مونوپودىڭىز بولسا, مۋزەيدىڭ ماڭىنا جولاي المايسىز

استانا. 12 ناۋرىز. فرانتسياداعى اتاقتى ۆەرسال سارايى مەن بريتانيا ۇلتتىق گالەرەياسى «سەلفي تاياقشاسى» اتالىپ كەتكەن سۋرەتكە ءتۇسىرۋ قۇرىلعىسىنا (مونوپود) تىيىم سالدى. بۇل تۋرالى gazeta.ru حابارلادى. بۇل تاياقشاعا وسىعان دەيىن الەمدەگى بىرنەشە مۋزەيلەر مەن تاريحي ورىندار تىيىم سالعان بولاتىن. اتاپ ايتساق, نيۋ-يوركتەگى كۋپەر-حيۋيتت ديزاين مۋزەيى, قازىرگى زامانعى ونەر مۋزەيى جانە تاعى باسقا بىرنەشە مادەني ورىندار مونوپودپەن كىرۋگە رۇقسات بەرمەيتىن شەشىم شىعاردى. ءتىپتى بۇلاردىڭ قاتارىنا جۋىردا اقش-تاعى مەتروپوليتەن مۋزەيى دە قوسىلۋى ابدەن مۇمكىن. سەبەبى, اتالعان مادەني وشاق وسى ماسەلەگە ەرەكشە ءمان بەرۋدە. سونداي-اق, لوندونداعى بىرنەشە ورىندار دا قولىڭىزدا مونوپودىڭىز بولسا, ماڭىنا جولاتپايدى. ەندى مىنە, وسى قاتارعا ۆەرسال سارايى مەن بريتانيا ۇلتتىق گالەرەياسى قوسىلدى. مۋزەي قىزمەتكەرلەرىنىڭ ايتۋىنشا, مونوپودقا تىيىم سالۋ كونە جادىگەرلەردىڭ قاۋىپسىزدىگى ءۇشىن قولعا الىنعان دۇنيە. سەبەبى, تاياقشامەن مۋزەيدەگى جادىگەرلەردى ابايسىزدا قۇلاتىپ نەمەسە باسقالاي زيان كەلتىرۋى ابدەن مۇمكىن. ءتىپتى نيۋ-يوركتەگى مۋزەيلەردە مۇنداي جايتتار تىركەلىپ, بىرنەشە قۇندى دۇنيەگە زاقىم كەلگەن. سوندىقتان مۋزەي اكىمشىلىكتەرى وسىنداي ساقتىق شاراسىنا بارۋعا ءماجبۇر. بۇگىندە مۋزەي تۇرماق, مونوپودقا انگلياداعى فۋتبول ستاديوندارى دا قارسى شىعۋدا. ءتىپتى اعىلشىن پرەمەر-ليگاسىندا ويىندارىنا «سەلفي تاياقشاسىمەن» كىرە المايسىز. ستاديونعا الگىندەي تاياقشامەن كەلۋگە تىيىم سالۋدا جانكۇيەرلەر اراسىنداعى قاقتىعىستا قارۋ رەتىندە قولدانباۋ ماقساتى كوزدەلگەن. ال ول جاقتا مۇنداي قاقتىعىستىڭ تاڭسىق ەمەسى بەلگىلى. سونىمەن قاتار, تەننيستەن اۆستراليا اشىق بىرىنشىلىگىن ۇيىمداستىرۋشىلار دا ويىنعا مونوپودسىز كىرگىزەدى. «سەلفي تاياقشاسىنىڭ» تاريحى 1983 جىلدان باستاۋ العانىمەن, سوڭعى ەكى جىلدىڭ ىشىندە اياسى كەڭەيىپ, قولدانۋشىلار سانى ميلليونداپ ءوستى. ءتىپتى, 2014 جىلى ەڭ ءوتىمدى تاۋارلاردىڭ قاتارىندا وسى تاياقشانىڭ بولعانىن ايتا كەتەيىك. ەلامان قوڭىر. دەرەك: gazeta.ru. سۋرەت: positime.ru.