اتاقتى جەرلەستەرىن ماقتان ەتەدى

قوستاناي وبلىستىق ىشكى ىستەر دەپارتامەنتىنىڭ اقپاراتتىق-ناسيحاتتىق توبى  «نۇرلى جول – بولاشاققا باستار جول» جولداۋىن ناسيحاتتاۋ ءۇشىن جانە قازاقستان حالقى اسسامبلەياسىنىڭ 20 جىل­دىعى, قازاق حاندىعىنىڭ 550 جىلدىعىنا ارنالعان شارالار اياسىندا ارقالىق قالاسىندا بولىپ, «تورعاي ءوڭىرىنىڭ تالانتتارى» ايدارىمەن كونتسەرت قويدى. ناۋىرزىم, جانگەلدين, امانگەلدى اۋداندىق جانە ارقالىق قالالىق ىشكى ىستەر بولىمدەرىنىڭ قىزمەتكەرلەرى وسى ءوڭىردىڭ اعارتۋشى, ونەر تۇلعالارى تۋرالى ايتىپ بەردى. –  ءبىزدىڭ وبلىستىق ىشكى ىستەر دەپارتامەنتى  قىزمەتكەرلەرى پرە­زيدەنت جولداۋلارىندا ايتىلاتىن قازاق ءتىلىن دامىتۋ ءىسىن جۇزەگە اسىرۋ باعىتىندا جۇمىستىڭ جاڭا فورمالارىن قاراستىرۋدا. ەڭ باس­تىسى,  جۇرتشىلىق اراسىندا پوليتسيا بەدەلىن قالىپتاستىرۋدى ماقسات تۇتىپ وتىرمىز. بۇگىنگى كونتسەرت  سونىڭ دالەلى, – دەدى قوستاناي وبلىستىق ىشكى ىستەر دەپارتامەنتى باستىعىنىڭ ورىنباسارى باقىتجان ەرالين. ارقالىقتىق كورەرمەندەر نازارىنا پوليتسيا قىزمەتكەرلەرى وزدەرىنىڭ اتاقتى جەرلەستەرى پاي­دالانعان جادىگەرلەردەن كورمە ۇسىندى. ناۋىرزىمدىقتار  تاۋەل­سىز قازاقستاننىڭ تۇڭعىش  ءبىلىم ءمينيسترى شايسۇلتان شاياح­مەتوۆتىڭ  سۋرەتتەرى مەن  سپورتتىق جارىستاردان العان ۆىمپەلدەرىن كورسەتتى. ولار كونتسەرتكە كەلگەن­دەرگە شاياحمەتوۆتىڭ سۋرەتى  سا­لىن­عان جانە ول تۋرالى اقپاتتار جازىلعان البوم  تاراتتى. سونىمەن قاتار, جەرلەسى, اتاقتى ساتيريك سەيىت كەنجەاحمەتوۆتىڭ «ەكى ساڭىراۋدىڭ اڭگىمەسى» ات­تى ينتەرمەدياسىن  ساحنالادى. امانگەلدى اۋدانىنىڭ ءتار­­تىپ ساقشىلارى جازۋ­شى ءسابيت دوسانوۆتى, اقىن عا­فۋ قايىربەكوۆتى, سىر­باي ماۋلەنوۆتى ماقتان تۇتا­تىن­دىقتارىن كورسەتتى. ال جان­گەل­دين اۋداندىق ىشكى ىستەر ءبولىمى قىزمەتكەرلەرىنىڭ الاش ارداقتىسى, ۇلت ۇستازى احمەت بايتۇرسىنوۆتىڭ سەمەي تۇرمەسىنەن اناسىنا جازعان حاتىن ساحنالاۋى شارانىڭ  ناعىز شارىقتاۋ شەگىنە اينالدى. وسىلايشا, وبلىستىق ىشكى ىستەر دەپارتامەنتىنىڭ اقپاراتتىق-ناسيحاتتىق توبى ەندى بۇل جۇ­مىسىن وبلىستىڭ وزگە وڭىرىندە جالعاستىرماق. ءنازيرا جارىمبەتوۆا, «ەگەمەن قازاقستان». ارقالىق.