ايدىن جانە ايبىن

وسىدان 22 جىل بۇرىن قازاقستان رەسپۋبليكاسى پرەزيدەنتىنىڭ جارلىعىمەن قازاقستان رەسپۋبليكاسى قارۋلى كۇشتەرىنىڭ ءتۇرى رەتىندە اسكەري-تەڭىز كۇشتەرى (اتك) قۇرىلعان بولاتىن. كاسپي ءوڭىرى قازاقستان مەن الەمدىك مەملەكەتتەردىڭ ەكونوميكاسى ءۇشىن ايرىقشا ماڭىزعا يە. تەڭىزدى قورعاۋدى قامتاماسىز ەتۋ ءۇشىن ەلىمىزدە زاماناۋي اسكەري-تەڭىز كۇشتەرىن قۇرۋ قاجەتتىلىگى تۋىندادى. اتك-ءنىڭ باستى مىندەتتەرى مەملەكەتتىڭ دەربەس شەكاراسىن, اۋماقتىق تۇتاستىعىن, ەگەمەندىگىن جانە كاسپي تەڭىزىنىڭ قازاقستاندىق سەكتورىنداعى قازاقستان رەسپۋبليكاسىنىڭ ەكو­نوميكالىق مۇددەلەرىن قورعاۋ بولىپ تابىلادى. اسكەري-تەڭىز كۇشتەرى جوسپارلى تۇردە دامىپ كەلەدى, ونىڭ ىشىندە كەمەلەردىڭ قۇرىلىسى جانە ولاردى ساتىپ الۋ بويىنشا قارقىندى جۇمىستار جۇرگىزىلۋدە. سوڭعى ءۇش جىل ىشىندە وتان­دىق «زەنيت ورال زاۋىتى»» اق كاسىپورنىندا جاسالعان ءۇش زىمىراندى-ارتيللەريالىق كەمە قاتارعا قوسىلدى. سونىمەن قاتار, رەسەيدىڭ كەمە جاساۋ زاۋىتتارىندا «الاتاۋ» مينالىق-تارتقىش كەمەسى قويىلدى, بۇدان وزگە, سوققى بەرەتىن قارۋى بار كەمەلەردى جاساۋ مۇمكىندىگى زەردەلەنۋدە. كەشە اقتاۋدا گۇل شوقتارىن قويۋ, پاراد لەكتەرىنىڭ سالتاناتتى مەرەكەسى جانە مەرەكەلىك كونتسەرتتى قۇرايتىن سالتاناتتى شارالار ءوتتى. اقتاۋ گارنيزونىنا قاراس­تى بولىمدەر باسشىلىعى اسكە­ري قىزمەتشىلەردى كاسىبي مەرە­كەسىمەن قۇتتىقتاپ, قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ جەكە قۇرامىنىڭ الدىنا قويىل­عان مىندەتتەردى مۇلتىكسىز ات­قاراتىندىعىنا, ەلىمىزدىڭ باتىس ءوڭىرىن قورعاپ, وزدەرىنىڭ جاۋ­ىنگەرلىك, كاسىبي شەبەرلىكتەرىن تۇراقتى جەتىلدىرەتىندىگىنە سەنىم ءبىلدىردى. «ەگەمەن-اقپارات».