استانانى ايشىقتاعان “يمستالكوم”

قاراعاندىدا “يمستالكوم” اتالاتىن زاۋىت بار. ونى اسىرەسە, استاناداعى قۇرىلىس ۇيىمدارى جاقسى بىلەدى. مۇن­دا شىعارىلاتىن مەتالل قۇرىلعىلارىنا قاي-قايسىسى دا تالاسا الادى. ءبىرازى كۇنى بۇرىن قام جاساپ, تاپسىرىس بەرىپ قويادى. ويتكەنى جان-جاقتان سۇرانىستىڭ كوپتىگىنەن ءبۇيت­پەسە كەيدە كەرەكتى زاتتارعا قول جەتپەي قالۋى ءمۇم­كىن. سوندىقتان الدىن-الا ۋاعدالاستىق سەنىمدى. ادەتتە بۇ­لار ەلوردادا ەڭ ءساندى قۇرىلىس سالۋشىلار بولىپ تابىلادى. وسىلاي بولعان سوڭ “يمستالكومنىڭ” قولتاڭباسى بىردەن بايقالاتىن عيماراتتار از ەمەس. ماسەلەن, جاقىندا قۇراستىرىلۋى اياقتالعان ەسىلدىڭ ۇستىنەن وتەتىن كۇيگەنجار تۇسىنداعى كوپىر سونىڭ ءبىرى. كوپشىلىك بىلە ءجۇرۋى ءۇشىن ايتالىق, ونى مونتاجداۋدا بۇرىنعىسىنشا بەرىكتىرۋگە بۇراندالار پايدالانۋ ورنىنا تۇتاستاي دانەكەرلەنىپ شىققان. وسى ءتاسىلدى ەلىمىزدە ءبىرىنشى رەت قولدانىپ, ىسكە اسى­رۋشى “يمستالكوم-تەمىرتاۋ” كاسىپورنىنىڭ قۇراس­تى­رۋشىلارى بۇل ارقىلى كوپىر بەرىكتىگىن ءتىپتى بەكەم قىلعان. كوپىر دەمەكشى, اتالعان زاۋىت ونىمدەرى العاش رەت سەمەي­دەگى كوپىردى سالۋدا تانىلىپ, تالاپشىل, تالعامپاز جاپون مونتاجشىلارىنىڭ وكپە-رەنىشتەرى بولعان جوق. سودان كەيىن ەسىلدىڭ ەكى جاعالاۋىن جالعاستىرعان قازىرگى بەلگىلى كوپىر قاڭقاسى دا قاراعاندى مەتالل قۇرىلعى­لارىنان ءورىلدى. بۇگىندە استانا تورىندە اسقاقتاعان “بايتەرەك”, “قازاق ەلى” ەسكەرتكىشى, اۋەجاي, بيزنەس ورتالىعى سياقتى نىسان­داردىڭ دا نەگىزىن “يمستالكومدا”, جاسالعان قۇرىلعىلار قۇرايدى. ەندى كاسىپورىن تاعى ءبىر ءىرى قۇرىلىسقا قاتىسۋدا. ازيادا – 2011 ويىندارىندا حوككەيشىلەر كۇش سىناساتىن جابىق مۇز ايدىنىنىڭ مەتالل قۇرىلعىلارىن جاساۋ جانە قۇراستىرۋ كاسىپورىن ەنشىسىنە تيگەن. – زاۋىتىمىزدىڭ كۇش-قۋاتى جىلدان جىلعا ارتىپ كەلەدى. بۇعان ءبىر جاعىنان استانا ۇلكەن سەپ بولىپ وتىر. تاپسىرىس كوپ. ءونىم ءوتىمدى بولسا, ودان ارتىق نە كەرەك. سول مۇمكىندىكتى پايدالانۋعا ۇمتىلىستامىز. سوعان وراي كاسىپورىندى تەح­نيكالىق جاڭارتۋعا جىل سايىن 1,5 ميلليارد تەڭگە بولىنەدى. قاي­تارىمى جامان ەمەس, – دەيدى “يمستالكوم” قاراعاندى مە­تالل كونسترۋكتسيالارى زاۋىتى” جشس ديرەكتورى مارات جاحين. كوز ­الدىمىزدا كوركەيۋى جىلدام باس شاھاردىڭ شاپاعاتى ارقاسىندا وسىناۋ ءوندىرىس وشاعىنىڭ قۇلاشى كەڭگە سەرمە­لىپ بارادى. استاناداعى قۇرىلىس قانات جايعان سايىن تابىسى تولىمدى, قادامى الىمدى. ول سونى ارقالانادى. ايقىن نەسىپباي, قاراعاندى.