«بارىس» جاڭا جىلدىڭ العاشقى ويىنىندا جەڭىسكە جەتتى

استانا. 3 قاڭتار. بۇگىن «بارىس» كومانداسى قۇرلىقتىق حوككەي ليگاسى شەڭبەرىندە حانتى-مانسيسكىنىڭ «يۋگراسىمەن» سىنعا ءتۇستى. استانادا وتكەن كەزدەسۋدە ايدىن يەلەرى ويىن سوڭىنداعى بۋلليت ارقىلى 3:2 ەسەبىمەن جەڭىسكە جەتتى. بۇل تۋرالى egemen.kz ءتىلشىسى حابارلادى. ماتچ قوناقتاردىڭ بەلسەندىلىگىمەن باستالدى. بار بولعانى ءۇشىنشى مينۋتتا ويىن تاياعىن جوعارى كوتەرگەنى ءۇشىن «بارىس» حوكككەيشىسى كونستانتين رومانوۆ ايدىننان قۋىلدى. وزدەرىنە بەرىلگەن مۇمكىندىكتى ۇتىمدى پايدالانعان رەسەيلىكتەر 4-مينۋتتا دەنيس گوربۋنوۆتىڭ كومەگىمەن ەسەپ اشتى. الايدا, ولار بۇل باسىمدىقتى ءبىر جارىم مينۋت قانا ۇستاپ تۇرا الدى. اتاپ ايتقاندا, 5-مينۋت تۇگەسىلەر تۇستا «بارىستىڭ» قورعاۋشىسى مايك لاندين مەرگەندىگىمەن كوزگە ءتۇسىپ, تارازى باسىن تەڭەستىردى. ەكىنشى كەزەڭنىڭ باسىندا, ياعني, 26-مينۋتتا «يۋگرا» تاعى دا العا شىقتى. بۇل جولى گول ەۆگەني ورلوۆتىڭ ەنشىسىنە جازىلدى. ۇزىلىسكە دەيىن قانشا شابۋىلداسا دا اندرەي نازاروۆتىڭ شاكىرتتەرى قارسىلاستارىنىڭ قاقپاسىنان ساڭىلاۋ تابا المادى. ابىروي بولعاندا, سوڭعى بولىكتە, ياعني, ويىننىڭ 56-مينۋتىندا داستين بويد ناتيجەلى سوققى جاساپ, كوماندامىزدى جەڭىلىستەن قۇتقارىپ قالدى. وۆەرتايمدا ءبىر-ءبىرىنىڭ وسال جەرىن تابا الماعان كوماندالار ويىن سوڭىنداعى بۋلليتكە جۇگىندى. بۇل سىندا «بارىستىڭ» جولى بولىپ, ماۋسىمداعى 22-جەڭىسىنە قول جەتكىزدى. بۇگىندە ەلوردالىق جاساق 66 ۇپايمەن شىعىس كونفەرەنتسياسىندا 7-ورىندا كەلەدى. ءبىزدىڭ كوماندا كەلەسى كەزدەسۋىن 5 قاڭتار كۇنى ءوز ايدىنىندا ەكاتەرينبۋرگتىڭ «اۆتوموبيليسىمەن» وتكىزەدى. ەلامان قوڭىر. دەرەك: egemen.kz. سۋرەت: hcbarys.kz.