ونىڭ اشىلۋ راسىمىندە وبلىس اكىمىنىڭ ورىنباسارى سەرىك سۇلەيمەن ەلباسى تاپسىرماسىنا سايكەس جاڭا ءبىلىم عيماراتىنىڭ اشىلىپ وتىرعانىن ايتىپ, مەكتەپ-گيمنازياعا “گازەل” اۆتوكولىگىن تارتۋ ەتتى. “التاير” جشس سالعان مەكتەپ-گيمنازيا قۇرىلىسىنا 800 ميلليونداي تەڭگە جۇمسالعان. 300 ادام جۇمىسقا تارتىلسا, 100-ءى – جەرگىلىكتى تۇرعىندار. نەگىزىنەن ءبىر جىلعا جوسپارلانعان جۇمىس سەگىز ايدا اياقتالعان. زاماناۋي ۇلگىدە سالىنعان جاڭا ءبىلىم ورداسىنا 250 بالا قابىلدانسا, ونىڭ 20-سى شاعىن ورتالىققا, 20-سى مەكتەپالدى دايارلىققا بارماق. مۇنداعى بۇلدىرشىندەر بولاشاقتا ىستىق تاماقپەن قامتىلاتىن بولادى.
تەمىر قۇسايىن, ورال.
قايىرىمدىلىق اكتسياسى جالعاستى. بىلتىر “مەكتەپكە جول”, “اسار” رەسپۋبليكالىق قايىرىمدىلىق شارالارى بارىسىندا وقۋشىلارعا 46,9 ميلليون تەڭگەنىڭ وقۋ قۇرالدارى مەن كيىم-كەشەكتەرى اپەرىلسە, بيىل دا جان-جاقتى كومەك جاساۋ قاراستىرىلدى. اكتسيالار اياسىندا 900-دەي رەيدتەر ۇيىمداستىرىلىپ, از قامتىلعان, كوپ بالالى وتباسىلاردىڭ, ءتارتىبى مەن وقۋ-ۇلگەرىمى تومەن جاسوسپىرىمدەردىڭ ەسەبى الىندى. ءبىر مىڭنان استام بالاعا وقۋ قۇرالدارى سىيعا تارتىلدى. مەكەمە-ۇيىمدار 73 وقۋشىنى ءوز قامقورلىقتارىنا الاتىن بولدى. وسىناۋ يگى ىسكە “نۇر وتان” حدپ جەرگىلىكتى فيليالى دا بەلسەنە اتسالىستى. ماسەلەن, “جاس وتان” جاستار قاناتى 10 وقۋشىعا كومەكتەسۋدى ءوز مىندەتىنە الدى. ال, “قارىنداش”, “شكولنيك”, “ابدي-كومپانيا” سەكىلدى كىتاپ دۇكەندەرى جارمەڭكەلەر وتكىزىپ, ءوز ونىمدەرىن ارزان باعاعا ۇسىندى. دەمەۋشىلەر قاتارىندا “فرەگات”, “سۇلتان”, “ماسلودەل”, تاعى باسقا فيرمالار بار.
ءومىر ەسقالي, سولتۇستىك قازاقستان وبلىسى.
ايقاسقان قۇشاقتار قۇرىشتاي بەرىك. وبلىستاعى ەتنو-مادەني ورتالىقتار كونستيتۋتسيا كۇنى مەرەكەسىن بىرگە اتاپ ءوتۋدى بەرىك ۇردىسكە اينالدىرعان. وسىمەن 15-ءشى رەت ءداستۇرلى فەستيۆالعا جينالعان ولار ستانيسلاۆسكي اتىنداعى ورىس دراما تەاترى ساحناسىنان ءوز ۇلتتارىنىڭ ءانىن شىرقاپ, ءبيىن بيلەپ, سالت-عۇرىپتارىن كورسەتىپ, كەلۋشىلەردى اسەم اسەرگە بولەدى. اتا زاڭنىڭ قابىلدانۋىمەن تۇسپا-تۇس دۇنيەگە كەلگەن بۇل ونەر بايقاۋىنا قاتىسۋشىلار باستاپقىدا ساناۋلى عانا بولسا, وسى جولى قاتارى 27-گە جەتتى. اسىرەسە, اباي, بۇقار جىراۋ, نۇرا اۋداندارى ونەرپازدارى كوزگە ءتۇستى. فەستيۆال مەيماندارى سونداي-اق ءتۇرلى ەتنوستار وكىلدەرىنىڭ شىعارماشىلىق ىزدەنىستەرىن قىزىقتاۋمەن قوسا, “دوستىق شاڭىراعى” تاقىرىبىندا ۇيىمداستىرىلعان جارمەڭكەگە قويىلعان ۇلتتىق قولونەر, تاعام ۇلگىلەرىمەن تانىستى.
ايقىن نەسىپباي, قاراعاندى.
بۇلدىرشىندەردىڭ سيقىرلى الەمى. وبلىس ورتالىعىنداعى تۇرار رىسقۇلوۆ اتىنداعى دەمالىس ساياباعىندا وبلىستىق توتەنشە جاعدايلار دەپارتامەنتى قىزمەتكەرلەرىنىڭ بالالارى مەن نەمەرەلەرىنىڭ اسفالت بەتىنە سالعان سۋرەتتەرى بويىنشا كونكۋرس بولىپ ءوتتى. كونكۋرس تاقىرىبى دا سابيلەر ءۇشىن ەرەكشە قىزىقتى – اتا زاڭ اياسىندا دەپ اتالدى. كونكۋرسقا قاتىسقان ءاربىر ءبۇلدىرشىن ءوز قيالىنداعى اتاجۇرتى – قازاق ەلىن ءار قىرىنان بەينەلەگەن. سوندىقتان اسفالت ۇستىنە ءتۇرلى-ءتۇستى بورمەن سالىنعان ايشىقتى بەينەلەردەن ولاردىڭ وتان-اناسىنا دەگەن جۇرەكجاردى سەزىمدەرى انىق اڭعارىلىپ تۇردى. بالالار, اسىرەسە, ءزاۋلىم عيماراتتار, اعىلعان اۆتوكولىكتەر, سونداي-اق, جاسىل جايلاۋ مەن اقشاڭقان كيىز ءۇي, اسپان استىندا قالىقتاي قانات قاققان قىران سياقتى سۋرەتتەردى سالعاندى ۇناتادى ەكەن.
كوسەمالى ساتتىباي ۇلى, جامبىل وبلىسى.
سەمەي الدىڭعى قالالار قاتارىندا. جۋىردا رەسپۋبليكالىق دارەجەدەگى قۇزىرلى ورگاندار ۇستىمىزدەگى جىلدىڭ العاشقى جارتىجىلدىعىنىڭ قورىتىندىسىن شىعاردى. وندا بيۋدجەتتىڭ ورىندالۋى, جۇمىسسىزدىق دەڭگەيىنىڭ تومەندەپ, جاڭادان جۇمىس ورىندارىنىڭ اشىلۋى, بىرىڭعاي ۇلتتىق تەستىلەۋ ناتيجەسى سەكىلدى 25 باستى كورسەتكىش نەگىزگە الىندى. سول بويىنشا سەمەي قالاسى اقتوبە, پاۆلودار, تالدىقورعان, ورال, اتىراۋ, قىزىلوردا سەكىلدى وبلىس ورتالىقتارى قاتارىندا ءبىرىنشى كاتەگورياعا, ياعني دامۋ قارقىنى جوعارى قالالار قاتارىنا وتكىزىلدى. سەمەيدىڭ وسىمەن ەكىنشى رەت الدىڭعى قالالار قاتارىنان تابىلۋى, ارينە, سۇيسىنەرلىك ءجايت. وتانىمىزداعى بارلىعى 200-دەي قالانىڭ ىشىنەن توپ جارۋ سەمەيدىڭ بولاشاعىنان ۇلكەن ءۇمىت كۇتتىرسە كەرەك.
داۋلەت سەيسەن ۇلى, سەمەي.
سولتۇستىك مۇنايشىلار مەرەيتويى. وبلىس ورتالىعىندا ورنالاسقان “قازترانسويل” اكتسيونەرلىك قوعامىنىڭ باتىس ءسىبىر جانە قازاقستان مۇنايىن قۇبىر ارقىلى تاسىمالدايتىن شىعىس فيليالىن ەلىمىزدەگى وسى سالانىڭ جۇرەگى دەپ تە اتايدى. سونىمەن قاتار, بۇل بولىمشە ەلىمىزدىڭ ىشكى نارىعىنداعى پاۆلودار, شىمكەنت مۇناي وڭدەۋ زاۋىتتارىنا ۇزدىكسىز جىبەرىلەتىن مۇناي تاسىمالىمەن اينالىسادى. وتكەن اپتادا مۇنايشىلار وبلىس ورتالىعىنداعى كەڭ سارايدا قۇبىرمەن مۇناي تاسىمالداۋ سالاسىنىڭ 75 جىلدىق مەرەيتويىن اتاپ ءوتتى. جينالعانداردى وبلىس اكىمى باقىتجان ساعىنتاەۆ قۇتتىقتادى. مەرەكەگە وسى سالادا ەڭبەك ەتكەن اعا ۇرپاق وكىلدەرى, بۇگىنگى جاس ماماندار قاتىستى. مۇنايشىلار العىس حاتتارمەن, سىيلىقتارمەن ماراپاتتالدى. كەش سوڭى روزا رىمباەۆانىڭ كونتسەرتىنە ۇلاستى.
فاريدا بىقاي, پاۆلودار.
ەكى سۋبۇرقاق ىسكە قوسىلدى. وسكەمەندە قالا مەرەكەسى قارساڭىندا تاعى ەكى سۋبۇرقاق پايدالانۋعا بەرىلدى. ونىڭ ءبىرى – ەرتىس وزەنى جاعالاۋىندا, ال ەكىنشىسى ءۇلبى كوپىرى ۇستىندە ورنالاسقان. جاقىن ارادا تاعى ەكى سۋبۇرقاق ىسكە قوسىلماق. قازىر وسكەمەندىكتەر قىركۇيەكتىڭ 6-7-سىندە قازاقستان مەن رەسەي باسشىلارىنىڭ قاتىسۋىمەن وتەتىن ءوزارا ىنتىماقتاستىق فورۋمىنا ازىرلىكتەرىن اياقتاپ قالدى. قالا كوشەلەرىنە اسفالت توسەلىپ, وزگە دە جوندەۋ جۇمىستارى جۇرگىزىلدى. ن.نازارباەۆتىڭ ينتەللەكتۋالدى مەكتەبى دە سالتاناتتى جاعدايدا اشىلدى. 250 ورىندىق بالاباقشا قالا تۇرعىندارى دەمالاتىن ورىندار دا ءوز ەسىگىن ايقارا اشتى.
وڭداسىن ەلۋباي, وسكەمەن.
