كۇپتى كوڭىل قاشان سەيىلەدى؟

جاڭا وقۋ جىلىنىڭ باستالۋىنا ءبىر ايدان ءسال-اق استام ۋاقىت قالدى. ال ۋاقىت العا وزعان سايىن قالاداعى № 11 ورتا مەكتەپتىڭ وقۋشى-مۇعا­لىمدەرى, سونداي-اق اتا-انالار كۇپتى كوڭىلمەن كۇي كەشۋدە. اتالعان مەك­تەپ ماسەلەسى جونىندە جەرگىلىكتى با­سى­لىمدار دا جارىسا جازۋدا. بىراق, وكىنىشكە قاراي, ودان شىعىپ جاتقان قورىتىندى شامالى سەكىلدى. ەندى بۇل ماسەلەنىڭ مانىسىنە ءۇڭى­لەتىن بولساق, جاعداي تومەندەگىدەي. ياع­ني, وسىدان 16 جىل بۇرىن ابدەن توزىعى جەتكەن ەسكى مەكتەپتىڭ توبەسى تۇتاسىمەن قوپارىلىپ ىشكە تۇسەدى. سودان بۇلارعا ۋاقىتشا دەپ قۇرى­لىسشىلاردىڭ جاتاقحاناسى بەرىلەدى. ءسويتىپ, مىنە, بىرنەشە جىلدان بەرى مۇنداعى 1400 وقۋشى بولمەلەرى اياداي, دالىزدەرى قۋىقتاي تار جەردە سىعىلىسىپ كەلەدى. “جىعىلعانعا جۇدىرىق” دەمەك­شى, وسىدان ءتورت جىل بۇرىن ەندى الگى جاتاقحانا-مەكتەپتىڭ ءبىر جاق قا­بىر­عاسى قاقىراپ, ەدەننەن توبەگە دەيىن كىسى جۇدىرىعى سىياتىنداي جا­رىق­شاق پايدا بولادى. جارىقشاقتى قانشا جاماپ-جاسقاعانمەن ەشتەڭە شىق­پاعان سوڭ, مەكتەپ ديرەكتورى نا­­­تاليا فەسەنكو مەكتەپتىڭ سول اقاۋ­لى تۇسىن بەكىتىپ تاستاۋعا ءماج­بۇر بولادى. سولايشا مەكتەپ ءتىپتى تا­­رىلا تۇسەدى. سول سەبەپتەن دە وقۋ­شى­­لاردىڭ ءبىر بولىگىن كورشىدەگى № 22 مەكتەپكە ورنالاستىرۋعا تۋرا كەلەدى. ەندى نە ىستەمەك كەرەك دەگەن سۇراق تۋىنداعاندا, بۇل مەكتەپ ءۇشىن جاڭا عيمارات سالۋعا مۇمكىندىك بول­ماي, جاڭادان ەكى كورپۋستى تۇر­عىزۋ جونىندە شەشىم قابىلدانادى. بىراق العاشقىدا قارقىندى باستالعان جۇمىس سوڭعى ءبىر جارىم جىل بويى قوزعالىسسىز تۇرىپ قالادى. ابىروي بولعاندا, بيىلعى كوكتەمدە اتالعان مەكتەپتە وبلىس اكىمى بەردىبەك سا­پار­باەۆ بولىپ, مۇنداعى ماسەلەگە ءاب­دەن قانىققان سوڭ تيىسىنشە شەشىم قابىلدانادى. سودان كەيىن-اق توقتاپ قالعان قۇرىلىسقا قايتادان جان بىتەدى. الايدا قايسىبىر قۇرىلىس ما­تەريالدارى ۋاقىتىندا جەت­كىزىلمە­گەن­­دىكتەن مۇنداعى جۇمىس تاعى دا سايابىرلاپ قالادى. سوعان بايل­ا­نىس­تى قۇرىلىسشىلار جاڭا وقۋ جىلىنا دەيىن جاڭا كورپۋستار تولىق دايىن بولمايتىندىعىن مويىنداپ وتىر. ونىڭ ۇستىنە ەسكى عيماراتتاعى قا­ۋىپتەن قۇتىلۋدىڭ جولى دا ءوز شەشىمىن تابار ەمەس. ويتكەنى, مۇندا دا بارلىق ماسەلە قارجىعا كەلىپ تىرەلۋدە. ايتالىق, ونداعى تەك جوبا­لاۋ جۇمىستارىنىڭ قۇنى عانا ءبىر ميلليون تەڭگەگە جۋىق. جالپى وعان قانشا قارجى كەتەتىنى, ونى كىم بەرە­تىن­ى دە ءالى بەلگىسىز. سوندىقتان وقۋ­شى­لار مەن مۇعالىمدەردىڭ, اتا-انا­لار­دىڭ كۇپتى كوڭىلى سەيىلەر ەمەس. وسى ورايدا, مەكتەپ ديرەكتورى ناتاليا فەسەنكونىڭ قالالىق ءماس­ليحاتتىڭ دەپۋتاتى ەكەندىگىن دە ايتا كەتسەك دەيمىز. ال دەپۋتات ءوز مەكتە­بىن­دەگى وسىنداي قيىن احۋالدى تۇزەي الماي جاتسا, باسقاعا نە جورىق؟ قا­لاي دەسەك تە, بۇل ماسەلەگە بايلا­نىس­تى تەزدەتىپ تياناقتى شەشىم قابىل­دان­باسا, ەرتەڭ كەش بولارى انىق. داۋلەت سەيسەن ۇلى. سەمەي.