شورتاندى كوگىندە تۇسىنىكسىز قارا شەڭبەر قالىقتاپ تۇردى (ۆيدەو)

استانا. 5 ءساۋىر. اقمولا وبلىسى شورتاندى كەنتىنىڭ اسپانىندا 15 مينۋت شاماسىندا قارا شەبەرگە قاتتى ۇقسايتىن جۇمباق ءبىر بۇلت قالىقتاپ تۇرىپ, تاراپ كەتكەن. بۇل تۋرالى KokshetauAsia پورتالى حابارلادى. جەرگىلىكتى تۇرعىنداردىڭ ايتۋلارىنشا, ۇيلەردىڭ توبەسىندە قالىقتاپ تۇرعان «قىزىق» بۇلت قارا شەڭبەر تارىزدەس بولعان. ول 3 ءساۋىر كۇنى ساعات كۇندىزگى 4-ءتىڭ كەزىندە كورىنگەن. اۋىل تۇرعىندارىنىڭ قىزىعۋشىلىعى مەن قورقىنىشىن قاتار تۋعىزعان بۇل ءبىرازدان كەيىن اقىرىن تارقاپ كەتكەن. ودان ەشقانداي بوتەن ءيىس بىلىنبەگەن. وسىدان كەيىن جەرگىلىكتى جۋرناليستەر سولتۇستىك قازاقستان وبلىسى مەملەكەتتىك ۋنيۆەرسيتەتى فيزيكا كافەدراسىنىڭ مەڭگەرۋشىسى اندرەي سولودوۆنيكوۆكە حابارلاسىپ, مۇنىڭ ءمان-جايىن ايتىپ بەرۋدى سۇراعان. دوتسەنت مۇنىڭ بىرنەشە بولجامىن العا تارتقان. ونىڭ ءبىرىنشىسى, مۇنداي قۇبىلىس جەر اتموسفەراسىنا عارىش دەنەلەرىنىڭ باسىپ كىرۋىنەن پايدا بولۋى ابدەن مۇمكىن. بىراق بۇل جاعدايدا شەڭبەر ەداۋىر بيىكتە تۇرۋى كەرەك ەدى. سوندىقتان بۇل ۆاريانتتىڭ شىندىققا جاقىندىعى ازداۋ. ەكىنشىسى, قۇبىلىس انتروپوگەندى تابيعاتتىڭ اسەرى بولۋى ىقتيمال. وندا ونىڭ قاينار كوزى جەردىڭ وزىندە بولادى. «مەتەورولوگيادا بۇرىننان بەلگىلى سوليتون دەگەن قۇبىلىس بار, - دەدى فيزيك بۇدان ءارى. – ول اسپاندا ۇزاق ۋاقىت اينالىپ تۇراتىن قۇيىن تۇرىندە كورىنەدى. ولاردى جاساندى جولمەن دە جاساۋعا بولادى. ماسەلەن, امەريكالىق عالىمدار تاجىريبە ارقىلى ءتىپتى جولىنداعى زاتتاردى ءوزىن اۋدارىپ كەتە بەرەتىن ءتۇتىن تەكتەس شەڭبەر جاساپ شىعارعان بولاتىن». ونىڭ ايتۋىنشا, مۇنداي سوليتوندى جاساۋ ءۇشىن ۇلكەن ديامەترلى تسيليندردەن جانىپ جاتقان زاتتىڭ سىرتقا زالپپەن شىعارۋ كەرەك. سولودوۆنيكوۆتىڭ ەسەپتەپ كورۋى بويىنشا, شورتاندى ۇستىندەگى شەڭبەردىڭ ديامەترى كەم دەگەندە 100 مەتر بولعان جانە جەردەن 200 مەتردەن ءبىر كيلومەترگە دەيىنگى ارالىقتاعى اسپان كوگىندە قالىقتاپ تۇرعان. «ونىڭ سۇر ءتۇتىن سەكىلدەنىپ تارقاپ كەتكەنى كورىنىپ تۇر. دەمەك, شەڭبەر كومىرتەگى كۇيەسىنەن قۇرالعان. شەڭبەردەن جەرگە قاراي تارتىلعان ءىزدىڭ بارى دا بايقالدى. سوندىقتان ونى جەردە جانعان نارسەنىڭ ءونىمى دەپ ەسەپتەۋىمىزگە تولىق نەگىز بار». مۇرات ايتقوجا. مانبە, سۋرەت: KokshetauAsia. https://youtu.be/IfYeeVRlGcc