعىنا قاتىستى اقش-قا «يادرولىق جاۋاپ بەرەدى» دەگەن سيپاتتا دوق كورسەتتى.
«نوۆوستي» اگەنتتىگىنىڭ تاراتقان اقپاراتى بويىنشا, سولتۇستىك كورەيانىڭ «نودون سينمۋن» ورتالىق گازەتىنىڭ كەشەگى شىققان نومىرىندەگى ءبىر ماقالا وسى ماسەلەگە ارنالعان. وندا اقش-تىڭ «سوعىس جاعدايعا يتەرىپ» وتىرعانى اتالىپتى. سونىمەن قاتار, باسىلىم ۆاشينگتوندى «قارسى تۇرۋشىلىق تاريحىنان ساباق» الۋعا شاقىرعان. ال «رەيتەر» اقپارات اگەنتتىگى وڭتۇستىك كورەيانىڭ قورعانىس مينيسترلىگىنە سىلتەمە جاساي وتىرىپ, ۆاشينگتون مەن سەۋل وڭتۇستىك كورەياعا ستراتەگيالىق قارۋلاردى ورنالاستىرۋ مۇمكىندىگىن قاراستىرىپ جاتقانىن حابارلادى.
«ايماقتاعى ىسكە كيلىكتى» دەپ ايىپتادى
اراب مەملەكەتتەرى ليگاسىنىڭ سىرتقى ىستەر مينيسترلەرىنىڭ كايردە وتكەن كەزدەسۋىندە وعان قاتىسۋشىلار يراندى «ايماقتاعى ىسكە كيلىكتى» دەپ ايىپتاعان مالىمدەمە تاراتتى.
سىرتقى ىستەر مينيسترلەرىنىڭ ءمالىمدەمەسىندە تەھەراننىڭ ەلدەگى ساۋد ارابياسى ديپلوماتيالىق وكىلدىگىنىڭ قاۋىپسىزدىگىن قامتاماسىز ەتە الماعانى, بۇل حالىقارالىق كەلىسىمدى بۇزۋ بولىپ تابىلاتىنى كورسەتىلگەن. مالىمدەمەگە ۇيىمعا مۇشە ەلدەردەن ليۆان عانا قارسىلىق بىلدىرگەن. ويتكەنى, ليۆاندا شيتتەر سۇننيتتەردەن كەيىنگى ەكىنشى ءىرى توپ سانالادى جانە بۇل ەلدە يران قولدايتىن «حەزبوللا» ۇيىمى ارەكەت ەتەدى. مالىمدەمەدە يرانعا قارسى قاندايدا ءبىر جازالاۋ سيپاتىنداعى شارالاردى قولدانۋ ايتىلماعان. ەكى مەملەكەت اراسىنداعى جاعداي 1 قاڭتار كۇنى ءولىم جازاسىنا كەسىلگەن شيتتەردىڭ ءدىني تۇلعاسى نيمر ءال-نيمرگە شىعارىلعان ۇكىم ورىندالعاننان كەيىن ۋشىعىپ كەتكەن ەدى.
كاتالونيا باسشىسى وتستاۆكاعا كەتپەك
كاتالونيا باسشىسى ارتۋر ماس ءوزىنىڭ بيلىكتەن كەتەتىنىن مالىمدەدى جانە ول بۇل ورىنعا جيرون كارلەس پۋچدەمون كەلۋى مۇمكىن ەكەنىن دە جاسىرىپ قالمادى.
يسپانيانىڭ بۇل اۋماعىن 2010 جىلدان بەرى باسقارعان ارتۋر ماستىڭ قىزمەتتەن كەتۋىنە ەلدەگى «ۇلتتىق ۇمىتكەرلەر بىرلىگى» پارتياسى مەن «ءبارىمىز بىرگەمىز» پارتياسى اراسىنداعى كەلىسپەۋشىلىك سەبەپ بولعان ەكەن. دالىرەك ايتقاندا, كاتالونيانىڭ تاۋەلسىزدىگىن قولدايتىن بۇل ەكى پارتيا كواليتسيا باسشىسىن تاڭداۋ كەزىندە تالاسىپ قالىپتى. دەگەنمەن, ءىشىنارا كەلىسپەۋشىلىككە قاراماستان, وسى ەكى ساياسي ۇيىم وتكەن جىلدىڭ قاراشاسىندا يسپانيادان ءبولىنۋ باستاماسىن كوتەرگەن ەدى. ال مادريد بۇعان بىردەن قارسىلىق بىلدىرگەن بولاتىن.
ينتەرنەت ماتەريالدارى نەگىزىندە ازىرلەندى.
