«بارىس» قاتارىنان بەسىنشى رەت قارسىلاسىنان باسىم ءتۇستى

استانا. 11 قاڭتار. بۇگىن استانانىڭ «بارىسى» قۇرلىقتىق حوككەي ليگاسى شەڭبەرىندە تولياتتيدە جەرگىلىكتى «لادا» كومانداسىمەن سىنعا ءتۇستى. تارتىستى وتكەن ويىن ناتيجەسىندە استانالىقتار 4:1 ەسەبىمەن باسىم ءتۇسىپ, قاتارىنان بەسىنشى رەت جەڭىسكە جەتتى. بۇل تۋرالى egemen.kz ءتىلشىسى حابارلادى. كەزدەسۋدىڭ بار بولعانى 30-سەكۋندىندا قوناقتار ەسەپ اشتى. «ءا» دەگەننەن العا ۇمتىلعان «بارىس» ويىنشىلارى نايدجەل دوۋستىڭ ءدال سوققىسىنىڭ ارقاسىندا العا شىقتى. ۇزىلىسكە دەيىن ايدىن يەلەرى تارازى باسىن تەڭەستىرۋدىڭ امالىن تابا ءبىلدى. اتاپ ايتقاندا, 15-مينۋتتا ويىنشى باسىمدىعىن جۇزەگە اسىرعان رەسەيلىكتەر دميتري ۆوروبەۆتىڭ كومەگىمەن ەسەپتى 1:1-گە جەتكىزدى. ەكىنشى كەزەڭ تاعى دا ءبىزدىڭ كوماندانىڭ بەلسەندىلىگىمەن باستالدى. ناتيجەسىندە 22-مينۋتتا نايدجەل دوۋس ءدۋبلدىڭ اۆتورى اتاندى. سوڭعى كەزەڭنىڭ العاشقى مينۋتىندا «بارىس» ويىنشىلارى ەسەپتى ەسەلەدى. بۇل جولى كوك جولاقتىڭ بويىنان قارسىلاستار قاقپاسىن ءدال كوزدەگەن برەندون بوچەنسكيدىڭ مەرەيى ۇستەم بولدى. ارادا 4 مينۋت وتكەندە دوۋس ءۇشىنشى شايباسىن سوعىپ, حەت-تريك جاسادى. ويىننىڭ قالعان ۋاقىتىندا ەسەپ وزگەرگەن جوق. وسى جەڭىسىنەن كەيىن اندرەي نازاروۆتىڭ شاكىرتتەرى 72 ۇپايمەن شىعىس كونفەرەنتسياسىنداعى 7-ورنىن ساقتاپ قالدى. ال 58 ۇپايى بار «لادا» تۋرنير كەستەسىندە 12-ورىندا تۇر. ايتا كەتەيىك, «بارىس» كەلەسى كەزدەسۋىن 13 قاڭتار كۇنى قوناقتا ءياروسلاۆلدىڭ «لوكوموتيۆىمەن» وتكىزەدى. ەلامان قوڭىر. دەرەك: egemen.kz. سۋرەت: hcbarys.kz.