قاتارىنان ءتورتىنشى جەڭىس

بۇرناعى كۇنى قۇرلىقتىق حوككەي ليگاسى شەڭبەرىندە استانانىڭ «بارىسى» ءوز ايدىنىندا ەكاتەرينبۋرگتىڭ «اۆتوموبيليست» كومانداسىن قابىلدادى. تارتىستى وتكەن ويىن ناتيجەسىندە ءبىزدىڭ جاساق 4:3 ەسەبىمەن جەڭىسكە جەتىپ, ءۇش ۇپايدى قورجىنعا سالدى. اندرەي نازاروۆتىڭ شاكىرت­تەرى كەزدەسۋدى وتە شيراق باستادى. سالعان جەردەن العا ۇمتىلعان ايدىن يەلەرىن قوناقتار ويىن ەرەجەسىن بۇزۋ ارقىلى عانا توقتاتا الدى. ناتيجەسىندە 3 جانە 4-مينۋتتاردا «ءاۆتوموبيليستىڭ» ەكى بىردەي ويىنشىسى ايدىننان قۋىلدى. الايدا, «بارىس» حوككەيشىلەرى ءۇش قورعاۋشىمەن قالعان رەسەيلىكتەردىڭ وسال تۇسىن تابا المادى. ەسەسىنە, 8-مينۋتتا قوناقتار ويىنشى باسىمدىعىن جۇزەگە اسىرىپ, ۆيتالي پوپوۆتىڭ كومەگىمەن ەسەپ اشتى. ۇزىلىسكە 6 مينۋت قالعاندا «اۆتوموبيليست» ساپى­نان اناتولي گولىشەۆ مەر­گەن­دى­گىمەن كوزگە ءتۇسىپ, ەسەپتى ەسەلەدى. ەكىنشى كەزەڭ تاعى دا «بارىس­تىڭ» باسىمدىعىمەن باستالدى. بۇل جولى جۇيەلى ويىن ورنە­گىن كورسەتكەن استانالىقتار ءبىر مي­نۋتتىڭ ىشىندە ەكى شايبا سوعىپ, تارازى باسىن تەڭەستىرىپ كەتتى. اتاپ ايتقاندا, 22-مينۋتتا كەۆين داللمەن ناتيجەلى سوققى جاساسا, 23-مينۋتتا رومان ستارچەنكونىڭ مەرەيى ۇستەم بولدى. ويىننىڭ سوڭعى كەزەڭىندە, ياعني, 42-مينۋتتا پەتر كوۋكال ءبىزدىڭ قاقپادان ساڭىلاۋ تاۋى­پ, قوناقتار تاعى دا العا شىقتى. ايتسە دە, ساعى سىنباعان بارىس­تىقتار شابۋىلدارىن توقتاتپادى. بۇل تاكتيكا ءوز جە­مىسىن بەرىپ, داستين بويد 50-مينۋتتا ەسەپتى 3:3-كە جەتكىزسە, 54-مينۋتتا «بارىستىڭ» كاپيتانى برەندون بوچەنسكي جەڭىس شايباسىنىڭ اۆتورى اتاندى. وسىلايشا, «بارىس» پلەي-وفف جولداماسىنا تالاستاعى باستى قارسىلاستىڭ ءبىرى «اۆتو­موبيليستەن» ءۇش ۇپاي ولجالادى. بۇگىندە 48 ويىننان 69 ۇپاي جيعان ەلوردالىق ۇجىم شىعىس كونفەرەنتسياسىندا 7-ورىندا كەلەدى. ال 64 ۇپايى بار ەكاتەرينبۋرگتىڭ كومانداسى – 9-ورىندا. دەگەنمەن, ونىڭ «بارىستان» ءۇش ويىن كەم وتكىزگەنىن اتاپ وتكەن ءجون. ءبىزدىڭ كوماندا كەلەسى كەزدە­سۋىن 11 قاڭتار كۇنى تولياتتيدە جەرگىلىكتى «لادامەن» وتكىزەدى. ەلامان قوڭىر, «ەگەمەن قازاقستان».