بۇل – ءبىزدىڭ تاريح الدىنداعى بورىشىمىز

2 ءساۋىر كۇنى وتكەن پارلامەنت سەناتىنىڭ جالپى وتىرىسىندا ءبىر توپ دەپۋتات ۇكىمەت باسشىسى كارىم ءماسىموۆتىڭ اتىنا دەپۋتاتتىق ساۋال جولداعان بولاتىن. وندا بىلاي دەلىنەدى: 2017 جىلى كورنەكتى مەملەكەت جانە قوعام قايراتكەرى, قازاق­تىڭ تۇڭعىش كاسىبي ديپلوماتى, حح عا­سىردىڭ 20-30-جىلدارى كەڭەس ودا­عىنىڭ ساۋد ارابياسى كورول­دى­گىن­دەگى وكىلەتتى وكىلى ءنازىر تورە­قۇ­لوۆ­تىڭ تۋعانىنا 125 جىل, جازىقسىز قۇربان بولعانىنا 80 جىل تولادى. ءنازىر تورەقۇلوۆتىڭ ەسىمىن ەل جا­دىندا قالدىرۋ ماقساتىندا ءبىز پار­لامەنت سەناتى دەپۋتاتتارى وتكەن جىلدارى بىرنەشە رەت دەپۋتاتتىق ساۋال جولداعان بولاتىنبىز. ۇكىمەتكە راحمەت, دەپۋتاتتىق ساۋالداعى ءبىر­قاتار ۇسىنىستار ىسكە اسىرىلدى. دەپۋتاتتىق ساۋالدا كوتەرىلگەن ماسەلەلەرگە بايلانىستى بەرگەن جاۋابىڭىزدا (20-11/3405 23.07.2012 ج.) ءسىز, قۇرمەتتى كارىم قاجىم­قان ۇلى, استانا قالاسىندا ءنازىر تورەقۇلوۆقا ەسكەرتكىش ورنا­تۋ ماسەلەسى قازاقستان رەسپۋب­لي­كا­سىنىڭ ەسكەرتكىشتەر مەن مونۋمەنتتەر جونىندەگى مەملەكەتتىك كوميسسيانىڭ تاراپىنان قولداۋ تاۋىپ, 2009 جىلى ەسكەرتكىشتىڭ تاڭداۋلى ۇلگىسىنە رەسپۋبليكالىق بايقاۋ جاريالانعاندىعىن, دەگەنمەن, ەسكەرتكىشتى ورناتۋعا قارجى قاراستىرىلماعاندىقتان, بۇل ماسەلە 2014-2016 جىلدارعا ارنالعان بيۋدجەت جوباسىندا قارالاتىندىعىن, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ ديپلوماتيا ينستيتۋتىنا جانە استانا, الماتى قالالارىنداعى مەكتەپتەرگە قايراتكەردىڭ ەسىمىن بەرۋ ماسەلەسى ونوماستيكا سالاسىنداعى زاڭنامالىق اكتىلەرگە وزگەرىستەر مەن تولىقتىرۋلار ەنگىزىلگەننەن كەيىن, زاڭناماعا سايكەس شەشىمىن تاباتىنىن, ءنازىر تورەقۇلوۆ اتىنداعى ستي­پەنديا تاعايىنداۋ ماسەلەسىن پى­سىقتاپ, ۇسىنىس ەنگىزۋ جونىندە ءبىلىم جانە عىلىم مينيسترلىگى مەن مەملەكەتتىك قىزمەت ىستەرى ءجو­نىن­دەگى اگەنتتىككە تاپسىرما بە­رىلگەنىن حابارلاعان ەدىڭىز. الايدا, ارادا بىرنەشە جىل وتسە دە اتالعان ماسەلەلەر ءوز شەشىمىن تاپپاي كەلەدى. سوندىقتان, قۇرمەتتى كارىم قا­جىمقان ۇلى, قازاقتىڭ تۇڭعىش ديپ­لو­ماتى ءنازىر تورەقۇلوۆتىڭ 125 جىل­دىعى قارساڭىندا وسى ماسەلەلەردى شەشۋگە بايلانىستى دەپۋتاتتىق ساۋال جولداپ وتىرمىز. ءبىرىنشى – ءنازىر تورەقۇلوۆتىڭ 125 جىلدىعىنا وراي سىرتقى ىستەر مينيسترلىگى عيماراتىنىڭ الدىنا, ونىڭ ەڭسەلى ەسكەرتكىشى ورناتىلسا; ەكىنشى – قازاقستان پرەزيدەنتى جانىنداعى مەملەكەتتىك باسقارۋ اكادەمياسىنداعى ديپلوماتيا ينستيتۋتىنا ن.تورەقۇلوۆتىڭ ەسىمىن بەرىپ, ۋنيۆەرسيتەتتەردىڭ حالىقارالىق قاتىناستار فاكۋلتەتتەرىندە وقيتىن ۇزدىك ماگيسترانتتار مەن ستۋدەنتتەرگە ءنازىر تورەقۇلوۆتىڭ اتىنداعى ستيپەنديا تاعايىندالسا; ءۇشىنشى – استانا جانە الماتى قالالارىندا مەكتەپتەرگە ن.تورەقۇلوۆتىڭ ەسىمى بەرىلىپ, ورتا جانە جوعارى ءبىلىم باعدارلامالارىنا, وقۋلىقتارعا ول تۋرالى كولەمدى اقپارات, تانىمدىق ماتەريالدار ەنگىزۋ, سۋرەتشىلىك تۋىن­دىلارىنىڭ كورمەلەرىن ۇيىمداستىرۋ ماسەلەلەرى شەشىلسە; ءتورتىنشى – ءنازىر تورەقۇلوۆ تۇركىستان رەسپۋبليكاسى ورتالىق اتقارۋ كوميتەتىنىڭ ءتورا­عاسى بولىپ تۇرعان 1920 جىلدىڭ 16 قازانىندا №341 دەكرەتىمەن ماڭ­عىستاۋ ۋەزى مەن №4 جانە №5 اداي بولىستىقتارىن تۇركىستان رەسپۋبليكاسىنان قىرعىز (قازاق) سوۆەتتىك سوتسياليستىك اۆتونوميالى رەسپۋبليكاسىنا بەردى. سول سەبەپتى, ءنازىر تورەقۇلوۆتىڭ وسى وڭىرگە سىڭىرگەن ولشەۋسىز ەڭبەگىن ەسكەرىپ, اقتاۋ قالاسىنىڭ ورتالىق كوشەسىنە, ءبىر مەكتەپكە ونىڭ ەسىمى بەرىلىپ, ەسكەرتكىشى ورناتىلسا; بەسىنشى – 2008 جىلى تۇركىستان قالاسىندا اشىلعان ءنازىر تورەقۇلوۆتىڭ مەموريالدىق مۋزەيى تالاپقا ساي ەمەس دەپ تانىلىپ, بۇزىلۋىنا بايلانىستى جاڭا عيمارات سالۋ ماسەلەسى شەشىلسە; التىنشى – مەملەكەتتىك تاپسىرىس­پەن ءنازىر تورەقۇلوۆتىڭ تۇلعالىق قاسيەتتەرىن جان-جاقتى قىرلارىمەن اشاتىن دەرەكتى ءارى كوركەم جانرداعى فيلمدەر تۇسىرۋگە, «ءنازىر الەمى» ات­تى البوم-كىتاپ شىعارۋعا قاجەتتى قارجىلار بولىنسە; جەتىنشى – 2016 جىلى حالىقارالىق دەڭگەيدە «ءنازىر تورەقۇلوۆ – تۇڭعىش قازاق ەلشىسى» اتتى اۋقىمدى عىلىمي-تاجىريبەلىك كونفەرەنتسيا ۇيىمداستىرىلسا; سەگىزىنشى – ءنازىر تورەقۇلوۆتىڭ ءومىرىن, قىزمەت ىستەگەن جەرلەرىن تولىعىراق زەرتتەۋ, مۇراعاتتاردان قۇندى قۇجاتتاردى ىزدەستىرۋ, ەلگە اكەلۋ, جۇرتشىلىققا, عىلىمي ورتاعا ۇسىنىپ, «ءنازىر جۇرگەن جول» اتتى عىلىمي-تاريحي-تانىمدىق ەكسپەديتسيا ۇيىمداستىرىلسا. ارداقتى ازاماتتارىمىزدىڭ ەسىمىن قۇرمەتتەۋ – ءبىز ءۇشىن پارىز. قازاق حالقىنىڭ ادال پەرزەنتى, تۇڭعىش كاسىبي ديپلوماتى, مەملەكەت جانە قوعام قايراتكەرى ءنازىر تورەقۇلوۆتىڭ ەسىمىن ەل جادىندا ماڭگى قالدىرۋ ءبىزدىڭ تاريح الدىنداعى بورىشىمىز. قۇرمەتپەن, سەنات دەپۋتاتتارى قۋانىش ايتاحانوۆ, يكرام ادىربەكوۆ, بىرعانىم ءايتىموۆا, ءالي بەكتاەۆ, باقتىباي شەلپەكوۆ.