جاس ساربازدار انت قابىلدادى

ءبىزدىڭ حالىق ەجەلدەن وتان ءۇشىن توككەن تەردىڭ باعاسىن باعامداي بىلگەن. ونىڭ ىشىندە قاستەرلى وتان-انانى قورعاۋ ەڭ اسقاق پارىز, ابىرويلى مىندەت ەكەنىن جاس ساربازدار دا جاقسى بىلەدى. انت قابىلداۋ – وتانىڭا, حالقىڭا ادال بولۋ, ەل باسىنا كۇن تۋسا, ونى اقتىق دەمىڭ قالعانشا قورعاۋ, قاجەت بولسا, جان قيۋ دەگەن ءسوز. وسىلايشا, انت قابىلداعان سارباز – ءبىزدىڭ ۇلان-عايىر جەرىمىزدى اق بىلەكتىڭ كۇشىمەن, اق نايزانىڭ ۇشىمەن قورعاعان جاۋجۇرەك اتا-بابالارىمىزدىڭ ەرلىك جولىن جالعاستىرۋشىعا, ەلدىڭ قورعانىنا, سەنىم ارقالاعان ازاماتقا اينالماقشى. 10 قاڭتاردا ۇلتتىق ۇلاننىڭ قۇرىلعانىنا 24 جىل تولدى. ايتۋلى داتاعا ورايلاستىرىپ ەلىمىز بويىنشا وتان الدىنداعى اسكەري بورىشىن وتەۋگە شاقى­رىلعان جاس ساربازداردىڭ سالتاناتتى تۇردە انت قابىلداۋ ءراسىمىن وتكىزۋ داستۇرگە اينالعان. وسى كۇنى اسكەري انتتى استانا گارنيزونى بويىنشا 200-دەن استام جاس جاۋىنگەر قابىلدادى. ايتا كەتەيىك, بۇل جولعى انت قابىلداۋ ءراسىمى ءوزىنىڭ اۋقىم­دىلىعىمەن ەرەكشەلەنىپ وتىر. ءبىز كۋا بولعان شارادا ەلور­داداعى 6636-اسكەري ءبولىمىنىڭ جاس ساربازدارى سەرت بەردى. وتان ءۇشىن وتقا تۇسەر ازاماتتارىمىزدىڭ ومىرىندەگى بۇل جاۋاپتى قادام جاساۋ شاراسىنا ءىىم باسشىلىعى, ۇلتتىق ۇلان باس قولباسشىلىعى, ءوزارا ءىس-قيمىل جاسايتىن ورگان­داردىڭ, استانا قالاسى اكىم­دىگىنىڭ باسشىلارى, سونداي-اق, انت قا­بىلداۋشىلاردىڭ اتا-انا, تۋعان-تۋىستارى قاتىستى. جاۋىنگەرلەر قاتارىن ەلىمىزدىڭ تۇكپىر-تۇكپىرىنەن اسكەرگە الىنعان جاس ساربازدار قۇرادى. سونداي ىجداعاتتى دايىندىقتىڭ جەمىسىن الاڭعا جينالعان كوپشىلىكتىڭ جاۋىنگەرلەرگە دەگەن ەرەكشە ىقى­لاسىنان اڭعارۋعا بولاتىن ەدى. جاۋىنگەرلىك تۋ سالتاناتتى تۇردە ساپ تۇزەگەن ساربازداردىڭ ناق ورتاسىنا اكەلىنگەن سوڭ شارانىڭ شىمىلدىعى ءتۇرىلىپ, جاۋىنگەرلەر انت قابىلداۋعا كىرىستى. اسىرەسە, ساربازدارعا ارناعان قۇتتىقتاۋ سوزدەردەن: – ۇلتتىق ۇلان جاۋىنگەرلەرى, بۇگىن سەندەر اسكەري انت قابىلداي وتىرىپ, تۋعان ەلىڭ – قازاقستان رەسپۋبليكاسىنا, قاستەرلى حال­قى­مىزعا جانە ونىڭ زاڭدى ساي­لانعان پرەزيدەنتىنە اقتىق دەمىڭ قالعانشا ادال قىزمەت ەتۋگە سەرت بەردىڭدەر. بۇل – سەندەردىڭ ومىرلەرىڭدە ەرەكشە ەستە قالار ءسات ءارى ەر ەنشىسى – ەل قورعاۋعا باسقان قادامدارىڭ, – دەگەن سەكىلدى پاتريوتتىق رۋح بەرەتىن نەبىر جالىندى سوزدەر جاۋىنگەرلەر جىگەرىن جانىپ, ولاردى ودان ءارى قايراتتاندىرا ءتۇستى. ءيا, وتان الدىنداعى بورىشتارىن وتەۋ باقىتى ەلوردادا بۇيىرعان جاس ساربازدار ءۇشىن ەندىگى مىندەت – ەل تىنىشتىعىن كىرپىك قاقپاي كۇزەتۋ, ازاماتتار قۇقىقتارىنىڭ قورعالۋىن قامتاماسىز ەتۋ, قىلمىسقا قارسى كۇرەس جۇرگىزۋ. راۋشان سۇلەيمەنوۆا, جۋرناليست. استانا. سۋرەتتەردى تۇسىرگەن ەرلان وماروۆ.