اۋعانستانداعى ءۇندىستان ەلشىلىگىنە شابۋىل جاسالدى

استانا. 4 قاڭتار. ءۇندىستاننىڭ اۋعانستانداعى مازاري-شاريف قالاسىندا ورنالاسقان كونسۋلدىعىنا بەلگىسىز بىرەۋلەر شابۋىل جاسادى. بۇل تۋرالى 24.kz حابارلادى. بەلگىلى بولعانداي مازاري-شاريف قالاسىندا 2 جارىلىس بولىپ, سوڭى جارتى ساعاتتىق اتىسقا ۇلاسقان. سونداي-اق, سودىرلار ديپلوماتيالىق وكىلدىك اۋماعىنا وتپەك بولعان. الايدا, جەرگىلىكتى پوليتسەيلەر ولاردىڭ ويىن ىسكە اسىرماي, تويتارىس بەرىپ ۇلگەرگەن. اتىس كەزىندە 2 ەكسترەميست وققا ۇشىپ, قازا تاپتى. جەرگىلىكتى بيلىكتىڭ مالىمەتىنشە, قاقتىعىس سالدارىنان 1 بەيبىت تۇرعىن جاراقات العان. ال اتالعان ەلشىلىك قىزمەتكەرلەرىنەن ەشكىم زارداپ شەكپەگەن. ايتا كەتەيىك, شابۋىل جاساعانداردىڭ ناقتى سانى بەلگىسىز. لاڭكەستىك ارەكەتتى ازىرگە ەشبىر راديكالدىق ۇيىم ءوز موينىنا الماي وتىر. جالپى, مازاري-شاريف – اۋعانستانداعى ءتورتىنشى ءىرى قالا. سوندىقتان ءۇندىستان الداعى 2 ايدىڭ ىشىندە مۇنداعى تالىپتەرگە قارسى كۇرەسۋ ءۇشىن 4 اسكەري تىكۇشاق جىبەرمەك. ەستەرىڭىزگە سالا كەتەيىك, 2 قاڭتاردا سودىرلار ءۇندىستاننىڭ پاكستانمەن شەكاراسىنداعى اسكەري-اۋە بازاعا شابۋىل جاساپ, 7 ساربازدى اتىپ تاستاعان بولاتىن. تاعى 20-سى جارالانعان. اتىس كەزىندە ءۇندى جاۋىنگەرلەرىنىڭ كيىمىن كيىپ العان 4 لاڭكەستىڭ كوزى جويىلعان-دى. تالعات رايىمبەك. دەرەك, سۋرەت: 24.kz.