اقش-تا الەمدەگى ەڭ ءىرى McDonald's مەيرامحاناسى جابىلدى

استانا. 2 قاڭتار. اقش-تىڭ فلوريدا شتاتىندا ورنالاسقان ورلاندو قالاسىنا تاياۋ ماڭدا الەمدەگى ەڭ ءىرى McDonald's جىلدام تاماق دايىنداۋ ورنى جابىلدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. اتالعان مەيرامحانا تانىمال «ديسنەيلەند» ويىن-ساۋىق ورتالىعىنىڭ قاسىندا 1976 جىلى اشىلعان. ۇلكەندىگى بويىنشا جۇرتشىلىقتىڭ اراسىندا جاقسى پىكىر قالىپتاستىرعان بولاتىن. كارتوفەلدى ءفريدىڭ الىپ قورابى بەينەسىندە سالىنعان مەكەمە ىشىندە تۇتىنۋشىلار ءۇشىن جاعدايدىڭ ءبارى جاسالعان. فەست-فۋد ونىمدەرىنەن بولەك بوۋلينگ ورىندارى, مۇز ايدىنى مەن ويىن اۆتوماتتارى دا بار. McDonald's قىزمەتكەرلەرى بۇل مەكەمەنىڭ الداعى ۋاقىتتا قازىرگىسىنەن الدەقايدا كەڭ كولەمدى ەتىپ سالىناتىنىن مالىمدەپ, جەرگىلىكتى حالىقتى قۋاندىردى. ونىڭ جالپى اۋدانى 1750 شارشى مەتردى قۇرايتىنى بەلگىلى بولدى. مامانداردىڭ ايتۋىنشا, جاڭا ورىن وسى جىلدىڭ اقپان ايىندا اشىلادى. ايتا كەتەيىك, McDonald's كومپانياسىن العاش رەت 1940 جىلى اقش-تىڭ كاليفورنيا شتاتىندا سان-بەرناردينو قالاسىندا اعايىندى ديك جانە ماك ماكدونالدتار اشقان. 1948 جىلى الەمدە ەڭ ءبىرىنشى بولىپ «جىلدام تاماقتانۋ» كونتسەپتسياسىنىڭ پرينتسيپتەرىن ۇسىنعان. ايان ءابدۋالي. دەرەك, سۋرەت: تاسس.