استانا. 11 قاڭتار. 1991 جىلعى جەلتوقساننىڭ سوڭىندا قازاقستان رەسپۋبليكاسى مينيسترلەرى كابينەتىنىڭ قاۋلىسىمەن جوعارى مەملەكەتتىك بيلىك جانە مەملەكەتتىك باسقارۋ ورگاندارىن, ۇكىمەتتىك مەكەمەلەر مەن جوعارى اسكەري قولباسشىلىقتى فەلدەگەرلىك بايلانىسپەن قامتاماسىز ەتۋ ءۇشىن قازاقستان رەسپۋبليكاسى مەملەكەتتىك فەلدەگەرلىك قىزمەت قۇرىلدى. بۇل تۋرالى egemen.kz ءتىلشىسى حابارلادى.
سول ۋاقىتتان باستاپ قازاقستانداعى اسكەري فەلدەگەرلىك قىزمەت كۇن سايىن باستى مىندەتتى ورىنداۋدا. ياعني, قورعانىس مينيسترلىگى مەن قارۋلى كۇشتەر باس شتابىنىڭ باسشىلىق قۇرامىن باسپاسوزبەن, گازەتتەر جانە جۋرنالدارمەن قامتاماسىز ەتەدى.
ۇلى وتان سوعىسى كەزىندە پوشتانى وق-دارىلەرگە تەڭەستىرگەن. جاقىندارى مەن تۋعان-تۋىسقاندارىنان ورلار مەن تاسالارعا جەتكىزىلگەن حاتتار جاۋىنگەرلەرگە كۇش ءبىتىردى, جاۋمەن ايقاسۋدا توتەپ بەرۋگە كومەكتەستى, جەڭىسكە دەگەن ءۇمىت ۇيالاتتى. زاماناۋي فەلدەگەرلەر ولاردىڭ قىزمەتى ەلەكتروندىق بايلانىس قۇرالدارىنىڭ دامۋىنا قاراماستان, ارقاشان سۇرانىسقا يە بولاتىنىن ايتۋدا. سەبەبى, ولار حاتتاردى مەكەنجايعا ءدال ۋاقىتىندا جەتكىزەدى.
ءار كۇن سايىن تاڭسارىدەن باستاپ ادرەساتتارعا ماڭىزدى حات-حاباردى, گازەتتەر مەن جۋرنالداردىڭ جاڭا باسىلىمدارىن جەتكىزۋگە ءتيىس قورعانىس مينيسترلىگىنىڭ ەكسپەديتورلارى جۇمىسقا شىعادى. ولار پوشتانى قابىلدايدى, وڭدەيدى, سۇرىپتايدى, جيناقتاپ, ءارى قاراي جىبەرۋگە اتتانادى. كۇنىنە قابىلداۋ, وڭدەۋ, جەتكىزۋ قاجەت 1000-عا جۋىق حات, 50-گە تارتا گازەت پەن جۋرنال كەلىپ تۇسەدى.
ەكسپەديتورلار مەن سۇرىپتاۋشىلاردىڭ ءبىرشاماسى ايەل اسكەري قىزمەتشىلەر ەكەندىگى قىزىقتى ءجايت. فەلدەگەرلەرگە اناعۇرلىم كۇردەلى جۇمىس جۇكتەلەدى. ەر اسكەري قىزمەتشىلەر اۋا رايىنا قاراماستان, گارنيزون بويىنشا قاجەتتى حات-حاباردى جەتكىزەدى. حاتتار مەن پوشتا سالىنعان قاپشىقتار وتە اۋىر بولىپ كەلەدى. ونىڭ سالماعى 70-80 كيلودان اسىپ جىعىلادى.
فەلدەگەرلىك قىزمەتتىڭ «جاراعىنداعى» ماڭىزدى كەرەك-جاراقتىڭ ءبىرى – ول فرانكيروۆالدى ماشينا. ول پوشتا بايلانىسى قىزمەتتەرىنىڭ تولەنۋىن راستايتىن جازباشا حات-حابارعا پوشتا تولەمىنىڭ مەملەكەتتىك بەلگىلەرىن ناقىشتاۋ, اتالعان حات-حاباردىڭ جانە وزگە دە اقپاراتتىڭ قابىلدانعان كۇنىن بەلگىلەۋ ءۇشىن ارنالعان. كۇن سايىن ولشەنگەننەن كەيىن ول ارقىلى بارلىق كىرىس حات-حابار وتەدى.
«قازىرگى تاڭدا الەمنىڭ بۇرىش-بۇرىشىندا تەلەفوندىق, تەلەگرافتىق جانە راديوبايلانىستىڭ, عالامتوردىڭ قارىشتاعان كەزىندە فەلدەگەرلىك قىزمەت مۇلدەم قاجەتسىز كورىنۋى مۇمكىن. بىراق, بۇل جاڭساق پىكىر. ماڭىزدى قۇجاتتاردى عالامتورعا دا تەلەفونعا دا سەنىپ تاپسىرا المايسىڭ. تەك سەنىمدى, تياناقتى, كەز كەلگەن جاعدايدا جانە ءدال ۋاقىتىندا جۇكتى قۇپيا تۇردە جەتكىزۋگە قابىلەتتى ادامداردىڭ عانا قولىنان كەلەدى», دەپ فەلدەگەرلىك-پوشتا قىزمەتىنىڭ اسكەري قىزمەتشىلەرى اتاپ وتۋدە.
وسىلايشا, قازاقستان رەسپۋبليكاسى قارۋلى كۇشتەرىنىڭ فەلدەگەرلىك قىزمەتى كۇن سايىن زاماناۋي جۇيەلەر مەن ۋاقىت تالابىمەن تەكسەرىلگەن قۇرالداردى قولدانا وتىرىپ, سەنىمدى جانە ۇزدىكسىز بايلانىستى قامتاماسىز ەتەدى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
