زيدان «رەال ءمادريدتىڭ» باس جاتتىقتىرۋشىسى بولىپ تاعايىندالدى

استانا. 5 قاڭتار. يسپانيانىڭ ايگىلى «رەال مادريد» كومانداسى باس جاتتىقتىرۋشىلىقتان رافاەل بەنيتەستى بوساتىپ, ورنىنا زينەدين زيداندى تاعايىندادى. بۇل تۋرالى bbc.com سايتىنا سىلتەمە جاساعان egemen.kz ءتىلشىسى حابارلادى. كوماندانىڭ بۇرىنعى جاتتىقتىرۋشىسى رافاەل بەنيتەس دۇيسەنبى كۇنى ديرەكتورلار كەڭەسىمەن كەزدەسۋ وتكىزگەن سوڭ, ءوز ورنىنان كەتتى. ارنايى ۇيىمداستىرىلعان ءباسپاسوز كونفەرەنتسياسىندا كلۋب باسشىلىعى يسپان مامانىنىڭ ماۋسىم باسىندا قويىلعان مىندەتتى تولىق ورىنداي الماعانى ءۇشىن وسىنداي قادامعا بارعانىن مالىمدەدى. سونداي-اق, وسى ۋاقىتقا دەيىن اتقارعان ەڭبەگىنە العىس ايتىپ, الداعى ۋاقىتتا تەك ساتتىلىكتەر تىلەدى. ايتا كەتەيىك, زينەدين زيدان «رەال مادريد» كومانداسىندا 2001-2006 جىلدار ارالىعىندا ونەر كورسەتكەن. ال فرانتسيا قۇراماسىمەن ول 1998 جىلى الەم چەمپيونى اتاندى. فۋتبولشىلىق مانسابىن اياقتاعان سوڭ, مادريدتىك ۇجىمدا 2009 جىلدان بەرى قىزمەت ەتىپ كەلەدى. اتالعان جىلى كوماندا پرەزيدەنتى فلورەنتينو پەرەستىڭ كومەكشىسى بولسا, كەلەسى جىلى كەڭەسشىسى اتاندى. 2011 جىلى ءبىرىنشى كوماندانىڭ ديرەكتورى مىندەتىن اتقاردى. وسىدان سوڭ, جاتتىقتىرۋشىلىقتى قولعا العان فرانتسيا ەلىنىڭ تۋماسى 2012 جىلى كورولدىك كلۋبتىڭ جاستار كومانداسىن جاتتىقتىردى. كەلەر جىلى ءبىرىنشى كوماندادا كارلو انچەلوتتيدىڭ كومەكشىسى بولدى. يتاليا مامانىمەن ءبىر جىل قىزمەتتەس بولعان سوڭ, 2014 جىلدان بۇگىنگە دەيىن «رەال مادريد كاستيليانىڭ» باس جاتتىقتىرۋشىسى بولىپ قىزمەت اتقاردى. ايان ءابدۋالي. دەرەك, سۋرەت: bbc.com.