اقش يەمەن پرەزيدەنتى مەن يانۋكوۆيچتىڭ ايىرماشىلىعىن ءتۇسىندىردى

استانا. 5 ءساۋىر. اقش يەمەن پرەزيدەنتى ابد راببۋ مانسۋر حادي مەن ۋكراينانىڭ بۇرىنعى پرەزيدەنتى ۆيكتور يانۋكوۆيچتىڭ ارەكەتتەرىن ءارتۇرلى باعالايدى. بۇل تۋرالى rosbalt.ru حابارلادى. ايتا كەتەيىك, يەمەن پرەزيدەنتى حۋسيتتەر كوتەرىلىسىنەن كەيىن ەلدى تاستاپ شىققان بولاتىن. كەزىندە يانۋكوۆيچ تە مايدانداعى جاعدايدان كەيىن ۋكراينادان كەتىپ قالعانى بەلگىلى. اقش بۇل ەكى جايتتىڭ ايىرماشىلىعى بارىن ايتتى. «مەن ءحاديدىڭ جاعدايىندا «ەلدەن قاشىپ كەتتى» دەگەن ءسوزدى قولدانباس ەدىم. ويتكەنى, ونى قارۋلى حۋسيتتەردىڭ ارەكەتى ەلدەن كەتۋگە ءماجبۇر ەتتى. حۋسيتتەر بۇگىندە ەلدىڭ ءبىراز اۋماعى مەن استاناسى – سانانىڭ كوپ بولىگىن باسىپ الدى», – دەيدى اقش مەملەكەتتىك دەپارتامەنتىنىڭ رەسمي وكىلى ماري حارف. سونداي-اق, ول ۋكراينانىڭ ەكس-پرەزيدەنتىنە قاتىستى: «ۆيكتور يانۋكوۆيچ ەلدەن كەتكەن كەزدە كيەۆتىڭ كوپ بولىگى ساناداعىداي قارۋلى توپتىڭ باقىلاۋىندا بولعان جوق. سوندىقتان ول مۇلدەم باسقا جاعداي», – دەدى. وسىعان دەيىن رەسەيدىڭ سىرتقى ىستەر ءمينيسترى سەرگەي لاۆروۆ اقش-تىڭ ەكىجاقتى ستاندارتىنا قاتىستى سىني پىكىر بىلدىرگەن بولاتىن. بۇل جونىندە ول: «ءوز ەلىن تاستاپ كەتكەن يەمەن پرەزيدەنتىن اقش قولداپ وتىر. ال ءدال سولاي ۋكراينادان كەتىپ قالعان يانۋكوۆيچتىڭ ارەكەتىنە ولار قارسىلىق بىلدىرگەن ەدى», – دەپ امەريكانىڭ بۇل ارەكەتىن ايىپتاعان ەدى. ەلامان قوڭىر. دەرەك: rosbalt.ru. سۋرەت: ruposters.ru.