تاۋەلسىزدىك تۇعىرى بەكي بەرسىن!

– بۇگىندە تىنىشتىق پەن تۇراقتىلىقتىڭ بەسىگىنە اينالعان ەلىمىز ەسەن-امان تاعى ءبىر جىلدى قارسى الدى. ەلباسىمىز نۇرسۇلتان نازارباەۆ زور كۇش-­جىگەرمەن مەملەكەتىمىزدى جا­ھان­دىق داعدارىس جاعدايىنا قار­سى امال-شارعىعا جۇمىل­دىر­دى. جۋىرداعى جولداۋىندا بيۋدجەتتىك قىزمەتكەرلەردىڭ, دارىگەرلەر مەن مۇعالىمدەردىڭ ەڭبەكاقىسىن, قاريالارىمىزدىڭ زەينەتاقىسىن كوتەرەتىنىن ايتتى. بۇل – وسىنداي قيىن كەزەڭدە حالىقتىڭ الەۋمەتتىك جاعدايىنا جاسالعان ۇلكەن قولداۋ. دۇنيە دۇربەلەڭگە تولى. قاي جاققا قاراساڭىز دا جارىلىس, سوعىس, قاقتىعىس, جانىن شۇبەرەككە تۇيگەن بوسقىن جۇرت سىندى جانىڭدى اۋىرتاتىن جايتتاردى كورەسىز. فرانتسياداعى تەراكت, سيرياداعى سوعىس سونىڭ دالەلى. وتتى وشاقتار ازايماي تۇر. قۇداي قوسقان كورشىمىز رەسەي مەن ءتۇبى ءبىر باۋىرىمىز تۇركيانىڭ اراسىنداعى سالقىندىق تا گەوساياساتتىڭ ءزىلماۋىر سالماعىن تارازىلاي تۇسكەندەي. پرەزيدەنتىمىز پاراساتتى پايىمىمەن ەكى ەلدىڭ اراسىندا دانەكەر بولىپ ءجۇر. بىتىمگەرشىلىك ميسسياسىنىڭ ەلىمىزگە جۇكتەلەتىنى دە بەكەر ەمەس. ءبىز بەيبىتسۇيگىش ەلگە, ءبىتىستىرۋشى ەلگە اينالدىق! سوندىقتان, قارجىلىق داعدارىس, ەكونوميكالىق قيىندىقتار بولا بەرەدى. ەڭ باستىسى, ەل ىرگەسى ءبۇتىن بولسىن دەگىم كەلەدى. ەسكى جىلعا وكپە جوق. ءبىزدىڭ سەمەي قالاسىنداعى اباي اتىن­داعى تەاترىمىز ءۇشىن تابىس­تى جىل بولدى. ونەر وڭىرىمىزبەن بىرگە ورىستەپ, وركەندەپ كەلەدى. مىسالى, بيىل ابايدىڭ 170 جىلدىق مەرەيتويىنا ارناپ مۇحتار اۋەزوۆتىڭ «اباي» تراگەديالىق دراماسىن قويدىق. بۇل سپەكتاكل 30 جىلدان كەيىن قايتا ورالىپ وتىر. 1975 جىلى قويىلعان سپەكتاكل ساحنادا ون جىل جۇرگەن ەدى. مەن وسى قويىلىمدا باستى وبرازدى 40 جىل بۇرىن ويناعان ەكەنمىن. 40 جىلدان سوڭ تاعى دا اباي بەينەسىن سومدادىم. ەڭ باستى جاڭالىق, مەملەكەت باسشىسىنىڭ قولداۋىمەن شىعىس وڭىرىندە ۇلكەن تەاتر عيماراتى سالىندى. ونىڭ سالتاناتتى اشىلۋىنا ەلباسىنىڭ ءوزى قاتىسىپ, شىعارماشىلىق ۇجىمعا شابىت تىلەدى. قازاق حاندىعىنىڭ 550 جىلدىعىنا وراي جەرگىلىكتى اۆتورىمىز ايبەك تولەۋحاننىڭ «كەرەي حان-حان جانىبەك» اتتى شىعارماسىن ساحنالادىق. بۇل قويىلىم بيىل قىركۇيەك ايىندا وسكەمەندەگى جاڭا وبلىستىق دراما تەاترىندا وتكەن ەلىمىزدىڭ تەاترلار فەستيۆالىندە باس جۇلدەنى جەڭىپ الدى. تەاترىمىز ەلىمىزبەن بىرگە ەرتەڭگى كۇنگە سەنىممەن قاراپ, العا قاراي نىق قادام باسىپ كەلەدى. 2016 جىلى تاۋەلسىزدىگىمىزدىڭ 25 جىلدىق مەرەيتويى اتالىپ وتەدى. تاۋەلسىزدىك – ەڭ ۇلى باي­لىعىمىز. مەن ءۇشىن دە بۇل جىل­دىڭ ماڭىزى بار. اللا بۇيىرتسا, سەكسەننىڭ سەڭگىرىنە اياق باسامىن. سوندىقتان, تاۋەل­سىزدىگىمىزدى ۇلىقتايتىن ۇلى ءدۇ­نيەلەردى ۇسىنۋدا تەاتر سالا­سىنىڭ دا تىعىز ءارى جەمىستى جۇمىس ىستەيتىن جىلى بولادى دەپ سەنەمىن. تاۋەلسىزدىگىمىز باياندى بولسىن! بەكەن يماحانوۆ, اكتەر, قازاقستاننىڭ حالىق ءارتىسى.