قاراعاندىدا ءىنىسىن ولتىرگەن قىز سوتتان ءوزىن اقتاۋدى تالاپ ەتەدى

قاراعاندى. 5 ءساۋىر. قاراعاندى وبلىسى جاڭاارقا اۋدانىنىڭ تۇرعىنى قالامقاس امانبەك وبلىستىق سوتقا وزىنە تاعىلعان 11 جاستاعى جيەن ءىنىسى لەون سەرىكباەۆتى ءولتىردى جانە قارا كۇزەن توندى ۇرلادى دەگەن ايىپتاردان اقتاپ شىعۋدى تالاپ ەتكەن اپەللياتسيالىق شاعىم جازدى. بۇل تۋرالى Tengrinews.kz ءتىلشىسى حابارلادى. مۇنداي اپەللياتسيالىق شاعىمدى ولگەن بالانىڭ اتا-اناسى دا جازدى. ولار ۇكىمدى زاڭدى كۇشىندە قالدىرۋدى نەمەسە بۇرىنعىدان دا كۇشەيتۋدى وتىنەدى. لەوننىڭ اپكەسى جانەت سەرىكباەۆا ناعاشىسى قالامقاستىڭ جوعارى ينستانتسياعا شاعىمدانىپ جاتقانىن راستادى. «ول كۋالاردىڭ كورسەتۋلەرى مەن تەكسەرۋ ءادىل جۇرمەدى, ەشقايسىسى دا ەشتەڭە كورمەستەن, ءبارىن دولبارلاپ ايتتى» دەپ وتىر. ول سونداي-اق ۇيگە كەلگەنىمەن, ىشكە كىرمەگەنىن ايتادى. ءبىز ءوز شاعىمىمىزدا ۇكىمدى كۇشىندە قالدىرۋدى نەمەسە بۇرىنعىدان دا كۇشەيتۋدى وتىندىك», - دەدى جانەت. شاعىمدى وبلىستىق سوتتىڭ كەڭسەسى قابىلداپ العان. اتالمىش ماسەلەنى قارايتىن وتىرىستىڭ وتەتىن ۋاقىتى ازىرگە بەلگىسىز. ەسكە سالا كەتەيىك, قاراعاندى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى قاراعاندى ەكونوميكالىق ۋنيۆەرسيتەتىنىڭ ستۋدەنتى قالامقاس امانبەكتى قارا كۇزەن تونىن ۇرلاپ اكەتۋ ءۇشىن جيەنى لەون سەرىكباەۆتى ولتىرگەن دەپ تاۋىپ, ونى 17 جىلعا باس بوستاندىعىنان ايىردى. اتاپ وتەيىك, سوتتالۋشىنىڭ جاڭا تۋعان قىزىنىڭ جوق بولىپ كەتۋىنە بايلانىستى دا قىلمىستىق ءىس قوزعالدى. سوتتا لەون سەرىكباەۆتىڭ اكەسى ايتقانداي, قالامقاس 2014 جىلدىڭ اقپان ايىندا قىز تۋىپ الادى. بىراق ارتىنان نارەستە جوق بولىپ كەتەدى. لەون سەرىكباەۆ 2014 جىلعى 25 قىركۇيەكتە ءولتىرىلدى. بالا بويجەتكەننىڭ ۇيدەن اناسىنىڭ تونىن ۇرلاپ بارا جاتقانىن كورىپ قالعان. تەرگەۋدىڭ بولجامى بويىنشا, قىز الدىمەن 11 جاسار بالانى ۇرادى, سوڭىنان پىشاق سالىپ الادى. سوسىن مارقۇمنىڭ كيىمدەرى مەن زاتتارىن جاعىپ جىبەرىپ, ءمايىتىن ەسىكتىڭ الدىنداعى اجەتحانانىڭ  شۇڭقىرىنا تاستايدى. سوتتا مۇنىڭ ءبارى بەينەماتەريال ارقىلى كورسەتىلدى. روليكتەردىڭ بىرىندە ايىپتالۋشىنىڭ لومباردقا بارىپ, ۇرلانعان توندى وتكىزىپ جاتقانى كورىنىپ تۇر. سۋديا سول كەزدە قىزدان كادرداعى كىم ەكەنىن سۇراعاندا, ول ءوزىنىڭ ناشار كورەتىنىن ايتقان. ونى لومبارد قىزمەتكەرى دە تانىعان. سونداي-اق كورشى ايەل دە لەوندى جەتەلەپ الىپ بارا جاتقان قىزدىڭ وسى ەكەنىن ايتىپ بەرگەن. ايقىن نەسىپباي. دەرەك, سۋرەت: Tengrinews.kz.