ءمادينا مەن جامال

كيىم ۇلگىلەرىمەن تاڭعالدىرماق وبلىس ورتالىعىنداعى سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ ديزاين, تەاتر جانە سۋرەت ونەرى فاكۋلتەتىنىڭ ستۋدەنتتەرى جامال قاليەۆا مەن ءمادينا قاسقىرباەۆا ت.جۇرگەنوۆ اتىنداعى قازاق ۇلتتىق ونەر اكادەمياسىندا وتكەن ەلىمىزدىڭ جوعارى وقۋ ورىندارى ستۋدەنتتەرى اراسىنداعى «ديزاينەرلەر» بايقاۋىنىڭ ديپلومانتتارى اتاندى. بۇل بايقاۋعا ستۋدەنت قىز­دار زاماناۋي كيىم ۇلگىلەرىن اپارىپ ديزاين سالاسى بويىنشا وزدەرىنىڭ شىعارماشىلىق يدەيالارىن ۇسىندى. ياعني, بايقاۋ شارتى بويىنشا جامال مەن ءمادينا كيىم ەسكيزدەرىن سىزىپ, ونى ءپىشىپ, تىگىپ شىقتى. ال, قازىلار القاسى بارلىق قاتىسۋشىلاردىڭ جاساعان كيىمدەرىنىڭ جاڭاشىلدىعى مەن ديزاينەرلىك ويلاۋ قابىلەتىنىڭ ەرەكشەلىگىنە, جۇمىستى ورىن­داۋداعى ساپا مەن ۇقىپ­تى­لىققا, كومپوزيتسيالىق ءجا­نە تۇستەردىڭ ۇيلەسىمدىلىگىن ۇتىمدى قولدانا بىلگەندەرىن اتاپ ءوتتى. سۇلتانماحمۇت تور­ايعىروۆ اتىنداعى ۋنيۆەرسيتەت ستۋدەنتتەرى جامال قاليەۆا مەن ءمادينا قاسقىر­باەۆانىڭ جۇمىستارىنا ارنايى سەرتيفيكات تابىس ەتىل­دى. ىسكەر ستۋدەنت جامال بۇل تابىس ولاردىڭ ديزاينەر ماماندىعىن تاڭداۋداعى ال­عاشقى جەڭىستەرى جانە تىنىمسىز شىعارماشىلىق ەڭ­بەكتىڭ, ويدىڭ ارقاسى دەيدى. ديزاينەر ماماندىعىن قازاق جاستارى ەندى-ەندى تاڭداپ, ۇيرەنىپ كەلە جاتقانىمەن,ونىڭ نەگىزى تەرەڭدە – ءبىزدىڭ اپا-اجەلەرىمىزدىڭ قولدارىنان شىققان قازاق كيىمدەرى, ويۋلار, قۇراق كورپەلەر – ويدان, شەبەرلىكتەن تۋعان. سوندىقتان, قازىرگى زامان تىلىمەن ايتقاندا, بۇگىنگى كۇننىڭ ديزاينەرى, ياعني كيىم ۇلگىلەرىن جاساۋشى ادامعا الدىمەن دارىن, قابىلەت جانە كرەاتيۆتى ەرەكشە ويلاۋ مۇمكىندىگى قاجەت. – قازىر ءبىزدىڭ ويىمىزدا وسى كۇنگى ءومىردىڭ كرەاتيۆتىلىگى مەن زاماناۋيلىعىن بەينە­لەيتىن كيىم ۇلگىلەرىن جاساۋ يدەياسى بار. ءبىز ۇلتتىق قۇندىلىقتارىمىزدى الەمگە پاش ەتەتىن تاڭقالارلىق كيىم ۇلگىلەرىن جاساعىمىز كەلەدى, – دەيدى جامال مەن ءمادينا. – ارينە, ستۋدەنتتەرىمىزگە ۇيرەتۋ, وقىتۋ – ءبىزدىڭ پارىزى­مىز. قىزدارىمدى الماتىعا باي­قاۋعا جىبەرگەندە ولاردىڭ دا­­رىندى قابىلەتتەرىنە سەندىم,  – دەيدى ۇستازدارى, قازاقستان سۋرەت­شىلەر وداعىنىڭ مۇشەسى مايسا ىقىلاسوۆا. فاريدا بىقاي, «ەگەمەن قازاقستان». پاۆلودار.