جولاۋشىلارعا ەسكەرتۋ: پويىزدا قانداي ارەكەتتەرگە تىيىم سالىنادى؟

20 رەت

كورسەتىلدى

2 مين

وقۋ ءۇشىن

«جولاۋشىلار تاسىمالى» اق تەمىرجول كولىگىندە بەلگىلەنگەن قاۋىپسىزدىك تالاپتارىن ساقتاۋ ءار جولاۋشىنىڭ مىندەتى ەكەنىن ەسكەرتەدى. كومپانيا وكىلدەرىنىڭ مالىمدەۋىنشە, پويىز ىشىندەگى ءتارتىپ پەن جايلىلىق – بارشاعا ورتاق جاۋاپكەرشىلىك, دەپ جازادى Egemen.kz.

شىڭعىس مۇقاەۆ

جولاۋشىلارعا ەسكەرتۋ: پويىزدا قانداي ارەكەتتەرگە تىيىم سالىنادى؟

فوتو: قتج

ەڭ الدىمەن, پويىزعا ءمىنۋ ءۇشىن جارامدى بيلەت بولۋى شارت. بيلەتسىز جۇرۋگە جول بەرىلمەيدى. تەكسەرۋ كەزىندە جول ءجۇرۋ قۇجاتى بولماعان جولاۋشى كەلەسى ستانتسيادا ءتۇسىرىلۋى مۇمكىن.

سول سياقتى بالالاردىڭجەكە باسىن كۋالاندىراتىن نەمەسە اتا-اناسىمەن تۋىستىعىن راستايتىن قۇجاتسىز الىپ جۇرۋگە رۇقسات جوق. قۇجاتتار بولماعان جاعدايدا بالانى پويىزعا وتىرعىزۋ مۇمكىن ەمەس.

25% جانە 33% جەڭىلدىك: زەينەتكەرلەر مەن جاستار ءۇشىن پويىز بيلەتى ارزاندايدى

كومپانيا جولاۋشىلارعا ءبىر ادامعا بەلگىلەنگەن 35 كەلىدەن ارتىق جۇكتى الدىن الا تولەم جاساپ, ءتيىستى قۇجات راسىمدەلگەن جاعدايدا عانا تاسىمالداي الاتىنان ەسكە سالادى. ال ۆەتەريناريالىق قۇجاتتارى جوق جانۋارلاردى پويىزبەن الىپ جۇرۋگە قاتاڭ تىيىم سالىنادى.

پويىز ىشىندە شىلىم جانە ەلەكتروندى تەمەكى شەگۋگە بولمايدى. سونداي-اق توتەنشە جاعداي بولماسا, ستوپ-كراندى باسۋعا رۇقسات ەتىلمەيدى. مۇنداي ارەكەت قوزعالىس كەستەسىن بۇزىپ قانا قويماي, اكىمشىلىك جاۋاپكەرشىلىككە اكەلۋى مۇمكىن.

ەسىرتكى, جارىلعىش جانە وتكىر زاتتاردى تاسىمالداۋعا مۇلدە جول بەرىلمەيدى. زاڭعا قايشى ارەكەت انىقتالعان جاعدايدا جولاۋشى قۇقىق قورعاۋ ورگاندارىنا تاپسىرىلادى. بۇدان بولەك, اگرەسسيا تانىتۋعا, جانجال شىعارۋعا, وزگە جولاۋشىلاردى قورلاۋعا قاتاڭ تىيىم سالىنادى. ءتارتىپ بۇزعان ازاماتتار جاقىن ماڭداعى ستانتسيادا ءتۇسىرىلۋى ىقتيمال.

پويىز قوزعالىسى كەزىندە ۆاگوننان ءتۇسۋ – ومىرگە اسا قاۋىپتى ارەكەت. ءتۇسۋ تەك ستانتسيالاردا جانە ارنايى ەسىكتەر ارقىلى جۇزەگە اسىرىلادى. ۆاگون مۇلكىن ءبۇلدىرۋ, ءىشىن لاستاۋ, ۆانداليزم كورىنىستەرى دە جاۋاپكەرشىلىككە اكەلەدى.

الكوگولدىك ىشىمدىكتەردى پويىز ۆاگوندارىندا تۇتىنۋعا بولمايدى. بۇل تالاپ مەيرامحانا-ۆاگوندارعا قاتىستى ەمەس, وندا ىشىمدىك بەلگىلەنگەن تارتىپكە ساي ۇسىنىلادى. شەكتەۋدى بۇزۋ اكىمشىلىك جازاعا جانە پويىزدان تۇسىرۋگە نەگىز بولۋى مۇمكىن.

پويىزدا جولاۋشى ءوزىن جايسىز سەزىنسە نە ىستەۋ كەرەك؟

قىزمەت كورسەتۋ ساپاسىنا قاتىستى سۇراقتار تۋىنداعان جاعدايدا جولاۋشىلار WhatsApp ارقىلى +7 776 714 5686 نومىرىنە جازىپ, ۆاگون ىشىندەگى QR-كودتى سكانەرلەپ نەمەسە 1433 تەگىن انىقتاما قىزمەتىنە قوڭىراۋ شالا الادى.

اتالعان تالاپتار «تەمىرجول كولىگىمەن جولاۋشىلار, باگاج جانە جۇك-باگاجدى تاسىمالداۋ قاعيدالارىنا» سايكەس بەكىتىلگەن. كومپانيا جولاۋشىلاردى ءتارتىپتى ساقتاۋعا شاقىرا وتىرىپ, قاۋىپسىز ساپار مادەنيەتىن قالىپتاستىرۋعا ۇندەيدى.