مىنە, بۇگىن استانا ءسامميتى ءوزىنىڭ شىمىلدىعىن اشادى. ال بۇعان دەيىن الەمنىڭ 56 مەملەكەتىنىڭ باسىن بىرىكتىرگەن الىپ ۇيىم فورۋمىن وتكىزۋ ءۇشىن قاربالاستى جۇمىستار قارقىن الىپ, كوپتەگەن ءىستىڭ تياناعى كەلتىرىلدى. بۇل رەتتە سامميتكە قاتىستى ءاربىر شارالار مەن دايىندىقتاردىڭ, تىپتەن سامميت قوناقتارىنا ارنالاتىن ۇساقتۇيەك زاتتاردىڭ الاتىن ورنى دا ەرەكشە بولدى. ماسەلەن, دۇنيەنىڭ ءار قيىرىنان كەلىپ جەتكەن جوعارى مارتەبەلى قوناقتار ءوز ەلىنە قازاقستان جانە قازاق جۇرتى تۋرالى جاقسى اسەرمەن ورالۋلارى ءۇشىن ولارعا ارنايى ازىرلەنەتىن كادەسىيلاردىڭ دا ءوز ورنەگىمەن, ءوز اسەمدىگىمەن “مەنمۇندالاپ” تۇرعانى جوناق قوي...
وسى ورايدا, ەلىمىزدىڭ قولدانبالى ونەرىنىڭ حاس شەبەرلەرى ءداستۇرلى كادەسىيلارعا سوڭعى ورنەكتەرىن ەنگىزىپ, ال ديزاينەرلەر يميدجدىك ونىمدەر كەسكىنىنىڭ كوز تارتارلىق سيپاتتا بولۋى ءۇشىن بارلىق مۇمكىندىكتەرىن پايدالاندى. ياعني, ەڭ باستىسى, شىعارماشىلىق قابىلەتتى جان-جاقتى كورسەتۋگە بارلارىن سالدى.
ارينە, كادەسىيلاردىڭ نەعۇرلىم ۇلتتىق بوياۋ مەن ۇلتتىق ناقىشقا ساي جاسالۋى ءوز ءىسىنىڭ قىرسىرىن تەرەڭ مەڭگەرگەن قولونەر ماماندارىنىڭ شەبەرلىگىنە بايلانىستى بولارى ءسوزسىز. ۇلتتىق ۇلگىدە تىگىلگەن ادەمى قۋىرشاقتار مەن اعاشتان ويىپ جاسالعان ىدىس-اياق, ويۋ-ورنەكپەن كومكەرىلگەن الاشا, قاسقىر مەن تۇلكى تەرىسىنەن جاسالعان بورىك سىندى بۇيىمداردىڭ كەز كەلگەنى قازاقستانعا كەلگەن ءاربىر قوناقتىڭ نازارىنان تىس قالماسى انىق. شىن شەبەرلەردىڭ قولىنان شىققان كادەسىيلاردىڭ قادىرلى قوناقتار كوڭىلىنەن شىعاتىنىنا وسى سالادا جۇرگەن مامانداردىڭ وزدەرى دە سەنىمدى.
ايناگۇل قۋانعاليەۆا, ديزاينەر:
– ءبىزدىڭ قۋىرشاق-فيگۋرالارىمىزدىڭ ەرەكشەلىگى – ولار قوناقتاردى ەلىمىزدىڭ, استانا قالاسىنىڭ تورىنە شاقىرادى. ماسەلەن, بىزدە كىشكەنتاي كيىز ءۇيدىڭ ءتورى بار. مۇنداي كادەسىيلار, ەڭ الدىمەن, ءبىزدىڭ قوناقجايلىعىمىزدىڭ بەلگىسى ىسپەتتى. ولاردى ء“بىز سىزدەردى شاقىرامىز! ءبىزدىڭ ءتور سىزدەر ءۇشىن ءاردايىم اشىق” دەگەن سوزدەرمەن قازاقستانعا كەلگەن شەتەلدىكتەرگە ۇسىنۋعا بولادى.
روزا ابەنوۆا, كوركەمدىك سالونىنىڭ ارت-ديرەكتورى:
– شەبەر قولدان شىققان قۋىرشاق پىشىندەس كادەسىيلاردىڭ بۇكىل الەمگە تارايتىنىن, سول ارقىلى جات ەل جۇرتشىلىعىنىڭ قازاق قىز-كەلىنشەكتەرى مەن جىگىتتەرىنىڭ وزدەرىنە ءتان ەرەكشەلىكتەرى مەن سىر-سىمباتى تۋرالى دا بىلەتىنىن ىشتەي سەزىنۋدىڭ ءوزى كوڭىلگە جىلىلىق ۇيالاتادى ەكەن. سوندىقتان, مۇنداي كادەسىيلاردىڭ قاي-قايسىسى بولسىن بەدەلدى ۇيىمنىڭ استانادا باستالىپ وتىرعان سامميتىنە كەلگەن جوعارى لاۋازىم يەلەرىنە, مەيماندارعا جاقسى اسەر قالدىرىپ, ولار ءبىزدىڭ ونىمدەرىمىزدى جىلى قابىلدايدى دەپ سەنەمىن.
“استانا قالاسىنىڭ كاسىپكەرلىك جانە ونەركاسىپ باسقارماسى” مم باستىعىنىڭ ورىنباسارى رىسگۇل قاۋعاباەۆانىڭ ايتۋىنشا, سامميت قارساڭىنداعى ءىس-شارالاردىڭ ارقايسىسى جوعارى دەڭگەيدە ۇيىمداستىرىلعان كورىنەدى. “ماسەلەن, “استانا قالاسىنىڭ كاسىپكەرلىك جانە ونەركاسىپ باسقارماسى” مەملەكەتتىك مەكەمەسى سىرتىندا OSCE Kazakhstan 2010 دەگەن جازۋى بار كىشكەنتاي قوراپشالاردى قوناقتارعا سىيعا تارتپاق نيەتتە ەكەن. بۇل قوراپشالاردىڭ ارقايسىسىندا قازاقستاننىڭ تۋى بەينەلەنگەن 4 كونفەت بولادى. ولاردىڭ بارلىعى دا وتاندىق كونفەت ءوندىرۋشى فيرمالاردىڭ ونىمدەرى. ياعني, قوناقتار جايعاسقان قوناقۇيلەردىڭ بارلىعىندا دا وسىنداي كادەسىيلاردى كەزدەستىرۋگە بولادى. مۇنداي كادەسىي قوراپشالارىنىڭ جالپى سانى 6 مىڭدى قۇرايدى. كونفەت پىشىندەس كادەسىيلار قوناقۇيلەردىڭ ءاربىر بولمەسىندە بولادى. سونداي-اق, ەلورداداعى مەيرامحانالاردا دا قوناقتارعا “شىعىس تاتتىلەرى”, مەيرامحانالاردىڭ وزدەرىنىڭ بوكال, كرۋجكا سەكىلدى يميدجدىك ونىمدەرى, ۇلتتىق ناقىشتا جاسالعان كادەسىيلارى ۇسىنىلماق”, – دەيدى رىسگۇل بورانبايقىزى.
ەلورداداعى “استانا ءوندىرىسى” جشس دە بۇل شارادان سىرت قالماپتى. ماسەلەن, سىرتىندا ەقىۇ مەن ونىڭ ءسامميتىنىڭ لوگوتيپى بەينەلەگەن ايران, ىرىمشىك سەكىلدى ءسۇت ونىمدەرىنىڭ قۇتىلارى دا ەلىمىزدەگى مەكەمەلەردىڭ بۇل شاراعا بەي-جاي قاراماعاندىقتارىنىڭ بەلگىسىندەي كورىنەدى.
ەستەلىك كادەسىيلار – رەسمي ەمەس سىيلىقتار. سول سەبەپتى ديزاينەرلىك ستۋديالاردا ءسامميتتىڭ لوگوتيپىن عانا ەمەس, سونداي-اق, قازاقستاندا وتەتىن اۋقىمدى ءىس-شارانى ايشىقتايتىن زاتتاردىڭ, ماسەلەن, سىيلىق تۇرىندەگى پورتفەلدەردىڭ, پاپكالار مەن بيلبوردتارعا ارنالعان قالامساپتاردىڭ نۇسقالارى ازىرلەنبەك. دەمەك, سامميتكە كەلگەن ءاربىر قاتىسۋشى كوپتەگەن مازمۇندى مالىمەتتەرى بار ەقىۇ-نىڭ ارنايى سيمۆوليكاسى بەينەلەنگەن پاپكالاردى عانا ەمەس, سونداي-اق, قازاقستان ەلورداسى – استانا “جاۋھارلارى”, ونىڭ ىشىندە ەلوردانىڭ ەڭ تاڭداۋلى, بەتكە ۇستار دەگەن قوناقۇيلەرى جونىندە قىسقاشا اقپاراتتار جازىلعان انىقتامالىقتارمەن دە تانىسا الادى.
دۇنيە جۇزىندەگى ەڭ بەدەلدى ۇيىمداردىڭ بىرىنە توراعالىق ەتۋ ارقىلى ءوزىن ءدۇيىم الەمگە تانىتۋعا ۇمتىلعان قازاقستان جانە ونىڭ ۇلتتىق ەرەكشەلىگى تۋراسىندا جان-جاقتى ماعلۇماتتارى بار ديسكىلەر دە سامميت قوناقتارىنا تابىس ەتىلمەك. ال ءدۇيىم دۇنيە ديدارىن وزىنە قاراتاتىن شارانىڭ باسى-قاسىندا جۇرگەن جانداردىڭ نازارىنان استانا قالاسى كارتاسىنىڭ كورىنىسىن دايىنداۋ دا سىرت قالماپتى. ول كارتا ەقىۇ-نىڭ ەكى جۇمىس تىلدەرى – اعىلشىن جانە ورىس تىلدەرىندە مالىمەت بەرەدى.
ءبىر اتاپ وتەرلىگى, سامميتكە قاتىستى ارنايى رەسمي, ياعني باسپا ونىمدەردى ءوندىرۋ كەزىندە ەشقانداي دا اۋەسقويلىققا جول بەرىلمەيدى ەكەن. ياعني, سامميت لوگوتيپىنىڭ ءوزى سىرتقى ىستەر مينيسترلىگى بەكىتكەن ۇلگىلەرگە سايكەس جاسالعان. سونىمەن قاتار, بۇل زاتتاردىڭ باستى ەرەكشەلىگى – ولاردا, ەڭ الدىمەن, قازاقستان توراعالىعىنىڭ لوگوتيپى مەن ەلىمىزدىڭ سيمۆولدارى, ونىڭ ىشىندە تۋ ەلەمەنتتەرى ايشىقتى تۇردە بەزەندىرىلگەن. تاعى ءبىر ەسكەرەرلىگى, لوگوتيپ تەك قاعاز بەتىندە عانا ەمەس, سونداي-اق پلاستيك زاتتارى مەن بىلعارىدان جاسالعان ونىمدەردە دە كورىنىس تاپقان.
ەلىمىزدىڭ, قازاقستان ەلورداسى – استانانىڭ اتىن ايداي الەمگە تانىتاتىن مەزەت تە كەلىپ جەتتى. قازاق قاشاندا قوناقجاي قاسيەتىمەن تانىلعان حالىق. دەمەك, سول قاسيەتىن بارىنشا كورسەتىپ, ەلىمىزدىڭ بار بولمىسىمەن تانىلار تۇسى دا وسى ءسات بولسا كەرەك.
ارينە, ەشكىم ەشكىمگە وڭايلىقپەن سەنىم بىلدىرمەيدى. مەملەكەت باسشىسى نۇرسۇلتان نازارباەۆتىڭ: “وسى تاريحي مىندەتتى جاقسىلاپ وتكىزۋ, ەلدىڭ ەسىندە قالاتىنداي بولۋ, ءوزىمىزدىڭ, استانانىڭ, مەملەكەتتىڭ سونداي ءسامميتتى وتكىزۋ قابىلەتى بار ەكەنىن ءبىلدىرۋ كەرەك. بۇل تاعى دا ءبىزدىڭ ەلدىڭ دارەجەسىن كوتەرەدى, قازاقستاندى دۇنيە جۇزىنە بەلگىلى ەتەدى”, – دەگەن ءسوزى بارشا حالىققا ۇلكەن سەنىم ارتىپ وتىرعانىنىڭ بەلگىسى. سەبەبى, وزىنە اسقان جاۋاپكەرشىلىكپەن العان بۇل شارانى ۇلكەن ابىرويمەن اتقارىپ شىعۋ – ەلدىگىمىزگە سىن. سوندىقتان وعان قاتىستى كەز كەلگەن ءىس-شارا ءساتتى جۇزەگە اسقان سايىن قازاقستاننىڭ الەم الدىنداعى بەدەلى دە كوتەرىلە تۇسپەك.
ءلايلا ەدىلقىزى.
