استانا. 11 قاڭتار. 2015 جىلى 3 000-نان اسا قازاقستاندىق كەلىسىمشارت بويىنشا اسكەري قىزمەتشىلەر رەتىندە قازاقستان قارۋلى كۇشتەرىنىڭ قاتارىنا كىردى. بۇل تۋرالى egemen.kz
ءتىلشىسى حابارلادى.
مالىمەتتەرگە سايكەس وتكەن 12 اي ىشىندە جەرگىلىكتى اسكەري باسقارۋ ورگاندارىنا قازاقستاندىق ارمياعا كەلىسىمشارت نەگىزىندە قىزمەتكە ورنالاسۋعا بارلىعى 6 000-عا جۋىق ادام نيەت بىلدىرگەن.
جۇرگىزىلگەن ءىس-شارالار ناتيجەسىندە قر قك سەرجانتتار مەن ساربازدار لاۋازىمدارىنىڭ كەلىسىمشارت بويىنشا اسكەري قىزمەتشىلەرمەن جاساقتالۋى قازىرگى كەزدە شتاتتىق ساننان 71% دەڭگەيىندە تۇراقتالدى.
قر قك بش ۇيىمداستىرۋ-جۇمىلدىرۋ جۇمىستارى دەپارتامەنتىنىڭ حابارلاۋىنشا, 2015 جىلى جۇرگىزىلگەن تالداۋ مالىمەتتەرى بويىنشا كەلىسىمشارت نەگىزىندە اسكەري قىزمەتكە قابىلدانعان اسكەري قىزمەتشىلەردىڭ سانى دا ارتا ءتۇستى. ىرىكتەۋ جۇيەسىن جەتىلدىرۋدىڭ ارقاسىندا وڭ ناتيجەلەرگە قول جەتكىزىلدى. بۇل رەتتە ناركولوگيالىق تەستىلەۋدى قوسا ەسەپتەگەندە مورالدىق-پسيحولوگيالىق, كاسىبي قاسيەتتەرى مەن دەنساۋلىق جاعدايىنا ەرەكشە ءمان بەرىلەدى.
ۆ, س ساناتىنداعى جۇرگىزۋشىلەر, بايلانىس, مەديتسينا, باعدارلامالىق قامتاماسىز ەتۋ ماماندارى ۇلكەن سۇرانىسقا يە.
كەلىسىمشارت بويىنشا قىزمەت – سانالى جانە كاسىبي تۇرعىدا ەركىن تۇردە ءوز وتانىنىڭ قورعاۋشىسى اتانۋدىڭ مۇمكىندىگى. كەلىسىمشارت بويىنشا اسكەري قىزمەتشىلەرگە الەۋمەتتىك جەڭىلدىكتەر قاراستىرىلعان. اسكەري قىزمەتشى مەن ونىڭ وتباسى مۇشەلەرى باسپانامەن قامتاماسىز ەتىلەدى نەمەسە تۇرعىن ءۇيدى جالعا العانى ءۇشىن اقشالاي ۇستەمەاقى الادى. سونداي-اق, تەگىن مەديتسينالىق ەم-دوم قابىلداۋ قاراستىرىلعان. قىزمەتتەن بوساتىلۋ كەزىندە جيىرما جىلدان استام ەڭبەك ءوتىلى بار اسكەري قىزمەتشىلەر اسكەري-مەديتسينالىق مەكەمەلەردە مەديتسينالىق قىزمەتتەردى الۋدى جالعاستىرادى, ال جيىرما بەس جىلدان اسا ەڭبەك ءوتىلى بارلارى ساناتورلىق-شيپاجايدا ەم قابىلدايدى.
باسپانا الۋ جانە مەديتسينالىق قىزمەت كورسەتىلۋدەن باسقا, كەلىسىمشارت نەگىزىندەگى اسكەري قىزمەتشى مەن ونىڭ وتباسى مۇشەلەرى قونىس اۋدارۋ كەزىندە اۋە, تەمىرجول, سۋ جانە اۆتوكولىك قىزمەتتەرىن تەگىن الادى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
