پاۆلودارلىق ستۋدەنتتەر حالىقارالىق جارىستا توپ جاردى

پاۆلودار. 2 قاڭتار. پاۆلودارداعى سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتىنىڭ ستۋدەنتتەرى تاشكەنتتە وتكەن كلاسسيكالىق پاۋەرليفتينگ جانە زىلتەمىردى كوتەرۋدەن جارىستا چەمپيون اتاندى. بۇل تۋرالى egemen.kz ءتىلشىسى حابارلايدى. بۇل سايىستا قازاقستان, وزبەكستان, تاجىكستان, سينگاپۋر, قىرىعزستان, يندونەزيا, اراب امىرلىگى, تۇرىكمەنستان, اۋعانستان سىندى ازيا قۇرلىعى مەملەكەتتەرىنەن 500 سپورتشى باپتارى مەن باقتارىن سىنادى. سۇلتانماحمۇت تورايعىروۆ اتىنداعى ۋنيۆەرسيتەتتىڭ مەتاللۋرگيا, ماشينا جاساۋ جانە كولىك فاكۋلتەتىنىڭ ستۋدەنتى, پاۋەرليفتينگ بويىنشا سپورت شەبەرى ەرنۇر حايلياموۆ 59 كيلوعا دەيىنگى سالماق دارەجەسىندە 497,5 كەلىنى كوتەرىپ, ءبىرىنشى ورىندى ەنشىلەدى. سونىمەن قاتار, ول حالىقارالىق دەڭگەيدەگى سپورت شەبەرى اتاعىن الدى. ال حيميالىق تەحنولوگيالار جانە جاراتىلىستانۋ فاكۋلتەتىنىڭ ءبىرىنشى كۋرس ستۋدەنتى ءاليا تولەگەنوۆا زىلتەمىردى كوتەرۋدەن ەلىمىز قۇراماسىنىڭ قورجىنىن كۇمىس مەدالمەن تولىقتىردى. فاريدا بىقاي. دەرەك, سۋرەت: egemen.kz.