مەرەيلى مەرەكەگە جازۋشىنىڭ قىزدارى بايان, جاننا, نەمەرە-جيەندەرى, سونداي-اق بەلگىلى ءمۇسىنشى شوتا-امان ءۋاليحان, قازاقتىڭ تانىمال اقىن-جازۋشىلارى تۇرسىنبەك كاكىشەۆ, كاكىمبەك سالىقوۆ, نۇرعوجا وراز, دۋلات يسابەكوۆ, بايانعالي ءالىمجان, قۇلبەك ەرگوبەك, ادىلعازى قايىربەكوۆ, عالىم جايلىباي, پارلامەنت ءماجىلىسىنىڭ دەپۋتاتى جاراسباي سۇلەيمەنوۆ, رەسەيدىڭ كورشىلەس وبلىستارىندا تۇراتىن اعايىندارىمىز ارنايى كەلدى. اتاقتى ءسوز زەرگەرىنىڭ رۋحىنا تاعزىم ەتۋ پەتروپاۆل قالاسىنداعى ەسكەرتكىشىنە گۇل شوقتارىن قويىپ, مۇراجايىن ارالاۋدان باستالدى. سوسىن ونىڭ ەسىمىمەن اتالاتىن قازاق سازدى-دراما تەاترىندا “بالۋان شولاق پوۆەسى بويىنشا دۋلات يسابەكوۆ جازعان “جاۋجۇرەك” پەساسى قويىلدى. سالتاناتتى ءىس-شارا سابەڭنىڭ تۋعان جەرىندە جالعاستى. جۇرتشىلىق اقىندار ايتىسىن, ءمۇشايرانى, ۇلتتىق سپورت تۇرلەرىن قىزىعا تاماشالادى. مەرەكە “دالا جۇلدىزدارى” اتتى شىعارماشىلىق ۇجىمداردىڭ گالا كونتسەرتىمەن قورىتىندىلاندى.
ءومىر ەسقالي. سولتۇستىك قازاقستان وبلىسى
“جول كارتاسى” جەمىسىن بەرۋدە. ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىحالىقوۆا بۇلاندى جانە بۋراباي اۋداندارىندا بولىپ, “جول كارتاسى” باعدارلاماسى شەڭبەرىندە اتقارىلىپ جاتقان جۇمىستاردىڭ جاي-جاپسارىمەن تانىستى. وبلىستا جاڭادان سالىناتىن جانە كۇردەلى جوندەۋدەن وتكىزىلەتىن 123 نىسان بەلگىلەنگەن. بۇل جۇمىستاردى اتقارۋعا “جول كارتاسى” باعدارلاماسى بويىنشا 6 ميلليارد تەڭگەدەن استام قارجى ءبولىنىپ, ەكى مىڭنان استام ادام جۇمىسقا تارتىلدى. مينيستر بۇلاندى اۋدانىنىڭ ورتالىعىنداعى قارتتار ءۇيى مەن قۇيۋ-مەحانيكالىق زاۋىتىنداعى وڭ ىستەرگە ريزالىق ءبىلدىردى. “جول كارتاسى” باعدارلاماسىنىڭ شاراپاتىمەن الەۋمەتتىك نىساندى كۇردەلى جوندەۋگە بيىل 18 ميلليون 640 مىڭ تەڭگە جۇمسالىپ, 23 ادام جۇمىسقا تارتىلعان. ال زاۋىتتا 15 جاس تەحنيكالىق ماماندىقتى يگەرىپ, كاسىپورىننىڭ كادر ساياساتىن جاقسارتقان. ءدال وسىنداي جاقسى ۇمتىلىس “جالايىر-بۇلاندى” جيھاز كاسىپورنىنىڭ تابىس باسپالداقتارىن بيىكتەتىپ وتىر. گۇلشارا ابدىحالىقوۆا, سونداي-اق بۋراباي اۋدانىنداعى 115 ءبۇلدىرشىن تاربيەلەنەتىن “اينالايىن” جەكەمەنشىك بالاباقشاسىندا, “زەلەنىي بور” مەكتەپ-گيمنازياسىندا بولىپ, مۇنداعى جاقسى تاجىريبەنى قولداۋ قاجەتتىگىن اتاپ ءوتتى.
باقبەرگەن امالبەك. اقمولا وبلىسى.
جۇمىسقا ورنالاسۋ جايى تانىستىرىلدى. اقتوبە قالالىق جۇمىسپەن قامتۋ ورتالىعىندا قازىردىڭ وزىندە 807 ادام جۇمىسسىز رەتىندە تىركەلگەن. سونىڭ 195-ءى 25-كە دەيىنگى جاستار, ديپلومى بار ماماندار. جاقىندا وسى جاستاردىڭ وزدەرىن ەڭبەك رىنوگىندا ەركىن سەزىنۋىنە كومەكتەسۋ ءۇشىن سەمينار-ترەنينگ وتكىزىلدى. وندا تۇيىندەمەنى قالاي تولتىرۋ كەرەكتىگى, بوس جۇمىس ورىندارىن قالاي ىزدەۋگە, مەملەكەتتىك قىزمەتكە قالاي ورنالاسۋعا بولاتىندىعى ورتاعا سالىندى. سەمينار-ترەنينگكە قاتىسۋشىلاردىڭ جۇمىسقا ورنالاسا الماۋىنىڭ نەگىزگى سەبەبى, ەڭبەك ءوتىلىنىڭ بولماۋى ەكەن. مامانداردىڭ ايتۋىنشا, كوپشىلىك جاستار جۇمىس ىزدەپ بارعان جەرلەرىنەن تاۋى شاعىلىپ قايتادى. سوندىقتان تۇيىندەمەنى تولتىرعاندا جۇمىس بەرۋشىنىڭ وزىمەن كەزدەسۋگە ءماجبۇر ەتەتىندەي مالىمەتتەردى جەتكىزۋى كەرەك. جاڭا جۇمىس ورنىندا پايدالاناتىن ءبىلىمى مەن بىلىگىنە سەندىرە ءبىلۋ دە ۇتىمدى بولماق.
ساتىبالدى ءساۋىرباي. اقتوبە وبلىسى.
ءبىرىنشى ورىن — قاراعاندىلىقتاردا. وبلىس ورتالىعىنداعى ستاديوندار ەكى كۇن بويى ايماقتاعى قالالاردان كەلگەن اۋەسقوي سپورتشىلاردىڭ قارىم-قابىلەت سىناسۋ ورىندارىنا اينالدى. بۇل ءداستۇرلى تۇردە وتكىزىلىپ كەلە جاتقان جازعى سپارتاكيادا. بيىل بەسىنشى رەت ۇيىمداستىرىلعان جارىسقا سەگىز قالانىڭ وكىلدەرى قاتىستى.ولار سپورتتىڭ 10 تۇرىنەن باسەكەگە ءتۇستى. ءبىرىنشى ورىندى بۇل جولى دا قاراعاندىلىقتار يەمدەنىپ, 9 ءبىرىنشى ورىندى جەڭىپ الدى. ال ۇزەڭگىلەس ساتىعا كوتەرىلگەن تەمىرتاۋلىقتار 6 ەكىنشى ورىننان كورىندى. بالقاشتىقتار قولا جۇلدەگە قول جەتكىزدى. “اراي” اتالاتىن وسىناۋ سپارتاكيادا كەلەسى جىلى جەزقازعاندا وتەدى. جوندەۋ جۇمىستارى اياقتالىپ, جاڭارعان ستاديون جارىستىڭ وتكىزىلۋىنە دايىن تۇر. وبلىسقا, قالا بەردى ەلىمىزگە تانىمال سپورتشىلاردىڭ تۇساۋى اتالعان سپارتاكيادا ارقىلى كەسىلىپ ءجۇر.
ايقىن نەسىپباي. قاراعاندى.
دەمالۋشىلار باعاسى جوعارى. تۋعان جەردىڭ تاماشا تابيعاتى مەن جانعا شيپا اۋاسى مەن سۋىن دەمالۋشىلار يگىلىگىنە اينالدىرۋ ماقساتىنداعى جۇمىستار سوڭعى كەزدە ءوز ناتيجەسىن بەرىپ كەلەدى. ارقاسىن جوڭعار الاتاۋىنا تىرەپ, جاعاسىن سارىقۇم, قاراقۇم شولىمەن جالعاستىرىپ, ەتەگىن كولگە تىرەگەن الاكول ايماعى ءتۋريزمنىڭ دامۋىنا مەيلىنشە جول اشقان. مۇندا اتباسىن بۇرعان شەتەلدىكتەر تامىلجىعان تابيعاتقا جوعارى باعا بەرىپ, شۆەيتساريادان كەم كورمەيتىنىن ورتاعا سالاتىنى وسىنىڭ دالەلى. الاكول – ەكولوگيالىق جاعىنان ەڭ تازا كول رەتىندە دەمالۋشىلاردان جوعارى باعا الدى. ايدىن كولدىڭ ءمولدىر سۋى مەن شاعىل قۇمى بۋىن, وستەوحوندروز, راديكۋليت, برونحيت, تاعى باسقا اۋرۋلارعا شيپا بولعاندىقتان مۇندا ەكى دەمالىس لاگەرى, جەتى دەمالىس بازاسى, جالپى 64 نىسان تۋريستەرگە ءمىنسىز قىزمەت كورسەتۋدە. وتكەن جىلى الاكولدە 20 مىڭ ادام دەمالىپ, بيۋدجەت قورجىنىنا 10 ملن. تەڭگە تۇسسە, بيىلعى دەمالۋشىلار قاتارى ودان الدەقايدا كوپ. دەمەك, ءوڭىر ەكونوميكاسىن كوتەرۋگە قوساتىن ۇلەسى قوماقتى. اعىمداعى جىلى دەمالىس ايماعىنا 66 ملن. تەڭگە ينۆەستيتسيا تارتىلىپ, كەشەندى شارالار جاسالعان. وسىلايشا كول جاعاسىنا كەلۋشىلەرگە قىزمەت كورسەتەتىن نىساندار قاتارى جاڭاسىمەن تولىعىپ, دەمالىس ايماعى جايناي تۇسكەن. سونداي-اق 500 ادام تۋريستەرگە قىزمەت كورسەتۋ باعىتىندا جۇمىسپەن قامتىلعانى دا جاقسى ىستەر قاتارىندا ەكەنىن ايتقان ءجون.
كۇمىسجان بايجان. الماتى وبلىسى.
جيىرما جىلدان سوڭ... جۋىردا قالانىڭ شەت جاعىنداعى ميچۋرين كوشەسىنە جارىق ورناتىلدى. ال بۇل كوشەدە جارىقتىڭ ءسونىپ قالعانىنا جيىرما جىل بولعان-دى. الگىندەي يگىلىكتى شارۋا “جول كارتاسى” باعدارلاماسى اياسىندا جۇزەگە اسىرىلدى. بيىلعى جىلى قالانىڭ بۇدان باسقا دا بىرقاتار كوشەلەرى جارىقتاندىرىلدى. مۇنىڭ سىرتىندا اسپالى كوپىرگە اشەكەيلى شامدار ورناتىلدى. ءسويتىپ, ۋاقىت وتكەن سايىن قالا كوركى اجارلانىپ كەلەدى. كوشەلەردى جارىقتاندىرۋ قىلمىستىڭ الدىن الۋعا دا سەپتىگىن تيگىزۋدە.
داۋلەت سەيسەن ۇلى. سەمەي.
قايىرىمدىلىق كونتسەرتى. قازاقستاننىڭ ەڭبەك سىڭىرگەن ءارتىسى, پروفەسسور كەنجەعالي مىرجىقباي وتكەن اپتادا وبلىس ورتالىعىنداعى “دوستىق” ۇيىندە, ودان سوڭ مويىلدى ساناتوريىندەگى دەمالۋشىلارعا ارناپ قايىرىمدىلىق كونتسەرتىن وتكىزدى. كونتسەرتتىك باعدارلاماسىنىڭ تاقىرىبى ءارتۇرلى حالىقتار تىلىندە بولعاندىقتان, ءانشى يتاليان, يسپان, ورىس, ۋكراين تىلدەرىندە ءان شىرقاپ, جينالعان جۇرتشىلىقتى, اسەم انىمەن ءتانتى ەتتى. ءوز تۋعان تىلىمىزدە ورىنداعان اندەرىن ايتپاس بۇرىن, ءار ءاننىڭ شىعۋ تاريحىنا, اۆتورىنا دەيىن ءتۇسىندىرىپ بەردى. قازاق اندەرى اۋەلەپ كەڭ دالانىڭ تىنىسىن سەزدىرگەندەي بولدى. ءان كەشىنىڭ وتۋىنە قولداۋ كورسەتكەن وبلىس اكىمىنىڭ ورىنباسارى ءاليا عالىموۆا انشىگە شىعارماشىلىق تابىس تىلەدى. بۇدان كەيىن كەنجەعالي مىرجىقباي كونتسەرتتىك باعدارلاماسىن تابيعاتى كەرەمەت باياناۋىلدا جالعاستىردى.
فاريدا بىقاي. پاۆلودار وبلىسى.
