فۋتبول. وڭتۇستىك دەربيىندە «ورداباسى» باسىم بولدى

استانا. 5 ءساۋىر. بۇگىن فۋتبولدان قازاقستان پرەمەر-ليگاسىنىڭ 5-تۋرى وتۋدە. ازىرگە ءبىر كەزدەسۋدىڭ ناتيجەسى بەلگىلى. شىمكەنتتە وتكەن وڭتۇستىك دەربيىندە «ورداباسى» «تارازدى» 1:0 ەسەبىمەن جەڭدى. بۇل تۋرالى egemen.kz حابارلادى. ويىن بىردەن الاڭ يەلەرىنىڭ شابۋىلىمەن باستالدى. ءتىپتى العاشقى مينۋتتا-اق «ورداباسى» بۇرىشتاما دوبىن ورىنداۋعا مۇمكىندىك الدى. الايدا, تارازدىقتار قاۋىپتىڭ بەتىن وڭاي قايتاردى. ماتچتىڭ 7-مينۋتىندا «ورداباسىنىڭ» شابۋىلشىسى ەركەبۇلان تۇڭعىشباەۆ قاۋىپتى سوققى جاسادى. بۇل جولى قاقپاشى الەكساندر گريگورەنكو توسقاۋىل بولدى. جالپى, ءبىرىنشى تايمدا الاڭ يەلەرىنىڭ باسىمدىعى بايقالدى. اسىرەسە, ەركەبۇلان تۇڭعىشباەۆ پەن بەكزات بەيسەنوۆتەر بەلسەندىلىگىمەن كوزگە ءتۇستى. «تاراز» ساپىنان جاقىپ قوجامبەردىنىڭ ويىن ورنەگىنە جانكۇيەرلەر ريزا بولدى. كەزدەcۋدىڭ ەكىنشى بولىگىندە شىمكەنتتىكتەر ەسەپ اشتى. گولدىڭ اۆتورى – ەركەبۇلان تۇڭعىشباەۆ (51-مينۋت). وعان ناتيجەلى پاس شىعارعان ازات نۇرعاليەۆ ەكەنىن ايتا كەتەيىك. ويىن سوڭىنا دەيىن ەسەپ وزگەرمەي, «ورداباسى» ماۋسىمداعى ءۇشىنشى جەڭىستەرىنە قول جەتكىزدى. ازىرگە تۋرنير كەستەسىندە 11 ۇپايمەن شىمكەنتتىڭ كومانداسى كوش باستاپ كەلەدى. كەلەسى ويىندى «ورداباسى» 11 ساۋىردە ءوز الاڭىندا الماتىنىڭ «قايراتىنا» قارسى وتكىزەدى. ال «تاراز» «استانانى قابىلدايدى». ءدال قازىر تاعى ەكى ويىن وتۋدە. «جەتىسۋ» ءوز الاڭىندا «ەرتىسپەن» سىنعا تۇسۋدە. ال قوستانايدا «توبىل» مەن «شاحتەر» اراسىنداعى ويىن وتۋدە. ازىرگە بۇل كەزدەسۋلەردە ەسەپ اشىلعان جوق. سونىمەن قاتار, بۇگىن «استانا» – «اقتوبە», «قايسار» – «اتىراۋ» جانە «قايرات» – «وقجەتپەس» اراسىنداعى ويىندارعا كۋا بولامىز. «ورداباسى» (شىمكەنت) – «تاراز» (تاراز) 1:0 (0:0) 5 ءساۋىر. شىمكەنت. «قاجىمۇقان» ستاديونى. تورەشى: د.يزمايلوۆ (تالدىقورعان). «ورداباسى»: س.بويچەنكو, ر.ابدۋلين, م.مۇحتاروۆ, ا.سيمچەۆيچ (ب.قوجاباەۆ 84), گ.سۇيىمباەۆ, ب.بەيسەنوۆ, ي.بوجيچ, ا.نۇرعاليەۆ (ق.اشىربەكوۆ 73), ك.پەتروۆ, د.تاجىمبەتوۆ (ب.ترايكوۆيچ 75), ە.تۇڭعىشباەۆ. «تاراز»: ا.گريگورەنكو, د.باشلاي (و.ياروۆەنكو 78), ي.ۆوروتنيكوۆ, ي.مەرا, ا.مۇحيتدينوۆ, م.نۇرالى, ە.اۆەرچەنكو, ي.گوليچ (س.جۇماحانوۆ 59), ج.قوجامبەردى (ت.دوسماعامبەتوۆ 44), ە.سەرگيەنكو, ا.پيششۋر. گول: ە.تۇڭعىشباەۆ 51. ەسكەرتۋلەر: س.بويچەنكو 65, ك.پەتروۆ 66, ق.اشىربەكوۆ 90+2 – ي.مەرا 43, ا.مۇحيتدينوۆ 90+2. ەلامان قوڭىر. دەرەك: egemen.kz. سۋرەت: prosportkz.kz.