قىتايدا ەكولوگياعا بايلانىستى وتشاشۋعا تىيىم سالىندى

استانا. 3 قاڭتار. قىتايدا ەكولوگيانىڭ بۇزىلۋىنا بايلانىستى بىرنەشە قالادا حالىقتىڭ «قاسيەتتى» دەپ ەسەپتەيتىن – وتشاشۋ مەن پەتاردالاردىڭ جاعۋىنا تىيىم سالدى. بۇل تۋرالى سينحۋا اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. جىلدىڭ ءبىرىنشى كۇنىنەن باستاپ مۇنداي قادامعا العاش بولىپ شانحاي مەن حەنان پروۆينتسياسىنىڭ استاناسى چجەنچجوۋ قالالارى باردى. شانحايدا اۆتوماگيسترالدى شەڭبەردەن تىس ماڭايدا وتشاشۋ اتۋعا شەكتەۋ قويىلدى. قويىلعان تالاپتى ورىنداماعان جاعدايدا اكىمشىلىك جازاعا تارتىلادى. قالا باسشىلىعى ايىپپۇل رەتىندە 100 يۋان (15,4$ ) قىتاي اقشاسىن بەلگىلەدى. ال چجەنچجوۋدا مەرەكە كەزىندە وتشاشقان ءاربىر ادام 500 يۋان (77$) اقشاسىمەن جازالانادى. قالا ىشىندە پيروتەحنيكانى ءتىپتى وندىرۋگە, ساقتاۋعا, ساتۋعا دا تىيىم سالدى. ايتا كەتەيىك, وسىنداي جارىلعىش زاتتار قىتاي حالقىندا تەك كوڭىل كوتەرۋ ءۇشىن ەمەس, جىن-شايتاندارداردى قورقىتادى دەگەن تۇسىنىك بار. بىرنەشە عاسىر بويى ەشقانداي مەرەكە دە, ايتۋلى وقيعالار دا (جاڭا كومپانيالاردىڭ اشىلۋى, جاڭا قونىسقا كوشكەندە) پيروتەحنيكالار ءراسىمىنسىز وتپەگەن.الايدا, بۇگىنگى كۇنى قىتايدا ەكولوگيانىڭ بۇزىلۋى ەل تۇرعىندارى ءۇشىن جىن-شايتانداردان دا قاۋىپتىرەك بولىپ تۇر. اسپاناستى ەلىنىڭ باس قالاسى پەكين مەن سولتۇستىك وڭىرىندەگى بىرنەشە ەلدى-مەكەندەردە قاراشا ايىنىڭ ورتاسىنان باستاپ اۋانىڭ لاستانۋى دەنساۋلىققا قاۋىپتى سانالاتىن مولشەردەن بىرنەشە ەسە ارتىپ كەلەدى. وتكەن ايدا قاۋىپتىلىكتىڭ جوعارعى دارەجەسى سانالاتىن – قىزىل دەڭگەيگە ەكى مارتە جەتتى. وسىنىڭ سالدارىنان بىرنەشە جول-كولىك وقيعالارى بولىپ, تۇرعىندار ارنايى بەتپەردە كيۋلەرىنە تۋرا كەلدى. قالا ماڭىنداعى بىرنەشە كاسىپورىندار ۋاقىتشا ءوز جۇمىستارىن توقتاتتى. ايان ءابدۋالي. دەرەك: سينحۋا. سۋرەت: mirvkartinkah.ru.