پاۆلودار. 11 قاڭتار. «جاس وتان» جاستار قاناتى وبلىستىق كەڭەسىنىڭ وتىرىسىنا ءوڭىردىڭ جاستار جانە ستۋدەنتتىك ۇيىمدارىنىڭ كوشباسشىلارى, «جاس وتاننىڭ» قالالىق, اۋداندىق بولىمشەلەرىنىڭ جەتەكشىلەرى قاتىستى. بۇل تۋرالى egemen.kz ءتىلشىسى حابارلادى. وتىرىس بارىسىندا 2015 جىلدىڭ قورىتىندىلارى تىڭدالىپ, ەلباسى جولداۋى تالقىلاندى. بيىلعى جىلدىڭ جوسپارى جاسالىپ, جاستار ورتاسىنداعى قوعامدىق مونيتورينگ ەرەجەلەرى تالقىعا ءتۇستى.
وتكەن جىلى «جاس وتانعا» مىڭنان استام مۇشە قابىلداندى. جاستار 300 استام زەينەتكەرلەرگە كومەك كورسەتتى. سونداي-اق, ءوڭىر ورەندەرى وتكەن جىلدىڭ قاراشا ايىندا «بلوگگەر-اجە» جوباسىن ۇيىمداستىردى. قارتتار ۇيىندە «كۇزگى بال» وتكىزدى.
تاعى ءبىر ايتا كەتەرلىگى, وبلىستىق فيليال جانىنان 2017 جىلعى قىسقى ۋنيۆەرسيادا ەرىكتىلەرىن دايارلاۋدىڭ ايماقتىق شتابى جۇمىس جاساۋدا. قازىرگى تاڭدا شتاب ۆولونتەرلەرىنىڭ سانى 163 ادامعا جەتتى. «جاس وتان» ەرىكتىلەرى ءوڭىردىڭ قوعامدىق ماڭىزى بار شارالارىنا بەلسەندى قاتىسادى. بيىل 78 ۆولونتەر باياناۋىلدىڭ ساتباەۆ, قاراشا جانە تەڭدىك اۋىلدارىندا تاسقىن سۋدىڭ زارداپتارىن جويۋعا كومەكتەستى. وبلىس جاستار كوشباسشىلارىنا ارنالعان «جاستار – وتانعا!» ەتنوساياسي لاگەرى وتكىزىلدى.
فاريدا بىقاي.
دەرەك, سۋرەت: egemen.kz.
