ەندى 55 جىلدان سوڭ مۇسىلماندار حريستياندارمەن تەڭەسەدى

استانا. 5 ءساۋىر. الەم بويىنشا 2070 جىلعا قاراي يسلام ءدىنىن ۇستانۋشىلار مەن حريستيان دىنىندەگىلەر سانى تەڭەسەدى. اقش-تىڭ Rew Research Center دەگەن زەرتتەۋ ورتالىعى وسىنداي بولجام جاساپ وتىر. بۇل تۋرالى rosbalt.ru حابارلادى. مامانداردىڭ ايتۋىنشا, 2100 جىلى جاھان تۇرعىندارىنىڭ ىشىندە مۇسىلماندار قاتارى كوبەيەتىن كورىنەدى. ناقتىلاي ايتقاندا, مۇسىلماندار – 35, حريستياندار 34 پايىز بولماق. قازىرگى ەسەپ بويىنشا, جەر شارىندا حريستياندار سانى باسىم. دەگەنمەن, اتالمىش ورتالىقتىڭ بولجامىنا سۇيەنسەك, 2050 جىلى حريستياندار سانى 35 پايىزعا ارتىپ, 2,92 ملرد. ادامعا جەتۋى ىقتيمال, ال مۇسىلماندار قاۋىمى 73 پايىزعا ءوسىپ, 2,76 ملرد, ادامدى قۇراۋى مۇمكىن. سونداي-اق, اتەيستىك كوزقاراستاعىلار ازاياتىنى جانە بۋددا دىنىندەگىلەر قاتارى وسە قويمايتىنى دا اتالمىش ورتالىق تاراپىنان بولجانىپتى. جولدىباي بازار. دەرەك: rosbalt.ru. سۋرەت: news.nur.kz.