قارۋلى كۇشتەردە كادەگە جاراتىلاتىن وق-دارىلەردىڭ سانى ارتۋدا

استانا. 11 قاڭتار. 2015 جىلى قازاقستان رەسپۋبليكاسى قارۋلى كۇشتەرىندە مەملەكەتتىك قورعانىس تاپسىرىسى شەڭبەرىندە 160 مىڭنان اسا ارتيللەريالىق وق-دارىلەر, 260 مىڭعا جۋىق قول گراناتالارى جانە 10 مىڭنان اسا ينجەنەرلىك وق-دارىلەر كادەگە جاراتىلدى. بۇل تۋرالى egemen.kz ءتىلشىسى حابارلادى. وق-دارىلەردى پايداعا اسىرۋ ۇدەرىسى كادەگە جاراتۋدىڭ ەكى ۋچاسكەسىندە ارىس قالاسى مەن وتار ستانتسياسىندا جۇرگىزىلەدى. ول جەردە ارنايى جابدىق, ونىڭ ىشىندە مودۋلدەر بار. «جابدىقتىڭ وسى تۇرلەرىندە وق-دارىلەردى بولشەكتەۋ, پوروحتاردى اجىراتۋ, تروتيلدى قورىتۋ, ياكي, وق-دارىلەردى الۋدان باستاپ تولىق بولشەكتەگەنگە دەيىن جانە ءارى قاراي ىسكە اسىرىلاتىن كادەگە جاراتىلاتىن ونىمدەر الۋعا دەيىن جۇرگىزىلەدى جانە قارجى مەملەكەت بيۋدجەتىنىڭ كىرىسىنە تۇسەدى.  ساقتالۋى بويىنشا مەرزىمى ءوتىپ كەتكەن وق-دارىلەر ءتيىستى ساناتقا اۋىستىرىلادى جانە پۋنكتتەرىمىزدە كادەگە جاراتىلادى. ولاردىڭ اراسىندا 40-شى جىلداردىڭ سوڭىنداعى, 50 – 60-شى جىلدارداعى وق-دارىلەر دە بار», دەدى «قازتەحنولوگيا» اق كادەگە جاراتۋ دەپارتامەنتىنىڭ ديرەكتورى ەربول الىبەكوۆ. كادەگە جاراتۋ ءارى قاراي قارا جانە ءتۇرلى-ءتۇستى سۇيمەن رەتىندە ىسكە اسىرىلۋى مۇمكىن ماتەريالداردى بولشەكتەۋ جانە الۋ ادىسىمەن جۇرگىزىلەدى. پوروح پەن تروتيل – جارىلعىش زاتتار بولەك ىسكە اسىرىلادى. مامانداردىڭ ايتۋىنشا, ستاتيستيكا بويىنشا كادەگە جاراتىلاتىن وق-دارىلەردىڭ سانى جىل سايىن ارتا تۇسۋدە. تەحنيكا قاۋىپسىزدىگىن ساقتاۋ مەن جەتىلدىرۋگە دە اسا ءمان بەرىلۋدە. «ءبىز تەحنولوگيانى وزگەرتىپ, ونى جاقسارتتىق. پوروحتاردى اجىراتۋ ءادىسىن ءبىز ابدەن وزگەرتتىك, جازاتايىم وقيعالاردىڭ ورىن الۋ ىقتيمالدىلىعى بارىنشا ازايتىلدى. ءارتۇرلى وقىتۋدى جۇرگىزەمىز, قوسىمشا جابدىق, قورعانىس قۇرالدارى ساتىپ الىنۋدا, ەڭبەكتى كۇزەتۋ مەن وندىرىستەگى قاۋىپسىزدىك جونىندە مامانداردىڭ قوسىمشا لاۋازىمدارى ەنگىزىلدى. كادەگە جاراتۋ بويىنشا وپەراتسيالاردىڭ بارلىق تۇرلەرى بەينەباقىلانىپ وتىرادى», دەدى ەربول الىبەكوۆ. كادەگە جاراتۋ ونىمدەرىن ىسكە اسىرۋ ناتيجەسىندە 2015 جىلى رەسپۋبليكالىق بيۋدجەتكە 322 ملن. تەڭگە اۋدارىلعانىن ايتا كەتكەن ءجون. داستان كەنجالين. دەرەك, سۋرەت: قازاقستان رەسپۋبليكاسى قورعانىس مينيسترلىگى.