اسكەري قىزمەتشىلەر اقش-تاعى ارىپتەستەرىنىڭ تاجىريبەسىمەن تانىستى

استانا. 11 قاڭتار. قازاقستان رەسپۋبليكاسى قارۋلى كۇشتەرى تاربيە قۇرىلىمدارىنىڭ اسكەري قىزمەتشىلەرى اقش-تىڭ اسكەري بازالارىندا بولىپ قايتتى. بۇل تۋرالى egemen.kz ءتىلشىسى حابارلادى. قر قك باس شتابى باستىعىنىڭ ورىنباسارى – قر قك بش تاربيە جانە يدەولوگيالىق جۇمىستار دەپارتامەنتىنىڭ باستىعى گەنەرال-مايور مۇحامەدجان تالاسوۆتىڭ باسشىلىق ەتۋىمەن دەلەگاتسيا اسكەري قىزمەتشىلەر مەن ولاردىڭ وتباسى مۇشەلەرىنە قولداۋ كورسەتۋ ورتالىقتارىنىڭ قىزمەتىمەن تانىستى, اسكەري قىزمەتشىلەر اراسىنداعى وزىنە-ءوزى قول جۇمساۋ كورىنىستەرىن الدىن الۋدىڭ ۇيىمداستىرىلۋى مەن اقش قارۋلى كۇشتەردەگى كاپەللاندار كورپۋسىنىڭ تىنىس-تىرشىلىگىن زەردەلەدى. قازاقستاندىق ارميادا تاربيە جۇمىسىن جەتىلدىرۋ شەڭبەرىندە قر قك تاربيە قۇرىلىمدارىنىڭ وكىلدەرى اسكەري قىزمەتشىلەر مەن ولاردىڭ وتباسى مۇشەلەرىنە قولداۋ كورسەتۋ ورتالىقتارىنىڭ قىزمەتىن اتاپ ءوتتى. اقش-تىڭ قك-دە مۇنداي ورتالىقتار ءاربىر اسكەري گارنيزوندا قۇرىلعان. ورتالىقتار اسكەري قىزمەتشىلەر مەن ولاردىڭ وتباسى مۇشەلەرىنە قولداۋ كورسەتۋ جونىندە الەۋمەتتىك باعدارلامالاردى ازىرلەپ, ىسكە اسىرادى, گارنيزون اۋماعىندا بوس ۋاقىتتى وتكىزۋدى, اسكەري قىزمەتشىلەردىڭ جۇبايلارىن جۇمىسقا ورنالاستىرۋدى ۇيىمداستىرادى, تومەندەتىلگەن باعامەن ءارتۇرلى تۇرمىستىق قىزمەتتەر ۇسىنادى, وتباسىلىق-تۇرمىستىق قارىم-قاتىناستاردى زەردەلەيدى, مورالدىق-پسيحولوگيالىق, كونسۋلتاتيۆتىك جانە قارجىلاي كومەك كورسەتەدى. وزىنە-ءوزى قول جۇمساۋ كورىنىستەرىن الدىن الۋ جونىندەگى اقش-تىڭ قارۋلى كۇششتەرى قىزمەتىندە قازاقستان دەلەگاتسياسى «جاۋىنگەرلىك جۇپ» جۇيەسىن اتاپ ءوتتى. قاتارداعى جاۋىنگەر جانە كىشى سەرجانتتار قۇرامىنىڭ بارلىق ساناتتاعى اسكەري قىزمەتشىلەرى جۇپقا بولىنگەن جانە ارقايسىسى ءوزىنىڭ سەرىكتەسىنىڭ مورالدىق-پسيحولوگيالىق جاي-كۇيىن باقىلاپ وتىرادى.  «جاۋىنگەرلىك قارۋلاستار» اتتى مۇنداي ۇقساس جۇيە قازاقستاننىڭ قۇرلىق اسكەرلەرىندە ءىس جۇزىندە قولدانىلىپ ءجۇر. اقش ارمياسىندا وزىنە-ءوزى قول جۇمساۋ پروبلەمالارىن شەشۋ جانە اسكەري قىزمەتشىلەرگە يدەولوگيالىق تاربيە بەرۋگە اسكەري كاپەللاندار كورپۋسى دا ۇلەس قوسۋدا.   بۇل تەولوگيالىق, ياعني, ءدىني ءبىلىمى بار وفيتسەرلەر.  ولار ءدىني ءىلىم جانە پاتريوتتىق تاربيە بەرۋ, وتباسىلىق قۇندىلىقتاردى باعالاۋ, ءسۋيتسيدتى الدىن الۋمەن اينالىسادى. داستان كەنجالين. دەرەك, سۋرەت: قازاقستان رەسپۋبليكاسى قورعانىس مينيسترلىگى.