سەنىمدى قۇقىقتىق ىرگەتاس

قايرات ءمامي, قازاقستان رەسپۋبليكاسىنىڭ باس پروكۋرورى. قازاقستان كونستيتۋتسياسى – مەملەكەت پەن قوعامنىڭ قىزمەت ەتۋى ءۇشىن قاجەتتى شارتتاردى انىقتايتىن نەگىزگى نورمالار مەن ينستيتۋتتار بەكىتىلگەن ەلىمىزدىڭ ءرامىزى جانە باستى ساياسي-قۇقىقتىق قۇجاتى. قازاقستاننىڭ مەملەكەتتىك-قۇقىقتىق قۇرىلىسىنىڭ وتكەن كەزەڭدەرى 1995 جىلعى 30 تامىزدا بۇكىلحالىقتىق رەفەرەندۋمدا قابىلدانعان ءبىزدىڭ مەملەكەتىمىزدىڭ اتا زاڭى قازاقستاننىڭ قارقىندى ساياسي, ەكونوميكالىق جانە الەۋمەتتىك دامۋىنىڭ سەنىمدى قۇقىقتىق ىرگەتاسىنا اينالعانىن كورسەتىپ وتىر. قازاقستاننىڭ قوعامدىق قاتىناستاردىڭ كوپتەگەن سالالارىندا قول جەتكىزگەن جەتىستىكتەرى ەگەمەن ەلىمىزدىڭ قالىپتاسۋى جولىنداعى قيىندىقتاردى ەڭسەرۋگە عانا ەمەس, سونىمەن قاتار ونىڭ حالىقارالىق-قۇقىقتىق بەدەلىن ايتارلىقتاي كۇشەيتۋگە مۇمكىندىك بەردى. مەملەكەت باسشىسىنىڭ حالىقارالىق دەڭگەيدەگى ساياسي باستامالارىنىڭ ءتيىمدى جۇزەگە اسىرىلۋى, سونداي-اق قازاقستاننىڭ   ەقىۇ-عا توراعالىق ەتۋى ءبىزدىڭ مەملەكەتىمىزدىڭ الەمدىك قاۋىمداستىقتاعى جوعارى بەدەلىنىڭ سالماقتى دالەلدەرىنىڭ ءبىرى بولىپ وتىر. اتا زاڭنىڭ قاعيدالارىن ىسكە اسىرۋدا مەملەكەت اتىنان زاڭدىلىقتىڭ ساقتالۋىنا جوعارى قاداعالاۋ جۇرگىزەتىن پروكۋراتۋرا ورگاندارىنا ەرەكشە ءرول بەرىلگەن. مۇنداي جاعدايدا قازاقستان پروكۋراتۋراسى قۇقىقتىق قاتىناستىڭ ءارتۇرلى سۋبەكتىلەرىنىڭ قۇقىقتارىن قورعاۋدى جۇزەگە اسىرىپ,  سونداي-اق وسى باعىتتاعى قۇقىق قورعاۋ ورگاندارىنىڭ ءىس-ارەكەتىن ۇيلەستىرە وتىرىپ,  زاڭدىلىق پەن قۇقىق ءتارتىبىن قامتاماسىز ەتۋگە باعىتتالعان بارلىق قاجەتتى شارالاردى قابىلداۋدا. سونىمەن قاتار ادام مەن ازاماتتىڭ كونستيتۋتسيالىق قۇقىقتارى مەن بوستاندىقتارىن قورعاۋ پروكۋرورلىق قاداعالاۋدىڭ باسىم باعىتى بولدى جانە وسىلاي بولىپ قالا بەرەدى. كونستيتۋتسيا ءرولىنىڭ جانە ماڭىزىنىڭ نىعايۋى – قۇقىقتىق دامۋدىڭ زاڭدى بەتالىسى. مەملەكەتتى قالىپتاستىرۋ مەن نىعايتۋ ىسىنە ءوزىمىزدىڭ ۇلەسىمىزدى قوسا وتىرىپ, كونستيتۋتسيانىڭ الەۋەتىن, مەملەكەتتىڭ قۇقىقتىق ساياساتىنىڭ نەگىزگى باعىتتارىن ىسكە اسىرۋ جونىندەگى جۇمىستى جۇيەلى جانە ماقساتتى تۇردە جالعاستىرۋ قاجەت. وسى ايتۋلى كۇنى قازاقستاندىقتاردى اتا زاڭىمىزدىڭ مەرەيتويىمەن قۇتتىقتايمىن جانە بارلىعىنا زور دەنساۋلىق, مول باقىت, اماندىق تىلەيمىن. وتانىمىز قازاقستان وركەندەپ, گۇلدەنە بەرسىن!