راحمەت ساعان, دارىگەر!

جۇرەككە وپەراتسيا جاسايتىن الماتىداعى تۇرىك-قازاق ەمحاناسىنا ءتۇستىم. وسى جەردە ءولىم كوزىنە ەلەستەگەن ادامنىڭ ءومىرى ءۇشىن كۇرەسكە تۇسكەن اق حالاتتى ابزال جاندارعا تاپ كەلدىم. وسىندايدا شىركىن-اي, وسىدان تۇرىپ كەتسەم, بار جاقسىلىقتى وسى كىسىلەرگە جاسار ەدىم دەپ ويلايسىڭ. ارينە, دەنساۋلىعى قىل ۇستىندەگى ادامنىڭ جۇرەگىنەن شىققان رياسىز اق العىسىنان باسقا قولدا نە بار... مەنىڭ ايتپاعىم, وسىندا جۇرەگىمە وتا جاساعان جاس كارديوحيرۋرگ ەركەبۇلان ما­عاۋين تۋرالى ەدى. ەركەبۇلان مەكتەپتى بىتىرگەن سوڭ الماتى قالاسىنداعى س.اسفەندياروۆ اتىنداعى مەدۋنيۆەرسيتەتتىڭ ەمدەۋ ءىسى فاكۋلتەتىنە وقۋعا ءتۇسىپ, پرەزيدەنت ستيپەن­ديا­سىنىڭ يەگەرى اتانىپ, ۇزدىك ديپلوممەن ءبىتىرىپ شىعادى. جاس حيرۋرگتىڭ اكەسى كەن­جەبەك ماعاۋيا ۇلى وسى «بلاگو­دارنوە» اۋرۋحاناسىنىڭ باس ءدارى­گەرى. شيپالى قولىمەن تالاي سىرقاتقا ەم جاساپ ءجۇر­گەن بىلىكتى ازامات. شەشەسى قايىر­گۇل قۇسمانقىزى ەل العىسىن ارقالاعان مەيىرىمدى مەدبيكە. قازاقتا «اكە كورگەن وق جونار» دەگەن ۇلاعاتتى ءتامسىل ءسوز بار. بالا بولسا دا اكە-شەشەسىنىڭ ماماندىعىنا كوزى ۇيرەنگەن ەركەبۇلاننىڭ جۇرەگى قالاپ العان ماماندىعىن ابىرويمەن اتقارىپ جاتقانىنا كوزىمىز جەتتى. ءاربىر ادامدى قيماس تۋى­سىنداي ايالاپ, كۇن سايىن ءوزى جاساعان وتاسىنىڭ بارىسىن بايقاپ, اقىل كەڭەسىن ايتا وتىرىپ جارىق كۇننىڭ جاقسى نۇرىن جانىڭا قۇيا بىلەدى. بۇگىندە مەن اۋىلىما, تۋعان-تۋىستارىمنىڭ جانىنا ورالدىم. جانىمدى مازا­لاعان اۋرۋدان ءسال دە بولسا ايىعىپ, ءبىر جاقسى كۇن كەشىپ ءجۇرمىن. ەركەبۇلان كەنجەبەك­ ۇلى­نىڭ ماعان, مەن سياقتى اۋرۋى دەندەتكەن ادامدارعا جاساعان وتاسى وتە ءساتتى شىعىپ, ومىرگە قايتا ورالىپ جاتىر. ەركەبۇلان بۇل جۇمىسقا بىردەن كەلمەپتى, كىشى مەديتسينالىق جۇمىستان باستاپ جەدەل جاردەم دارىگەرى قىزمەتىن اتقارعان. كەلە-كەلە «بۋرگ مەديكال Sema Hospital» اۋرۋ­­حاناسىندا كارديوحيرۋرگ ءمىن­دەتىن بىلىكتىلىكپەن اتقارىپ ءجۇر. وسىنداي ەل دەنساۋلىعى ءۇشىن جان اياماي ەڭبەك ەتىپ جۇرگەن ازاماتتى تاربيەلەپ, وقىتىپ ادام جانىنا اراشا دارىگەر ەتىپ شىعارعان ەركەبۇلاننىڭ ومىرىندەگى وقىتۋشىلارىنا, اتا-اناسىنا گازەت ارقىلى راحمەت ايتسام دەپ ەدىم. كارديوحيرۋرگ, ەمى شيپا ەلگەزەك جان ەركەبۇلان كەنجەبەك ۇلىنىڭ ەڭبەگىنە جەمىس, ومىرىنە باقىت تىلەيمىن. حاميت گەرەەۆ. شىعىس قازاقستان وبلىسى, ءۇرجار اۋدانى, ماقانشى اۋىلى.