مەيىرىم شۋاعى

ەلىمىزدە اتا-اناسىنىڭ قامقور­لى­عىنسىز قالعان جانە تاستاندى با­لالاردىڭ ومىردەن ءوز ورنىن تابۋىنا قولداۋ كورسەتۋ ەڭ وزەكتى ماسەلە بو­لىپ وتىرعانى راس. ءبىلىم جانە عىلىم مينيسترلىگىنىڭ اتا-اناسىنان ايىرىل­عان بالالار ءۇشىن “قۋان, ءسابي!” رەس­پۋب­ليكالىق اكتسياسىن وتكىزۋ باس­تا­ماسىن كوتەرىپ وتىرعانى دا سوندىق­تان. وسى اكتسيا اياسىندا وبلىستىق با­لالاردىڭ قۇقىن قورعاۋ دەپارتامەنتى مەن وبلىستىق ىشكى ساياسات باسقارماسى بىرىگىپ, العا اۋدانىنىڭ بەستاماق اۋىلىنا جاقىن جەردە ورنالاسقان وب­لىستىق العا بالالار ءۇيىنىڭ “اق­بوبەك” لاگەرىندە “باقىت نۇرى – بالاعا” اتتى مەرەكە ۇيىمداستىردى. قوناقتار الدىمەن لاگەردى ارا­لاپ كوردى. العا بالالار ءۇيىنىڭ دي­رەك­تورى كەنجەعازى بايعازيننىڭ ايتۋ­ىنشا, بۇل بۇرىنعى حيميا زاۋى­تىنىڭ لاگەرى كورىنەدى. ون التى جىل­­­دان بەرى لاگەر العا بالالار ءۇي­ىنە قارايدى. قازىر 440 تاربيەلەنۋشى جازعى دەمالىسىن وسىندا وتكىزىپ جا­تىر ەكەن. سوڭعى جىلدارى سالىنعان بەس ءۇي, اكىمشىلىك ءۇيى, اسحانا, جۋى­ناتىن بولمەلەر بالالاردىڭ يگىلىگىنە قىزمەت ەتەدى. اسحانا 120 ورىندىق بول­عاندىقتان بالالار ءۇش اۋى­سىم­مەن تاماقتانادى. بالالاردىڭ وزدەرى وتىرعىزعان كوشەتتەر جايقالىپ ءوسىپ, بوي تۇزەپ كەلەدى. راس, سۋ ماسە­لەسى قيىن ەكەن, سوندىقتان بالالار سۋدى ۇنەمدەپ جۇمساۋعا داعدىلانعان. بالالار ءۇيىنىڭ ديرەكتورى الداعى ۋاقىتتا اۋلادان قۇدىق قازدىرعالى وتىرعانىن جەتكىزدى. لاگەردىڭ ساحناسىنا كوتەرىلگەن تاربيەنۋشىلەر عالىم سۇلتانوۆ پەن ەربولات جۇمانيازوۆ سالعان انمەن مەرەكە شىمىلدىعى اشىلدى. مە­رەكەنىڭ ماقساتى — بالالاردى قام­قورلىعىنا الاتىن, اتا-انالىق سەزىم شۋاعىن سىيلايتىن, ولاردىڭ ۇلكەن ءومىر جولىنا ءساتتى قادام باسۋىنا با­عىت-باعدار بەرەتىن قامقورشى ازاماتتاردى تارتۋ جانە بالالاردىڭ تۋعان-تۋىستارىن, باۋىرلارىن, قام­قورشىلارىن تاۋىپ, ولاردى وت­با­سىنا ورنالاستىرۋ بولىپ تابىلادى. وبلىستىق بالالاردىڭ قۇقىن قورعاۋ دەپارتامەنتىنىڭ ديرەكتورى كۇلپار­شىن ايدارحانوۆانىڭ ءمالىم­دەۋىن­شە, وبلىستا 617 جەتىم جانە اتا-انا قامقورلىعىنسىز قالعان بالا بار ەكەن. سونداي-اق 1414 بالا قامقور­شىلىق جانە پاترونات وتباسىندا ءتار­بيەلەنۋدە. دەگەنمەن بالا دەسە جان جۇرەگى ەزىلەتىن ادامداردىڭ ار­قاسىندا قالامىزداعى ء“ۇمىت” ءسا­بيلەر ۇيىندەگى بالالار دا ازايا باس­تاپتى. بۇل قۋا­نارلىق ءجايت, ارينە. قا­زىر قالالىق ءبىلىم ءبولىمىنىڭ ەسە­بىندە سابيلەرگە باقىت سىيلاۋعا ىن­تالى ەكى جۇزدەي اتا-انا كەزەكتە تۇر­عان كو­رىنەدى. ەندىگى ماسەلە – ءارتۇرلى جاع­داي­­لار سالدا­رىنان اتا-اناسى­نىڭ قا­راۋ­ىنسىز قالعان بالالاردى ايالاپ ءوسى­رۋگە شىن جۇرەگىمەن بەرىلگەن ادام­­داردى وسى يگى ىسكە كوبىرەك تارتۋ بولماق. “بەسىك” بالالار قورى” قوعامدىق قورىنىڭ ءتورايىمى الما جانسا­­رينوۆا العا بالالار ۇيىنە “زەرەك” تەاتر ستۋدياسى مەن سپورت كلۋبىن سىيلادى. “دەتسكي مير Mothercare” دۇكەنىنىڭ ديرەكتورى گۇلنار تۋمى­شەۆا بالالارعا كيىم-كەشەك اكەلىپتى. مەرەكەلىك كونتسەرتتە ونەرپاز ءتار­بيە­لەنۋشىلەر مەن اقتوبەلىك تانى­مال انشىلەر قوسىلىپ ونەر كورسەتتى. مەرەكەگە وسى بالالار ءۇيىنىڭ بۇرىنعى تاربيەلەنۋشىلەرى رىسكۇل قۇرمانعاليەۆا مەن اسەل چەبوحينا كىشكەنتاي بوپەلەرى جالعاس پەن تيموفەيدى دە الا كەلىپتى. بىلتىر جاڭادان شاڭىراق كوتەرگەن ازامات پەن رىسگۇل, ماكسيم مەن اسەل وبلىس اكىمى ەلەۋسىن ساعىندىقوۆتىڭ ءوز قولىنان پاتەر كىلتىن العان بو­لاتىن. قازىر ولار وزدەرىنىڭ ومىرلىك جولدارىن تاۋىپ, تاڭداعان مامان­دىقتارى بويىنشا ەڭبەك ەتۋدە. مەرەكەلىك كوڭىل-كۇيدە وتكەن بۇل اكتسيا قايىرىمدىلىق پەن ادام­گەر­شىلىكتىڭ ايقىن كورىنىسى بولدى. اتا-انا قامقورلىعىنان تىس قالعان جارىم كوڭىل بالالار ادامداردىڭ مە­يىرىمى مەن جۇرەك جىلۋىن سەزىن­گەن, سونداي-اق, ادامگەرشىلىك قا­سيەت­تىڭ قادىرىنە جەتكەن شارا بولدى بۇل. ساتىبالدى ءساۋىرباي. اقتوبە وبلىسى.